Bakrid 2026 : తెలుగు రాష్ట్రాల్లో బక్రీద్ ఎప్పుడు.. బుధవారమా, గురువారమా?

ఇస్లాం మతంలో అత్యంత ముఖ్యమైన పండుగల్లో ఈద్ అల్-అధా (బక్రీద్) ఒకటి. ఈ పండగను ముస్లింలు ఎంతో ఘనంగా జరుపుకుంటారు. అయితే ఈసారి బక్రీద్ పై కన్ఫ్యూజన్ కొనసాగుతోంది. 

బక్రీద్ ఎప్పుడు..?

ముస్లింల పండుగలు సాధారణ క్యాలెండర్ ప్రకారం కాదు ఇస్లామిక్ క్యాలెండర్ ప్రకారం ఉంటాయి. అంతేకాదు ప్రతి పండగను నెలవంక (చంద్రుడి) దర్శనం ఆధారంగా జరుపుకుంటారు. అందుకే ముందురోజు వరకు ముస్లింల పండగలపై క్లారిటీ ఉండదు.

ఒక్కో దేశంలో నెలవంక దర్శనం ఒక్కోలా ఉంటుంది. అందుకే ఇస్లామిక్ దేశాల్లో ఒకరోజు, ఇండియాలో మరోరోజు పండగలు జరుగుతుంటాయి. ఈసారి బక్రీద్ కూడా అలాగే జరిగేలా ఉంది. తెలుగు రాష్ట్రాల్లో బక్రీద్ ఎప్పుడో తెలుసా..? 

తెలుగు రాష్ట్రాల్లో బక్రీద్ సెలవు ఎప్పుడు..?

తెలంగాణ, ఆంధ్ర ప్రదేశ్ ప్రభుత్వాలు ఈ ఏడాది ఆరంభంలోనే సెలవుల జాబితాను ప్రకటించాయి. ఇరు రాష్ట్రాల హాలిడే క్యాలెండర్లలోనూ బక్రీద్ మే 27న అంటే ఈ బుధవారమే ఉంది. కానీ నెలవంక దర్శనం ఆధారంగా మే 27న కాదు మే28న బక్రీద్ జరుపుకునే అవకాశాలున్నాయి... ముస్లిం మతపెద్దలు కూడా గురువారమే పండగ జరుపుకోవాలని నిర్ణయించినట్లు తెలుస్తోంది. ఈ క్రమంలో మే 28న బక్రీద్ సెలవు ఉండే అవకాశాలున్నాయి.

బక్రీద్ ప్రత్యేకత ఏంటి..?

ఈద్ అల్-అధా (బక్రీద్) ను 'త్యాగాల పండుగ' అని కూడా పిలుస్తారు. దేవుడి ఆదేశం మేరకు ప్రవక్త ఇబ్రహీం తన కుమారుడిని త్యాగం చేయడానికి సిద్ధపడిన సంఘటనను ఈ పండగ గుర్తు చేస్తుంది. ఈ సందర్భంగా ముస్లింలు ప్రత్యేక ప్రార్థనలు, ఖుర్బానీ (బలి), దానధర్మాలు, కుటుంబ సభ్యులతో వేడుకలు చేసుకుంటారు.

భారతదేశవ్యాప్తంగా ముస్లింలు మసీదులు, ఈద్గాలలో ప్రార్థనలు చేస్తారు. సంప్రదాయ వంటకాలు, స్వీట్లు తయారుచేసి కుటుంబ సభ్యులు, స్నేహితులతో పాటు నిరుపేదలకు పంచుతారు. ఇలా అనేకమంది ఆకలిబాధను తీర్చే పండగ బక్రీద్… కేవలం అహారమే కాదు ఇతర వస్తువులు కూడా పేదలకు దానం చేస్తారు. ఇలా పేదవారికి సహాయం, దానధర్మాలు చేస్తూ మానవత్వాన్ని చాటే పండగ బక్రీద్.