Kamal Haasan: కోయంబత్తూరు లోక్ స‌భ స్థానం నుంచి కమల్ హాసన్ పోటీ.. !

Coimbatore: క్షేత్రస్థాయిలో ప్రజల నుంచి వచ్చిన ఫీడ్ బ్యాక్ ను పరిగణనలోకి తీసుకుని తమ ఎన్నికల మేనిఫెస్టోను రూపొందించాలని యోచిస్తున్నట్లు ఎంఎన్ ఎం పార్టీ సీనియర్ నేత ఒకరు తెలిపారు. ఇదే స‌మ‌యంలో డీఎంకే కూటమిలో భాగంగా ఎంఎన్ఎం అధినేత‌, సినీ న‌టుడు కమల్ హాసన్ కోయంబత్తూరు నుంచి పోటీ చేసే అవకాశం ఉందని స‌మాచారం.   

Tamil Superstar and MNM president Kamal Haasan: తమిళ సూపర్ స్టార్, ఎంఎన్ఎం వ్యవస్థాపక అధ్యక్షుడు కమల్ హాసన్ 2024 సార్వత్రిక ఎన్నికల్లో కోయంబత్తూరు లోక్ స‌భ‌ నియోజకవర్గం నుంచి పోటీ చేసే అవకాశం ఉంది. 2021 అసెంబ్లీ ఎన్నికల్లో కమల్ హాసన్ బీజేపీ అభ్యర్థి వనతి శ్రీనివాసన్ చేతిలో 1,728 ఓట్ల స్వల్ప తేడాతో ఓడిపోయినందున కోయంబత్తూరు సీటును ఆయనకు కేటాయించడానికి డీఎంకే ఆసక్తి చూపుతోందని ఎంఎన్ఎం ఉన్నత వర్గాలు తెలిపాయి. కోయంబత్తూరు దక్షిణ అసెంబ్లీ నియోజకవర్గంలో ఎంఎన్ఎం 'మక్లోడు మయ్యం' రాష్ట్ర స్థాయి ప్రచారాన్ని కమల్ హాసన్ ఆదివారం ప్రారంభించారు.

తమిళనాడులోని మొత్తం 234 అసెంబ్లీ నియోజకవర్గాల్లో పార్టీ నాయకులు, కార్యకర్తలు వార్డు, పంచాయతీ స్థాయిలో ప్రజలను కలుసుకుని వారు ఎదుర్కొంటున్న ఇబ్బందులను వివరించాలని ఎంఎన్ఎం యోచిస్తోంది. ఇందులో ఆయా నియోజకవర్గాల్లో ఎన్నికైన‌ ప్రజాప్రతినిధులు పట్టించుకోని సమస్యలను ఎత్తిచూప‌నున్నారు. క్షేత్రస్థాయిలో ప్రజల నుంచి వచ్చే ఫీడ్ బ్యాక్ ఆధారంగా ఎంఎన్ ఎం తన ఎన్నికల మేనిఫెస్టోను రూపొందిస్తుందని పార్టీ సీనియర్ నేత ఒకరు తెలిపారు.

ప్రతి వార్డు కార్యదర్శికి తమ ప్రాంతంలోని మౌళిక సదుపాయాలపై 25 బైనరీ ప్రశ్నల జాబితాను గూగుల్ ఫారంలో ఇస్తున్నామనీ, ప్రతి నియోజకవర్గంపై స్పష్టమైన చిత్రాన్ని పొందడానికి ఫీడ్ బ్యాక్ ఉపయోగపడుతుందని పార్టీ నాయకత్వం తెలిపింది. 2024 లోక్ స‌భ ఎన్నికల్లో కోయంబత్తూరు స్థానం నుంచి పోటీ చేయాలని పార్టీ కోయంబత్తూరు జిల్లా కార్యకర్తలు ఇప్పటికే క‌మ‌ల్ హాస‌న్ కు విజ్ఞప్తి చేసినట్లు ఎంఎన్ఎం వర్గాలు తెలిపాయి. డీఎంకే నాయకురాలు కనిమొళి నడుపుతున్న బస్సు ఎక్కిన వివాదంతో ఉద్యోగానికి రాజీనామా చేసిన  తమిళనాడు బస్సు డ్రైవర్ షర్మిలకు కమల్ హాసన్ ఇటీవల కారును బహుమతిగా ఇచ్చిన విషయం తెలిసిందే.

కమల్ హాసన్ ఆమెను తన చెన్నై ఇంటికి ఆహ్వానించి, ఆమె జీవనోపాధి కోసం నడపడానికి కొత్త కారును ఆమెకు అందజేశారు. కోయంబత్తూరుకు చెందిన షర్మిలకు కమల్ కారును బహుమతిగా ఇవ్వడం కూడా ఆ ప్రాంతంలో పాపులారిటీ సంపాదించుకోవడానికి తమిళ సూపర్ స్టార్ వేసిన ఎత్తుగడగా భావిస్తున్నారు.