గోపగాని రవీందర్ కవిత: మాతృభాషకు జేజేలు..!
By Pratap Reddy Kasula | First Published Feb 21, 2022, 4:52 PM ISTనేడు అంతర్జాతీయ మాతృభాషా దినోత్సవం సందర్భంగా గోపగాని రవీందర్ రాసిన కవిత "మాతృభాషకు జేజేలు..!" ఇక్కడ చదవండి
రమణీయ కమనీయమైన
మాటలతో ఆకట్టుకునేది
పదాల సరిగమలతో
స్నేహ మాధుర్యాన్ని పంచేది
ఆనందపు ఉషస్సులను అందించే
మాతృ భాషకు జేజేలు..!
భావానికి భావానికి మధ్యన
మనిషికి మనిషికి మధ్యన
మనసుకు మనసుకు మధ్యన
ప్రాంతానికి ప్రాంతానికి మధ్యన
కట్టుదిట్టమైన వారధిగా నిలిచిన
మాతృభాషకు జేజేలు..!
Latest Videos
మనసంతా పచ్చని పందిరిలా
హృదయమంతా విచ్చుకున్న మందారంలా
ఆకాశమంతా పరుచుకున్న మబ్బుల్లా
అడవంతా వికసించిన పువ్వుల్లా
అల్లుకుపోయే వసంత గానమైన
మాతృభాషకు జేజేలు..!
ఆత్మగౌరవానికి నిలువెత్తు రూపం
ఆత్మవిశ్వాసానికి కరదీపిక
అలుపెరుగని పోరాటానికి ఊపిరి
నవరసాల జల్లు కురిసే అక్షరవనం
సాహిత్య సంపదలతో ప్రవహించే
జీవద్భాషైన మాతృభాషకు జేజేలు..!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి