తలనొప్పి వస్తోందంటే.. మహిళ జుట్టు కట్, మెడకు మసాజ్ చేసిన డాక్టర్

మనకు తలనొప్పి వస్తుందని వైద్యుని వద్దకు వెళితే.. అతను ఇంజెక్షన్ చేయడమో, మందులు రాసివ్వడమో చేస్తారు. కానీ ఓ వ్యక్తి మాత్రం తలనొప్పిగా ఉందన్న మహిళ జుట్టు కోశాడు. వివరాల్లోకి వెళితే.. హైదరాబాద్ ఉప్పల్‌ చిలుకానగర్‌కు చెందిన ఓ వివాహితకు తరచుగా తలనొప్పి వస్తుండటంతో ఆమె ఈ నెల 2న ఇంటికి దగ్గర్లోని ఆసుపత్రికి వెళ్లింది.

ఇక్కడ వైద్యుడిగా పనిచేస్తున్న డాక్టర్ బాలరాజు అనే వ్యక్తి.. మందులకు బదులుగా ఆ మహిళ జుట్టును కత్తెరతో కట్ చేశాడు. అక్కడితో ఆగకుండా తలకు, మెడకు మసాజ్ చేయడంతో పాటు ఆమె పట్ల అసభ్యంగా ప్రవర్తించాడు.

నొప్పి తగ్గకకపోతే మరోసారి ఆసుపత్రికి రావాలని సూచించాడు. ఈ విషయాన్ని ఆమె ఇంట్లో చెప్పగా... శనివారం ఆమె తల్లి, బంధుమిత్రులు ఆసుపత్రికి వెళ్లి డాక్టర్‌ను ప్రశ్నించారు. చేసిన తప్పును కప్పిపుచ్చుకునేందుకు ప్రయత్నించి బాలరాజును వారు చితకబాది, పోలీస్ స్టేషన్‌లో అప్పగించారు. కేసు నమోదు చేసుకున్న పోలీసులు దర్యాప్తు చేస్తున్నారు.