ఉత్తరప్రదేశ్‌లోని దివ్యాంగులైన పిల్లలకు యోగి ప్రభుత్వం ఆర్థిక సహాయం అందిస్తోంది. స్పాన్సర్షిప్ పథకం ద్వారా ప్రతి నెలా రూ.4,000 సాయం అందనుంది. ఈ పథకం ద్వారా లబ్ధి పొందేందుకు అర్హత ప్రమాణాలు, దరఖాస్తు విధానం గురించి తెలుసుకోండి.
లక్నో : ఉత్తరప్రదేశ్‌లోని అనాథలకు యోగి సర్కార్ అండగా నిలిచింది.ముఖ్యంగా ఏ దిక్కులేని అనాధ పిల్లల సంక్షేమంకోసం ముఖ్యమంత్రి యోగి ఆదిత్యనాథ్ ప్రత్యేక స్కాలర్ షిప్ విధానాన్ని తీసుకువచ్చాారు. ఇది అనాథలు, దివ్యాంగులైన పిల్లల సంక్షేమంలో కీలకంగా నిలుస్తోంది. మహిళా శిశు సంక్షేమ శాఖ డిసెంబర్ నాటికి దివ్యాంగులైన పిల్లలను గుర్తించి, పథకానికి అర్హులైన వారికి ఆర్థిక సహాయం అందించనుంది.
స్పాన్సర్షిప్ పథకం కింద ప్రతి బిడ్డకు నెలకు రూ.4,000 ఆర్థిక సహాయం అందజేస్తారు. 2024-25 ఆర్థిక సంవత్సరంలో 20,000 మంది పిల్లలకు సహాయం అందించాలనే లక్ష్యంతో యోగి ప్రభుత్వం ముందుకు సాగుతోంది. రాష్ట్రంలోని అనాధ పిల్లల పట్ల యోగి ప్రభుత్వ నిబద్ధతకు ఈ పథకమే నిదర్శనం.
కేంద్ర ప్రభుత్వం యొక్క మిషన్ వాత్సల్య కార్యక్రమంలో భాగంగా ఈ పథకాన్ని అమలు చేస్తున్నారు. కష్టాల్లో ఉన్న పిల్లలకు ఈ పథకం ద్వారా సహాయం అందుతుంది. 2024-25 ఆర్థిక సంవత్సరంలో స్పాన్సర్షిప్ పథకం కింద 11,860 మంది పిల్లలకు రూ.1,423.20 లక్షల సహాయం అందించింది యోగి ప్రభుత్వం. కష్టాల్లో ఉన్న ఏ ఒక్క బిడ్డ కూడా సహాయం లేకుండా ఉండకూడదనే లక్ష్యంతో ప్రభుత్వం పనిచేస్తోంది.
రాష్ట్రవ్యాప్తంగా దివ్యాంగులైన పిల్లలను గుర్తిస్తున్న యోగి ప్రభుత్వం
ముఖ్యమంత్రి యోగి ఆదిత్యనాథ్ ఆదేశాల మేరకు రాష్ట్రవ్యాప్తంగా ప్రత్యేక కార్యక్రమం ద్వారా దివ్యాంగులైన పిల్లలను గుర్తిస్తున్నారు. డిసెంబర్ వరకు జరిగే ఈ ప్రత్యేక కార్యక్రమంలో భాగంగా జిల్లా స్థాయిలో దివ్యాంగులైన పిల్లలను గుర్తించి, ప్రభుత్వ పథకాలు అందిస్తారు. స్పాన్సర్షిప్ పథకానికి అర్హులైన పిల్లలను వెంటనే గుర్తించి, పథకం కిందకు తీసుకువస్తారు.
స్పాన్సర్షిప్ పథకం కింద అందించే ఆర్థిక సహాయంతో పిల్లలకు మంచి విద్య, వైద్యం, ఇతర అవసరాలు తీరుస్తున్నారు. అర్హులైన వారి ఎంపిక ప్రక్రియను కూడా పారదర్శకంగా నిర్వహిస్తున్నారు. గ్రామీణ ప్రాంతాల్లో తల్లిదండ్రుల వార్షిక ఆదాయం రూ.72,000 లోపు, పట్టణ ప్రాంతాల్లో రూ.96,000 లోపు ఉండాలి. తల్లిదండ్రులిద్దరూ లేని లేదా చట్టబద్ధమైన సంరక్షకులు లేని పిల్లలకు ఆదాయ పరిమితి వర్తించదు.
ఈ పథకం ద్వారా లబ్ధి పొందేందుకు ఆధార్ కార్డు, ఆదాయ ధ్రువీకరణ పత్రం, వయస్సు ధ్రువీకరణ పత్రం, తల్లిదండ్రుల మరణ ధ్రువీకరణ పత్రం, పిల్లల విద్యా ధ్రువీకరణ పత్రం వంటి ముఖ్యమైనవి. ఈ పత్రాలు జిల్లా బాలల సంక్షేమ శాఖ లేదా జిల్లా ప్రొబేషన్ అధికారి కార్యాలయంలో సమర్పించాలి.
ఈ పథకం కింద ప్రతి బిడ్డకు నెలకు రూ.4,000 ఆర్థిక సహాయం అందిస్తారు. ఇందులో 60 శాతం కేంద్ర ప్రభుత్వం, 40 శాతం రాష్ట్ర ప్రభుత్వం భరిస్తుంది. 17 జూలై 2022న ఉత్తరప్రదేశ్ కేబినెట్ స్పాన్సర్షిప్ పథకం పరిధిని విస్తరించింది. మహిళా శిశు సంక్షేమ శాఖ అందించిన సమాచారం ప్రకారం 2023-24 ఆర్థిక సంవత్సరంలో 7,018 మంది పిల్లలకు రూ.910.07 లక్షలు, 2024-25 ఆర్థిక సంవత్సరంలో ఇప్పటివరకు 11,860 మంది పిల్లలకు రూ.1,423.20 లక్షల సహాయం అందించారు.
20,000 మంది పిల్లలకు లబ్ధి
ప్రతి బిడ్డా పాఠశాలకు వెళ్లి, మంచి జీవితం గడపాలనే లక్ష్యంతో ఈ పథకాన్ని అమలు చేస్తున్నారు. ఈ ఆర్థిక సంవత్సరంలో లబ్ధిదారుల సంఖ్య, నిధుల విడుదల రెండింటిలోనూ గణనీయమైన పురోగతి ఉంది. ఈ ఏడాది ఆఖరు నాటికి 20,000 మంది పిల్లలకు ఈ పథకం ద్వారా లబ్ధి చేకూర్చాలని లక్ష్యంగా పెట్టుకున్నారు.
వివిధ కారణాలతో ఇబ్బందులు పడుతున్న పిల్లలకు ఈ పథకం ద్వారా సహాయం అందుతుంది. వితంతువులు, విడాకులు తీసుకున్న లేదా భర్తలు వదిలివేసిన మహిళల పిల్లలు, తీవ్ర అనారోగ్యంతో బాధపడుతున్న తల్లిదండ్రుల పిల్లలు, అనాథలు, నిరాశ్రయులైన పిల్లలు, బాల కార్మికులు, బాల్య వివాహ బాధితులు, అక్రమ రవాణా బాధితులు, దివ్యాంగులు, ప్రకృతి వైపరీత్యాల బాధితులైన పిల్లలకు ఈ పథకం ద్వారా సహాయం అందిస్తున్నారు.
తల్లిదండ్రులు జైలులో ఉన్న పిల్లలు, HIV/AIDS బాధితులైన పిల్లలు, శారీరకంగా లేదా మానసికంగా లేదా ఆర్థికంగా తమను తాము చూసుకోలేని తల్లిదండ్రుల పిల్లలు, వీధి బాలలు, లైంగిక దోపిడీకి గురైన పిల్లలకు కూడా ఈ పథకం ద్వారా లబ్ధి చేకూరుస్తున్నారు.