వఝల శివకుమార్ కవిత: పూనిక
By telugu team | First Published Oct 11, 2019, 2:58 PM ISTప్రముఖ తెలుగు కవిత వఝల శివకుమార్ పూనిక పేర ఓ కవిత రాశారు.బరిలోకి దూకి/ పనిగా పరిణతించడానికి/ సంకల్పధారిలా/ పట్టుదలకు పుట్టువడిచ్చే/ సంలగ్న సంభావికలా పూనిక కావాలని అంటున్నాడు శివకుమార్.
ఒక పూనిక కావాలి
నిర్ధారణగా నిలకడైన నిశ్చయంలా
బరిలోకి దూకి
పనిగా పరిణతించడానికి
సంకల్పధారిలా
పట్టుదలకు పుట్టువడిచ్చే
సంలగ్న సంభావికలా..
చినుకుల దారాలతో
నేలకు పచ్చికను కుట్టాలి
కొంతయినా చెమ్మగిల్లి చెట్టు దేహానికి
హరిత కాంతిని తొడగాలి
నీరదాల రాగ మథనంలో
సాధనకు రక్తిమ నద్దాలి
శృతిపీకలా సన్నాయితో
ఊపిరిని సంధానించినట్టు
ఊహకు ఉనికిని నిర్ధారించాలి
Latest Videos
undefined
ఎలుకను పట్టడానికీ
దాని చీకటి దందా కు చెక్ పెట్టడానికి
పిల్లి మెడలో గంట కట్టడానికి
దాని దొంగాటకం కనిపెట్టడానికీ
కుక్కను తరమడానికి
కరుస్తుందని తెలిశాక కొట్టడానికీ
కుక్క రాజుదయినా తరాజుదైనా
నిర్ణయంగా కొంత నిర్దయగా
కర్ర చేతిలోకి తీసుకోవడానికి
ఒక పూనిక కావాలి
పట్టీ లేని కాలక్షేపం
కదిలే శవంతో సావాసం
నాకేంటని వదిలేసిన సమయాలే
మెడ చుట్టూ బిగుసుకుంటున్నప్పుడు
ఏ దేవుడూ ఉన్న పళంగా
అననుకూలాలు దిద్దడు
కొత్త దృష్టినీ ఇవ్వడు.
గమనించి కడిగేసుకుంటూ
చూపు సారించి సాగిపోవాలి
బతికున్న గుర్తుగా వేగిపోవాలి
ఏదైనా మాట్లాడచ్చు నరం లేని కదలిక కదా మాటగా పెగలడానికి మనసు ప్రమేయం
మనసుగా స్పందించటానికి మట్టి ఆత్మ
ఇప్పుడు మాటను బతికించుకునే మహాయజ్ఞం సాగాలి.
గాలివాటు ఆట లొసుగుల లొంగుబాట
దాటేసిన గీత మాటేసిన నీడ
ఎవడో ప్రశ్నించడు
సమాధానంగా నిలబడాలని ఆశిస్తడు
సంభాషించు ఎదకు దగ్గరగా
కన్నీళ్ళని సమీకరించేటంత బిగ్గరగా
- వఝల శివకుమార్
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి