ఇండోనేషియాలోని జైలులో బుధవారం నాడు జరిగిన అగ్ని ప్రమాదంలో 40 మంది ఖైదీలు మరణించారు. మరో 73 మంది స్వల్పంగా గాయపడ్డారు. బాంటెన్ ప్రావిన్స్ లోని జైలులో అగ్ని ప్రమాదం చోటు చేసుకొంది.
జకార్తా:ఇండోనేషియాలోని ఓ జైలులో బుధవారం నాడు తెల్లవారుజామున సంబవించిన అగ్ని ప్రమాదంలో 40 మంది ఖైదీలు మృతి చెందారు. ఇండోనేషియాలోని బాంటెన్ ప్రావిన్స్ లోని ఓ జైలులో కనీసం 40 మంది మరణించారు. పలువురు ఈ ఘటనలో గాయపడ్డారు.
బుధవారం నాడు తెల్లవారుజామున 1 నుండి రెండు గంటల మధ్య జైలులో అగ్ని ప్రమాదం సంబవించింది. ఈ విషయాన్ని గుర్తించిన ఫైరింజన్లు మంటలను ఆర్పినట్టుగా మానవహక్కుల మంత్రిత్వశాఖ జైలు విభాగం ప్రతినిధి రికా అప్రియంతి చెప్పారు.
ఈ అగ్ని ప్రమాదం జరిగిన సమయంలో మంటలు వ్యాపించిన గదిలో 122 మంది ఖైదీలున్నారు. ఈ అగ్ని ప్రమాదానికి గల కారణాలపై విచారణ చేపట్టినట్టుగా ఆమె తెలిపారు. టాంగెరాంగ్ జైలులో రెండువేల మంది ఖైదీలున్నారు. జైలు సామర్ధ్యం 600 మంది కంటే ఎక్కువ. అయితే ఈ ఘటన చోటు చేసుకొన్న సమయంలో జైలు సామర్ధ్యం కంటే ఎక్కువగానే ఉన్నారని అధికారులు చెప్పారు.ఈ ఘటనలో సుమారు 73 మంది స్వల్పంగా గాయపడ్డారని స్థానిక మీడియా తెలిపింది. విద్యుత్ షార్ట్ సర్క్యూట్ కారణంగానే అగ్ని ప్రమాదం చోటు చేసుకొందని అధికారులు అనుమానిస్తున్నారు.