అన్నవరం దేవేందర్ కవిత: ఆధిపత్యం
By telugu team | First Published Sep 5, 2021, 4:08 PM ISTసకల ఆధిపత్యాలను దిక్కరిస్తేనే ధీరత్వం అని కరీంనగర్ నుండి అన్నవరం దేవేందర్ అందిస్తున్న కవిత 'ఆధిపత్యం' ఇక్కడ చదవండి.
ఆధిపత్య అంకురానికి ఆదినుంచే పైత్యం
మొలకెత్తిన చిగుర్లకు అహం వాసన
రెమ్మ రెమ్మలుగా విస్తరించిన ముళ్ళ తీగ
కడప లోపలే మొదలవుతుంది ప్రతాపం
తొలుత మగ పురుగు రూపంలోనే తొలుస్తది
గాయమైతది కానీ నెత్తురు తెలువది
Latest Videos
పెనిమిటి ఎట్లాగూ పెత్తతనపు మారుపేరు
అధికారం అత్త రూపంలోని అగ్రహ స్వరం
ఓరిమితో ఒదిగినా నెత్తి మీద ఒత్తిడి
పని చేసే చోట పైవాడొక పచ్చని సర్పం
మాట మాటల్లోనూ బుస బుసల కాలుష్యం
అన్ని కార్యాలయాలూ మగనీతుల నిచ్చెన మెట్లు
పెద్దతనపు గౌరవం గానుగెద్దు వర్తులం
మర్యాదల రూపం భుజం దిగని దాసోహం
ఆలోచనల స్వేచ్ఛకు తరతరాల ఆటంకం
దాచి ఉంచేందుకే ఆచారమైన వ్యూహం
ఆచరిస్తున్నంత వరకే పరంపరల పర్వం
స్వతంత్ర ధార మొదలైతే పటాపంచలే
సకల ఆధిపత్యాలను దిక్కరిస్తేనే ధీరత్వం.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి