వారాల ఆనంద్ కవిత : నేనూ- నా ఇల్లూ
By Arun Kumar P | First Published Jan 22, 2023, 10:15 AM ISTనేనేమో నా ఇంట్లోనే పరాయితనాన్ని చాపలా పరుచుకుని భయం భయంగా నక్కి నక్కి కాల్రెక్కలు ముడుచుకుని కూర్చున్నా అంటూ వారాల ఆనంద్ రాసిన కవిత "నేనూ- నా ఇల్లూ " ఇక్కడ చదవండి :
ఇంటి ముందు వాకిలి లేదు
వెనకాల పెరడూ లేదు
నాలుగు గోడల నడుమ స్థలానికి
పునాదుల్లేవు
తలెత్తి చూస్తే పై కప్పూ నాది కాదు
దేనికీ ఎలాంటి హామీ లేదు
Latest Videos
undefined
ఇంట్లో గాలి ఆడదు
అంతా వై ఫై పరుచుకుని వుంటుంది
అందరూ ఎవరి గదుల్లో వాళ్ళుంటారు
ఆశలు తిరుగుతూ వుంటాయి
కోరికలు కేరింతలు కొడుతూ వుంటాయి
అందరి నడుమా
మౌనం వేలాడుతూ వుంటుంది
గోడలకు మాటలు ఉరి పోసుకుంటాయి
అలారం మోతల్లాగా
సెల్లులు మోగుతూ వుంటాయి
వాట్స్ అప్ పలకరింపులూ
ఇన్ స్టాగ్రామ్ పోస్టులు మెరుస్తూ వుంటాయి
యు ట్యూబులూ, ఓ టి టి లు నాట్యమాడుతూనే వుంటాయి
‘నగరం’ నా ఇంట్లోకి చొచ్చుకొచ్చింది
వస్తూ వస్తూ
ప్రపంచాన్ని తన పిడికిట్లో బిగించి
నట్టింట్లో కుప్ప బోసింది
నేనేమో నా ఇంట్లోనే
పరాయితనాన్ని చాపలా పరుచుకుని
భయం భయంగా నక్కి నక్కి
ఓ మూలన
కాల్రెక్కలు ముడుచుకుని కూర్చున్నా
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి