యూపీ జైళ్లలో రామాలయ ప్రాణప్రతిష్ట ప్రత్యక్ష ప్రసారం..

యూపీలోని జైళ్లలో రామమందిర ప్రాణప్రతిష్ఠ ప్రత్యక్ష ప్రసారమవుతుంది. జైళ్లలో దీపోత్సవం కూడా ఉంటుంది. తద్వారా ఖైదీలు కూడా ఈ కార్యక్రమాన్ని ప్రత్యక్షంగా వీక్షించవచ్చు. యూపీ జైళ్ల శాఖ మంత్రి ధరమ్‌వీర్ ప్రజాపతి జైలర్లందరికీ ఈ మేరకు ఆదేశాలు జారీ చేశారు.

అయోధ్య : దేశంలోని రామభక్తులంతా వందల సంవత్సరాలుగా ఎదురుచూస్తున్న ఆ చారిత్రాత్మక రోజు జనవరి 22న రాబోతోంది. ఆ రోజున రామనగరి అయోధ్యలో కోట్లాది మంది ప్రజల ఆరాధ్యుడైన శ్రీరాముని ప్రాణప్రతిష్ట జరగనుంది. ప్రపంచం మొత్తం ఈ క్షణాలకోసం ఎదురు చూస్తుంది. ఈ నేపథ్యంలో ఉత్తరప్రదేశ్‌లోని యోగి ప్రభుత్వం పెద్ద చొరవ తీసుకుంది. యూపీలోని జైళ్లలో రామమందిర ప్రాణప్రతిష్ఠ ప్రత్యక్ష ప్రసారం చేయనుంది. తద్వారా ఖైదీలు కూడా ఈ కార్యక్రమాన్ని ప్రత్యక్షంగా వీక్షించవచ్చు, ఇందులో భాగస్వాములు కావచ్చు. జైళ్లలో దీపోత్సవాన్ని కూడా నిర్వహిస్తారు. 

జైళ్లలో రామమందిర ప్రాణప్రతిష్ట ప్రత్యక్ష ప్రసారం..
ఉత్తరప్రదేశ్ జైళ్ల శాఖ మంత్రి ధరమ్‌వీర్ ప్రజాపతి రాష్ట్రంలోని పెద్ద జైళ్లను సందర్శించారు. ఈ జైళ్లలో రామమందిర ప్రాణప్రతిష్ఠను ప్రత్యక్ష ప్రసారం చేయాలని అధికారులను ఆదేశించారు. అంతే కాదు జైలులో ఉన్న ఖైదీలకు పోలీసులు హనుమాన్ చాలీసా, సుందర్‌కాండ పుస్తకాలను పంపిణీ చేస్తారు. ఖైదీలు కూడా ఈ రోజున దేవుడిని పూజించవచ్చు. జైళ్లలో భక్తి వాతావరణం నెలకొల్పేందుకు అన్ని జైళ్లలో దీపోత్సవ్ కార్యక్రమాన్ని నిర్వహిస్తామన్నారు.

ప్రాణ ప్రతిష్ట సందర్భంగా జైలు నుంచి ఖైదీల విడుదల
ఉత్తరప్రదేశ్ జైళ్లశాఖ మంత్రి ధరమ్‌వీర్ ప్రజాపతి అలీఘర్ జిల్లా జైలును తనిఖీ చేశారు. ఈ సందర్భంగా జైలులో శిక్ష అనుభవిస్తున్న 10 మంది ఖైదీలను విడుదల చేయాలని మంత్రి ఆదేశించారు. జరిమానా చెల్లించలేక ఏళ్ల తరబడి ఇక్కడ జైలు శిక్ష అనుభవిస్తున్న ఖైదీలను ఈ సందర్భంగా విడుదలయ చేశారు.  జనవరి 22 దేశానికే కాకుండా ప్రపంచానికి గొప్ప రోజు అని మంత్రి అన్నారు. ఆ రోజు శ్రీరాముడు అయోధ్యకు తిరిగి వస్తాడని చెప్పారు.