జాబ్ లోంచి తీసేశారని.. ఏకంగా షాపునే కూలగొట్టాడు..

తనను జాబ్ నుంచి తొలగించారనే కోపంతో ఓ ఉద్యోగి చేసిన పని ఆ షాపుకు భారీ నష్టాన్ని తెచ్చిపెట్టింది. నార్త్ కరోలినాలోని వాల్ మార్ట్ ఉద్యోగి చేసిన నిర్వాకం ఇది. తన కారుతో ఏకంగా షాపింగ్ మాల్ లోకి దూసుకెళ్లాడు. 

అమెరికాలోని నార్త్ కరోలినా థండర్ రోడ్ లోని వాల్ మార్ట్ లో ఈ ఘటన జరిగింది. లాసీ కార్డెల్ జెంట్రీ (32) అనే వ్యక్తి ఈ నిర్వాకానికి పాల్పడ్డాడు. వాల్ మార్ట్ లోకి కారుతో దూసుకెళ్లిన లాసీ కార్డెల్.. మార్ట్ లోని వినియోగదారులను భయబ్రాంతులకు గురి చేశాడు. 

ఈ ఘటనలో మాల్ ఎంట్రెన్స్ తో పాటు లోపలి కొంత భాగం స్వల్పంగా దెబ్బతింది. దీంతో వెంటనే మాల్ సిబ్బంది పోలీసులకు సమాచారం అందించారు. వారి సమాచారంతో మార్ట్ కు చేరుకున్న పోలీసులు లాసీ కార్డెల్ ను అదుపులోకి తీసుకుని కటకటాల్లోకి నెట్టారు. ఈ ఘటన నేపథ్యంలో కొద్దిసేపు షాపింగ్ మాల్ దగ్గర ఉద్రిక్త వాతావరణం నెలకొంది.