RCB- Bengalore Stampede: మేము వాయిదా వేయాలనే చెప్పాం..కానీ ఆర్సీబీనే..!
సారాంశం
ఆర్సీబీ విజయోత్సవ వేడుకలు అనూహ్యంగా విషాద వేడుకలు అయ్యాయి. ఈ దారుణ ఘటనలో 11 మంది మృతి చెందారు. 50 మందికి పైగా తీవ్ర గాయాల పాలయ్యారు. అయితే పోలీసులు వద్దు అని చెప్పినప్పటికీ ఆర్సీబీ యాజమాన్యం వినకుండా ముందుకు వచ్చినట్లు సమాచారం.
ఇండియన్ ప్రీమియర్ లీగ్ 2025 ఫైనల్లో విజయం సాధించిన రాయల్ ఛాలెంజర్స్ బెంగళూరు జట్టుకు బెంగళూరులో జరిగిన విజయోత్సవ కార్యక్రమం అనూహ్యంగా విషాదంలోకి మలుపు తిరిగింది. ఐపీఎల్ కప్ గెలిచిన అనంతరం బుధవారం ఆర్సీబీ బృందం బెంగళూరు చేరగా, వారికి ఘన స్వాగతం కల్పించేందుకు భారీ ఏర్పాట్లు జరిగాయి.
35 వేల సామర్థ్యం..3 లక్షల మంది
ప్రభుత్వం, కర్ణాటక క్రికెట్ అసోసియేషన్ కలిసి క్రికెటర్లకు సన్మాన కార్యక్రమం ఏర్పాటు చేయగా, ఇది చిన్నస్వామి స్టేడియంలో సాయంత్రం 6 గంటలకు జరగాల్సి ఉండేది. కానీ స్టేడియానికి దాదాపు 35 వేల మంది సామర్థ్యం ఉంటే, మూడు లక్షల మందికిపైగా అభిమానులు అక్కడికి చేరుకోవడంతో పరిస్థితులు అదుపుతప్పాయి. ఇదే సమయంలో వర్షం పడటం వల్ల వెనుక గేటు వద్ద తొక్కిసలాట మొదలై, 11 మంది ప్రాణాలు కోల్పోయారు.
ఆదివారం వరకే..
ఈ వేడుకలపై ముందుగా పోలీస్ శాఖ అనుమానాలు వ్యక్తం చేసి, భారీ గుంపులకు అనుమతి ఇవ్వొద్దని సూచించినట్లు సమాచారం. అయితే, విదేశీ ఆటగాళ్లు ఆదివారానికి మించి భారత్లో ఉండలేరన్న కారణంగా, కార్యక్రమాన్ని బుధవారమే నిర్వహించాల్సి వచ్చిందని అధికారులు తెలిపారు.
ఇదంతా జరిగాక, కర్ణాటక హోంమంత్రి జి. పరమేశ్వర మీడియాతో మాట్లాడుతూ, ఆర్సీబీ, కర్ణాటక క్రికెట్ సంఘం కోరిన మేరకే ఈ కార్యక్రమం జరిగిందని చెప్పారు. స్టేడియానికి ఇంత పెద్ద సంఖ్యలో ప్రజలు వస్తారని ఊహించలేదన్నారు. ఈ ఘటనపై ఇప్పటికే సీఎం సిద్ధరామయ్య స్పందించారని, మెజిస్టీరియల్ స్థాయిలో విచారణ జరుపుతామని తెలిపారు.
అలాగే మృతుల కుటుంబాలకు రూ.10 లక్షల పరిహారం ప్రకటించడం జరిగింది. మొత్తం కార్యక్రమం సాయంత్రం 6.30 లోపు ముగిసింది. ఆటగాళ్లు మధ్యాహ్నం 4.30కి విధానసౌధలోకి వచ్చి, అక్కడి నుంచి స్టేడియానికి వచ్చారు.ఈ ఘటన ఆర్సీబీ అభిమానుల్లో తీవ్ర విషాదాన్ని మిగిల్చింది. జట్టు గెలిచిన ఆనందం కొన్ని క్షణాల్లోనే విషాదంలోకి మారింది.