కేసీఆర్ కాంగ్రెస్ కుక్కలను పిల్లులుగా మార్చారు : పల్లా రాజేశ్వర్ రెడ్డి వివాదాస్పద వ్యాఖ్యలు...

కాంగ్రెస్ నుంచి బీఆర్ఎస్ లో చేరిన ఎమ్మెల్యేలను కుక్కలతో పోల్చారు ఎమ్మెల్సీ  పల్లా రాజేశ్వర్ రెడ్డి. వారిని బీఆర్ఎస్ లోకి తెచ్చి కేసీఆర్ పిల్లుల్ని చేశారని అన్నారు. 

వరంగల్ : 2018 అసెంబ్లీ ఎన్నికల్లో 88 సీట్ల భారీ మెజారిటీతో గెలుపొందినా ముఖ్యమంత్రి కె. చంద్రశేఖర్‌రావు 12 మంది కాంగ్రెస్‌ ఎమ్మెల్యేలను అధికార పార్టీలోకి ఎందుకు చేర్చుకున్నారో తెలుసా అంటూ  బీఆర్‌ఎస్ ఎమ్మెల్సీ, రైతు బంధు సమితి చైర్మన్ పల్లా రాజేశ్వర్ రెడ్డి తనదైన ట్విస్ట్ ఇచ్చారు.

కాంగ్రెస్ లో ఉన్నవారంతా కుక్కలు అని వారు మొరగకుండా ఉండడం కోసం పార్టీలోకి తీసుకువచ్చి పిల్లులుగా మార్చి కట్టేశారని తీవ్ర వ్యాఖ్యలు చేశారు. 2018 ఎన్నికల తరువాత కాంగ్రెస్ నుంచి గెలిచిన పలువురు టీఆర్ఎస్ లో చేరారు. విద్యాశాఖ మంత్రి సబిత ఇంద్రారెడ్డి కూడా వారిలో ఉన్నారు. ఆమెను చేర్చుకోవడమే కాకుండా మంత్రి పదవి కూడా ఇచ్చారు. 

ఇప్పుడు బీఆర్ఎస్ నుంచి ప్రకటించిన తొలి విడత జాబితాలో కూడా కాంగ్రెస్ నుంచి వచ్చిన కొందరికి టికెట్లు ఇచ్చారు. ఇది కొంతమంది టీఆర్ఎస్ నేతల్లో మంటగా ఉంది. టికెట్ ఇచ్చినవారు, తీసుకున్నవారు బాగానే ఉన్నారు కానీ.. జనగాం నుంచి టికెట్ ఆశిస్తున్న పల్లా రాజేశ్వర్ రెడ్డి మాత్రం ఊరుకోలేకపోయాడు.

బీఆర్ఎస్ కార్యకర్తల సమావేశంలో ఈ విషయాన్నే నోరు పారేసుకున్నాడు. కాంగ్రెస్ నుంచి బీఆర్ఎస్ లోకి వచ్చిన వారిని కుక్కలతో పోల్చడంతో వారతంగా సీరియస్ గా ఉన్నారట. రేపోమాపో సీఎంను కలిపి పల్లామీద ఫిర్యాదు చేయడానికి రెడీ అవుతున్నట్లు సమాచారం. 

జనగాం జిల్లాలోని తన స్వస్థలమైన షోడశపల్లి గ్రామంలో జరిగిన బీఆర్‌ఎస్ పార్టీ సమావేశంలో రాజేశ్వర్ రెడ్డి ప్రసంగిస్తూ, కాంగ్రెస్ ఎమ్మెల్యేలు అధికార పార్టీలో చేరకపోతే, కారణం లేకుండానే బీఆర్‌ఎస్ పార్టీని కుక్కల్లా మొరుగుతారని అన్నారు. వారిని మౌనంగా ఉంచేందుకే కేసీఆర్ బీఆర్‌ఎస్ పార్టీలోకి తీసుకొచ్చి వారిని పిల్లులుగా మార్చారని వ్యాఖ్యానించారు.

ఎమ్మెల్సీ ఇలాంటి వ్యాఖ్యలు చేస్తూ సోషల్ మీడియాలో పోస్ట్ చేసిన వీడియో వైరల్ కావడంతో రాజకీయ వర్గాల్లో కలకలం రేపుతోంది. సిట్టింగ్ ఎమ్మెల్యే ముత్తిరెడ్డి యాదగిరిరెడ్డిపై జనగాం టికెట్‌ కోసం ఎమ్మెల్సీ పోటీ చేయడం గమనార్హం. మరో ఎమ్మెల్సీ పోచంపల్లి శ్రీనివాస్ రెడ్డి కూడా జనగాం రేసులో నిలిచారు. జనగాం నుంచి తనకే టికెట్ కావాలని పల్లా రాజేశ్వర్ రెడ్డి పట్టుబడుతున్నారు.

వచ్చే అసెంబ్లీ ఎన్నికలకు బీఆర్‌ఎస్‌ అభ్యర్థుల జాబితాను చంద్రశేఖర్‌రావు విడుదల చేసినప్పటికీ, జనగాం నుంచి పార్టీ అభ్యర్థిని ఇంకా ప్రకటించలేదు. కాగా, ఎమ్మెల్సీ పోచంపల్లి శ్రీనివాస్‌రెడ్డి తనకు కేసీఆర్‌తో, ఐటీ శాఖ మంత్రి కేటీఆర్‌తో గత రెండు దశాబ్దాలుగా ఎలాంటి సంబంధాలున్నాయో చెబుతూ సోషల్ మీడియా వేదికగా ఆడియో క్లిప్‌ను విడుదల చేశారు. ప్రజలకు ఇచ్చిన వాగ్దానాలన్నింటినీ నెరవేరుస్తూ ఎమ్మెల్సీగా ప్రజలకు అందుబాటులో ఉంటున్నానని చెప్పారు.

కొందరు నాయకులు చౌకబారు రాజకీయాలు చేస్తూ పార్టీ ప్రతిష్టను దెబ్బతీస్తున్నారని పల్లా రాజేశ్వర్ రెడ్డి వ్యాఖ్యలను ఉద్దేశించి శ్రీనివాస్ రెడ్డి వ్యాఖ్యానించారు. ఆరోగ్యకరమైన రాజకీయాలు అందరికీ ముఖ్యమన్నారు. జనగాం నుంచి ఎవరికి సీఎం కేసీఆర్‌ పార్టీ టిక్కెట్‌ ఇచ్చినా ఆ అభ్యర్థి గెలుపుకు కృషి చేయాల్సిన బాధ్యత బీఆర్‌ఎస్‌ నేతలందరిపై ఉందన్నారు.

సిట్టింగ్ ఎమ్మెల్యే ముత్తిరెడ్డి యాదగిరిరెడ్డి చేర్యాల నుంచి కొమురవెల్లి శ్రీ మల్లికార్జున స్వామి ఆలయం వరకు 1500 మంది బీఆర్‌ఎస్‌ సిబ్బందితో బైక్‌ ర్యాలీ నిర్వహించారు. కేసీఆర్ వరుసగా మూడోసారి ముఖ్యమంత్రి కావాలనీ, జనగాం నుంచి పార్టీ టికెట్ రావాలని పీఠాధిపతుల ఆశీస్సులు కోరుతూ యాదగిరిరెడ్డి మోకాళ్లపై వంగి ప్రార్థించారు.