IBPS SO 2025: బ్యాంకులో 1007 స్పెషల్ ఆఫీసర్ పోస్టులు...డిగ్రీ ఉంటే చాలు

IBPS తాజా నోటిఫికేషన్ ద్వారా 1007 స్పెషలిస్ట్ ఆఫీసర్ పోస్టులు భర్తీ. అర్హతలు, వయో పరిమితి, దరఖాస్తు ప్రక్రియ వివరాలు  ఈ కథనంలో…

స్పెషలిస్ట్ ఆఫీసర్

దేశంలోని ప్రభుత్వ రంగ బ్యాంకుల్లో స్పెషలిస్ట్ ఆఫీసర్ ఉద్యోగాల భర్తీకి సంబంధించిన నోటిఫికేషన్‌ను ఐబీపీఎస్ తాజాగా విడుదల చేసింది. భారతీయ బ్యాంకింగ్ సెక్టార్‌లో స్థిరమైన ఉద్యోగం కోసం ఎదురు చూస్తున్న అభ్యర్థులకు ఇది మంచి అవకాశం. మొత్తం 1007 ఖాళీలను ఈ నోటిఫికేషన్ ద్వారా భర్తీ చేయనున్నట్లు అధికారికంగా వెల్లడించారు.

ఐటీ ఆఫీసర్లు

ఈ నియామక ప్రక్రియను ఇన్‌స్టిట్యూట్ ఆఫ్ బ్యాంకింగ్ పర్సనల్ సేలక్షన్ (IBPS) నిర్వహిస్తోంది. ఇందులో భాగంగా కెనరా బ్యాంక్, ఇండియన్ బ్యాంక్, బ్యాంక్ ఆఫ్ బరోడా, బ్యాంక్ ఆఫ్ మహారాష్ట్ర, సెంట్రల్ బ్యాంక్ ఆఫ్ ఇండియా, యూనియన్ బ్యాంక్ ఆఫ్ ఇండియా వంటి ప్రముఖ ప్రభుత్వ రంగ బ్యాంకుల్లో ఖాళీలను పూరించనున్నారు.

ఇందులో ఐటీ ఆఫీసర్లు, వ్యవసాయ ఫీల్డ్ ఆఫీసర్లు, లా ఆఫీసర్లు, రాజ్‌భాషా ఆఫీసర్లు, హెచ్ఆర్/పర్సనల్ ఆఫీసర్లు, మార్కెటింగ్ ఆఫీసర్లు వంటి విభాగాల్లో పోస్టులు ఉన్నాయి.

పోస్టుల వివరాలు:

అత్యధికంగా వ్యవసాయ రంగానికి చెందిన ఫీల్డ్ ఆఫీసర్ పోస్టులు ఉన్నాయి. మొత్తం 310 ఖాళీలు ఉండగా, వీటికి అగ్రికల్చర్, హార్టికల్చర్, వెటర్నరీ, ఫిషరీస్, అగ్రో ఫారెస్ట్రీ వంటి విభాగాల్లో గ్రాడ్యుయేషన్ పూర్తిచేసినవారు అర్హులు.

ఐటీ విభాగంలో 203 పోస్టులు ఖాళీగా ఉన్నాయి. కంప్యూటర్ సైన్స్, ఇన్ఫర్మేషన్ టెక్నాలజీ, ఎలక్ట్రానిక్స్, టెలికమ్యూనికేషన్స్ వంటి ఇంజనీరింగ్ కోర్సులు చేసినవారికి అవకాశం ఉంది.

మార్కెటింగ్ విభాగంలో 350 ఖాళీలు

మార్కెటింగ్ విభాగంలో 350 ఖాళీలు ఉన్నాయి. ఇందులో ఎంబీఏ (మార్కెటింగ్), పీజీడీబీఎం, పీజీడీపీఎం వంటి కోర్సులు పూర్తిచేసినవారు దరఖాస్తు చేసుకోవచ్చు.

రాజ్‌భాషా ఆఫీసర్ పోస్టులు 78 ఉన్నాయి. హిందీలో పోస్టు గ్రాడ్యుయేషన్ ఉన్నవారు అర్హులు.

లాలో డిగ్రీ పూర్తి చేసిన వారికి 56 పోస్టులు అందుబాటులో ఉన్నాయి. బార్ కౌన్సిల్‌లో నమోదు అవసరం.

హెచ్ఆర్ విభాగానికి సంబంధించిన పోస్టులు 10 మాత్రమే ఉన్నాయి. కానీ సోషల్ వర్క్, పర్సనల్ మేనేజ్‌మెంట్, ఇండస్ట్రియల్ రిలేషన్స్ వంటి స్పెషలైజేషన్ ఉన్నవారు అర్హులు.

వయోపరిమితి వివరాలు:

ఈ ఉద్యోగాలకు దరఖాస్తు చేసుకునే అభ్యర్థులు 2025 జూలై 1 నాటికి కనీసం 20 సంవత్సరాలు, గరిష్ఠంగా 30 సంవత్సరాలు వయస్సు కలిగి ఉండాలి. అయితే ఎస్సీ, ఎస్టీ అభ్యర్థులకు 5 ఏళ్ళ వయో సడలింపు, ఓబీసీ అభ్యర్థులకు 3 సంవత్సరాలు, దివ్యాంగుల కోసం 10 సంవత్సరాల వరకు వయో  పరిమితి ఉంటుంది.

జీత వివరాలు:

ఈ స్పెషలిస్ట్ ఆఫీసర్ పోస్టులకు గల వేతన స్కేలు రూ. 48,480 ప్రారంభంగా ఉంటుంది. అనుభవంతో పాటు ప్రమోషన్ల ఆధారంగా జీతం రూ. 85,920 వరకు పెరుగుతుంది.

ఎంపిక ప్రక్రియ:

అభ్యర్థులను ఎంపిక చేయడంలో మూడు దశలు ఉంటాయి. మొదట ప్రిలిమినరీ పరీక్ష, తర్వాత మెయిన్ పరీక్ష, చివరగా ఇంటర్వ్యూకు పిలుస్తారు. మొదటి రెండు పరీక్షలు కంప్యూటర్ ఆధారితంగా (CBT) జరుగుతాయి. అభ్యర్థులు రాత పరీక్ష లేకుండానే దశలవారీగా ముందుకు వెళ్లవచ్చు.

మెయిన్ పరీక్షలో అర్హత సాధించిన అభ్యర్థులను సర్టిఫికెట్ వెరిఫికేషన్ తర్వాత ఇంటర్వ్యూకు పిలుస్తారు. ఇంటర్వ్యూలు 2026 ఫిబ్రవరి లేదా మార్చి నెలల్లో నిర్వహించే అవకాశముంది. మెయిన్ పరీక్ష, ఇంటర్వ్యూలో వచ్చిన మార్కుల ఆధారంగా తుది మెరిట్ జాబితా రూపొందించి, పోస్టులు కేటాయించనున్నారు.

దరఖాస్తు విధానం:

ఈ ఉద్యోగాలకు దరఖాస్తు ప్రక్రియ పూర్తిగా ఆన్‌లైన్ ద్వారా జరుగుతుంది. అభ్యర్థులు IBPS అధికారిక వెబ్‌సైట్ అయిన https://ibps.in లేదా https://ibpsreg.ibps.in/crpspxvjun25/ ద్వారా దరఖాస్తు చేయాలి.

దరఖాస్తు చేసుకునేందుకు చివరి తేదీ 2025 జూలై 21.

ఫీజు వివరాలు:

జనరల్, ఓబీసీ, ఈడబ్ల్యూఎస్ అభ్యర్థులకు దరఖాస్తు ఫీజు రూ. 850గా నిర్ణయించారు. ఎస్సీ, ఎస్టీ, పీడబ్ల్యూడి వర్గాల అభ్యర్థులకు ఇది రూ. 175 మాత్రమే.