పొట్లపల్లి శ్రీనివాసరావు కవిత : జ్ఞాపకాల జాతర
By Siva Kodati | First Published Jan 7, 2023, 2:05 PM ISTఅమ్మ ఒడి లాలింపులా ఇల్లంటె ఒక పేగు బంధం అంటూ హన్మకొండ నుండి పొట్లపల్లి శ్రీనివాసరావు రాసిన కవిత " జ్ఞాపకాల జాతర " ఇక్కడ చదవండి :
పేదోడి పూరి గుడిసె
పెద్దోడి ఇంద్ర భవనం
ఎటూ కానోడి అప్పిల్లు
మట్టి ముట్టినోడికి ముట్టనోడికి
చివరాఖరి ఊపిరి కన్నా ముందే
మట్టి వాసన తెలిపే విశ్రాంత సౌధం
అందరూ తలదాచుకునే చోటు
Latest Videos
undefined
కూడికల తీసివేతల గుణింపుల భాగహారంలో
నిండు సున్నాకు కుడి ఎడమల ఎందరెందరో
శక్తి కొద్ది స్వప్నించి సేద తీరే తపనతో
నిర్మించుకొని నిదురించే స్వేచ్ఛా తీరం
చెమట చుక్కల పనితనంతో మెరిసే నిర్మాణం
పునాదులపై పేర్చే ఇటుక మీద ఇటుకను
ఇసుక సిమెంటు కలగలసి ఇటుక బంధంతో
జతకలసి ఇనుమూ కంకరకూ మరింత ధైర్యాన్నిస్తూ
బ్రతికినంత కాలం తోడైనీడై జీవించే ప్రాణ మిత్రులు
సుతిమెత్తని తీవెలతో అల్లిబిల్లిగా అల్లుకుని
పూచిన గుమ్మడి పూల అందాలు
పచ్చదనపు జాతరై లతలుా క్రోటన్లుా
మిద్దె మీద కొలువుదీరే ఆకుపచ్చని బంధాలు
కుటుంబం కుటుంబం అంతా పెనవేసుకు సాగే
ఎడతెగని వూసుల మమకారాల మధువనిలా
వారసత్వపు వాత్సల్యపు జ్ఞాపకాల కూడలి
అమ్మ ఒడి లాలింపులా ఇల్లంటె ఒక పేగు బంధం
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి