డాక్టర్ సిద్దెంకి యాదగిరి కవిత : జలదృశ్యం
By Arun Kumar P | First Published Jul 27, 2022, 4:44 PM ISTజలఖడ్గానికి జ్ణాపకాలు విచ్చిన్నమవుతాయి అంటూ సిద్దిపేట నుండి డాక్టర్ సిద్దెంకి యాదగిరి రాసిన కవిత " జలదృశ్యం " లో చదవండి
బీడు పారిన భూమ్మీద
ఎదురుచూసే మూగ జీవాల గోస చూడక
తల్లడిల్లుతున్న ఆకాశం ద్రవిస్తున్న హృదయ ఘోష
ఎడతెగక కురుస్తున్న కన్నీరే దు:ఖ వర్షమై
ఆయువు పోస్తున్న అపర బ్రహ్మ
ఏ జీవి భూమ్మీద అంతరించదనీ
చిల్లులు పడ్డ గగనం
నిండే జలాశయమై
నిశ్శబ్ధంగా వాగ్ధానం చేస్తుంటది
Latest Videos
undefined
సముద్రాన్ని ఎత్తిపోస్తున్న మొగులు
నిరంతరం మహా జలపాతమై పరవళ్ళు దోక్కుతుంటే
నేల నిత్య బాలెంత
వాన మంచిదే
ముంచేదే అతివృష్టి
జల పిడుగుతో హత్య గావించబడ్డ పంట
బతికిన రైతునూ చంపుతుంటది
గాలితో అరిచి కేకేస్తే గుడిసె బతుకు సమాధి
కళకళలాడే ఊల్లూ జలమయం
జలఖడ్గానికి జ్ణాపకాలు విచ్చిన్నమవుతాయి
మిగిల్చిన బాధ జీవితకాలం షాక్
వానమ్మా!
సాలేటి వానకు భూమి పులకించాలే
ప్రకృతి పరిమళించాలే
బతుకులు వికసించాలే
ప్రవాహం చర్నాకోలతో పెట్టే వాతలూ వద్దు
తల రాతలు మార్చి రాసే
కుండపోతా వద్దు
జరామర్ణాలు నీ ఆధీనంలో ఉన్న ఓ వాన ......
మా బతుకంతా జల దృశ్యమే...
సజీవ కావ్యమే
(ఒడవని వానకు...)
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి