సైనిక నిధుల్లో కోత.. ప్రభుత్వ నిర్ణయంపై అభ్యంతరం వ్యక్తం చేసిన పార్లమెంటరీ ప్యానెల్

వచ్చే ఆర్థిక సంవత్సరంలో బడ్జెట్ కేటాయింపుల్లో సైనిక నిధుల్లో కోత విధించడాన్ని రక్షణ శాఖ పార్లమెంటరీ స్థాయీ సంఘం తప్పుపట్టింది. ప్రస్తుతం పక్క దేశాలతో ఉన్న పరిస్థితుల్లో ఇలాంటి నిర్ణయం సరైందని కాదని తెలిపింది. 

న్యూఢిల్లీ : పొరుగు దేశాలతో ప్రస్తుతం నెలకొన్న ఉద్రిక్తతల పరిస్థితిని నేపథ్యంలో సైనిక నిధులను తగ్గించడంపై ర‌క్ష‌ణ శాఖ పార్లమెంటరీ స్థాయీ సంఘం అభ్యంత‌రం తెలిపింది. సాయుధ దళాలకు తగిన బడ్జెట్ కేటాయింపులు తప్పనిసరిగా అందుబాటులో ఉంచాలని ప్యానెల్ నొక్కి చెప్పింది, నిధుల తగ్గింపు నిర్ణయం రక్షణ సేవల కార్యాచరణ సంసిద్ధతకు రాజీ పడుతుందని తెలిపింది

బుధవారం లోక్‌సభలో పార్లమెంటరీ స్థాయీ సంఘం త‌న నివేదికను స‌మ‌ర్పించింది. ఇందులో ప్ర‌భుత్వం 2022-23 ఆర్థిక సంవత్సరానికి గాను మూలధనం కింద రూ. 2,15,995 కోట్ల డిమాండ్‌ను అంచనా వేయగా రూ. 1,52,369.61 కోట్లు మాత్ర‌మే కేటాయించినట్లు కమిటీ పేర్కొంది. మూలధన వ్యయం కోసం మూడు సేవల డిమాండ్, బడ్జెట్ కేటాయింపుల మధ్య అంతరంపై ఆందోళన వ్యక్తం చేసిన ప్యానెల్, రాబోయే సంవత్సరాల్లో ఖర్చులో ఎలాంటి తగ్గింపు చేయకూడదని రక్షణ మంత్రిత్వ శాఖను కోరింది.

2022-23లో బడ్జెట్ అంచనా దశలో, ఆర్మీ, నేవీ, వైమానిక దళం కోసం అంచనా వేసిన, కేటాయించిన బడ్జెట్ మధ్య వ్యత్యాసం వరుసగా రూ.14,729.11 కోట్లు, రూ. 20,031.97 కోట్లు,  రూ. 28,471.05 కోట్లు గా ఉందని, ఇవి అసాధారణంగా ఎక్కువ అని తెలిపింది. ప్రస్తుతం మన పొరుగు దేశాలతో ముఖ్యంగా మన దేశ సరిహద్దుల వద్ద ఉద్రిక్తతలు పెరుగుతున్న నేపథ్యంలో రక్షణ సన్నద్ధతకు ఇలాంటి పరిస్థితి అనుకూలించదని ప్యానెల్ చెప్పింది. 

బీజేపీ ఎంపీ జుయల్ ఓరమ్ నేతృత్వంలోని కమిటీలో కాంగ్రెస్ ఎంపీ రాహుల్ గాంధీ, నేషనలిస్ట్ కాంగ్రెస్ పార్టీ (NCP) అధినేత శరద్ పవార్ సహా దాదాపు 30 మంది స‌భ్యులు ఈ ప్యానెల్ లో ఉన్నారు. 
క్యాపిటల్ బడ్జెట్‌ను నాన్-లాప్సబుల్, రోల్-ఆన్ స్వభావంతో రూపొందించాలని సిఫార్సు చేసింది. నాన్ ల్యాప్సబుల్ డిఫెన్స్ ఆధునీకరణ నిధికి సంబంధించిన ముసాయిదా క్యాబినెట్ నోట్ పరిశీలనలో ఉందని కమిటీ తెలిపింది. 2020-21లో మొత్తం రూ. 3,43,822.00 బడ్జెట్ కేటాయింపులో డిసెంబర్ 2020 వరకు మంత్రిత్వ శాఖ కేవలం ₹2,33,176.70 మాత్రమే వినియోగించిందని కమిటీ చెప్పింది. 

భారత వైమానిక దళం (IAF) రెండు ఫ్రంట్ డిటరెన్స్ సామర్థ్యాలను కలిగి ఉండాలని ప్యానెల్ చెప్పింది. ఇది అత్యంత ప్రాధాన్యత కలిగినదని, ఎందుకంటే భారతకు పొరుగున్న ఇరువైపులా ఉన్న పాకిస్థాన్, చైనా నుంచి ముప్పు ఉంద‌నేది విస్మరించలేని వాస్తవం అని తెలిపింది. సాధ్యమయ్యే అన్ని పోరాట సామర్థ్యాలతో మన సాయుధ బలగాలను సన్నద్ధం చేయడం ప్రస్తుతం అవసరం అని తెలిపింది. IAF తన పోరాట సామర్థ్యాలను పెంచుకోవడానికి సమీప భవిష్యత్తులో కొత్త విమానాలను కొనుగోలు చేయాలని కూడా కమిటీ సూచించింది.

ఫైటర్ స్క్వాడ్రన్ బలాన్ని కేవలం విమానాల సంఖ్యపై మాత్రమే లెక్కించలేమని, వాటి ఆయుధాన్ని మోసుకెళ్లే సామర్థ్యం, ​ఎగరడం, దాడి చేసే పరిధిని కూడా లెక్కించలేమని కమిటీ అభిప్రాయపడింది. అందువల్ల మందుగుండు సామగ్రి, టెక్నాలజీ విషయంలో ఎలాంటి రాజీపడకూడదు అని తెలిపింది.