పంజాబ్ స్వర్ణదేవాలయం సమీపంలో పేలుడు: ఐదుగురు అరెస్ట్

పంజాబ్ రాష్ట్రంలోని స్వర్ణ దేవాలయం సమీపంలో  ఇవాళ తెల్లవారుజామున పేలుడు  చోటు  చేసుకుంది.  ఇందుకు కారణంగా భావిస్తున్న ఐదుగురిని  పోలీసులు అరెస్ట్  చేశారు.

న్యూఢిల్లీ: పంజాబ్ రాష్ట్రంలోని  అమృత్‌సర్ స్వర్ణ దేవాలయం  సమీపంలో  గురువారం నాడు తెల్లవారుజామున  పేలుళ్లు చోటు  చేసుకున్నాయి . ఈ పేలుళ్లకు  పాల్పడినట్టుగా అనుమానిస్తున్న ఐదుగురిని పోలీసులు  అరెస్ట్  చేశారు.స్వర్ణ దేవాలయం సమీపంలో వారం రోజుల వ్యవధిలో  పేలుళ్లు చోటు  చేసుకోవడం ఇది మూడోసారి.  గురువారంనాడు  తెల్లవారుజామున  12:30 గంటల సమీపంలో  పేలుళ్లు  చోటు  చేసుకున్నాయి.

 ఈ పేలుడుకు  కారణంగా  భావిస్తున్న  ఐదుగురిని పంజాబ్ పోలీసులు  ఇవాళ  అరెస్ట్  చేశారు.  శాంతి భద్రతలకు  విఘాతం కల్గించడమే లక్ష్యంగా  పేలుళ్లకు పాల్పడ్డారిన  పోలీసులు  చెప్పారు. పేలుడు  జరిగిన  ప్రాంతానికి సమీపంలోని గదిలో  నిందితులుగా  అనుమానిస్తున్న ఐదుగురిలో ముగ్గురు ఉన్నారని పోలీసులు  చెబుతున్నారు. ఈ ముగ్గురిలో  ఇద్దరు పురుషులు. ఒకరు మహిళగా  పోలీసులు  పేర్కొన్నారు.  పేలుడుకు పొటాషియం  క్లోరేట్ ను  ఉపయోగించారని పోలీసులు  చెప్పారు.

ఈ నెల 6, 8 తేదీల్లో  స్వర్ణ దేవాలయం సమీపంలో పేలుళ్లు చోటు  చేసుకున్నాయి. ఈ నెల  8వ తేదీ పేలుడు తర్వాత  ఈ ఘటనపై  ఎన్ఐఏ  విచారణ నిర్వహిస్తుంది.  ఈనెల  6వ తేదీన  జరిగిన పేలుడులో  ఒకరు  గాయపడ్డారు. పేలుడు ధాటికి సమీపంలోని  ఇళ్ల అద్దాలు ధ్వంసమయ్యాయి.ఈ నెల  8వ తేదీన జరిగిన  పేలుడులో మరో వ్యక్తి గాయపడ్డారు.