Supreeth Reddy: కారు డ్రైవర్‍ ను చితకబాదిన ఛత్రపతి నటుడు కాట్రాజ్..వివాదంలో సుప్రీత్ రెడ్డి

Supreeth Reddy: ఛత్రపతి సినిమాలో కాట్రాజ్ గుర్తున్నాడా..ఎందుకు గుర్తుండరు...మర్చిపోయే క్యారెక్టరా అది. ఒక్క సీన్‍తో విపరీతమైన క్రేజ్ వచ్చింది. ఇప్పుడా కాట్రాజ్...ఓ క్యాబ్ డ్రైవర్ కొట్టి వివాదంలో ఇరుకున్నాడు. 

క్యాబ్ డ్రైవర్‍పై కాట్రాజ్ వీరంగం

తెరపై విలన్‌గా భయపెట్టిన కాట్రాజ్...రియల్ లైఫ్ లోనూ అదే ధోరణి కనిపించడం వివాదాస్పదంగా మారింది. చిన్న గొడవ చివరకు పోలీస్ స్టేషన్ వరకూ వెళ్లింది. కేసు కూడా నమోదైంది. ఇంతకీ ఆ విలన్ ఎవరూ అంటే...ఛత్రపతి సినిమాలో నటించిన కాట్రాజ్..సుప్రీత్ రెడ్డి.

పోలీసులు చెప్పిన ప్రకారం...శ్రీహరి అనే వ్యక్తి ఊబర్ నడుపుతుంటారు. ఆదివారం రోజూ తన ట్రిప్ ఫినిష్ చేసి మరో ట్రిప్ కోసం నాగారం చౌరస్తా సమీపంలో వెయిట్ చేస్తున్నాడు. ఇంతలో అటుగా వచ్చిన సుప్రీత్ రెడ్డి తనకు అడ్డంగా క్యాబ్ ఉందని కోపంలో ఊగిపోయాడు. ఆ ఆవేశంతో వెంటనే కారు దిగి క్యాబ్ డ్రైవర్‍తో వాగ్వాదానికి దిగారు.

ఆ చిన్న గొడవ కాస్తా ముదిరి వివాదానికి దారి తీసింది. అదే కోపంతో సుప్రీత్ రెడ్డి...తనను కొట్టి, తిట్టినట్లు క్యాబ్ డ్రైవర్ శ్రీహరి తెలిపారు. ఫోన్ కూడా తీసుకున్నారని...ఎంత బతిమాలినా ఇవ్వలేదని వాపోయారు. 20 నిమిషాల తర్వాత ఫోన్ ఇచ్చినట్లు చెప్పారు. ఆ తర్వాత పోలీస్ స్టేషన్ లో ఫిర్యాదు చేశారు.

సోషల్ మీడియాలో చర్చకు దారితీసిన వివాదం

కీసర పోలీసులు...క్యాబ్ డ్రైవర్ ఫిర్యాదుపై కేసు నమోదు చేశారు. ఘటనాస్థలిని పరిశీలించారు. సీసీటీవీ ఫుటేజీ కూడా సేకరించే పనిలో ఉన్నారు. విచారణలో భాగంగా సుప్రీత్ రెడ్డిని విచారించే అవకాశం ఉంది.

ఈ వ్యవహారం సోషల్ మీడియాలో కూడా పెద్ద చర్చకు దారితీసింది. సెలబ్రిటీలు సాధారణ ప్రజలతో మర్యాదగా వ్యవహరించాలని నెటిజన్లు అభిప్రాయపడుతున్నారు. మరోవైపు క్యాబ్ డ్రైవర్ల సంఘాలు కూడా ఈ ఘటనపై స్పందిస్తూ పూర్తి స్థాయి విచారణ జరిపి చర్యలు తీసుకోవాలని కోరుతున్నాయి.

సుప్రీత్ రెడ్డి టాలీవుడ్ ప్రజలకు తెలియని వ్యక్తేం కాదు. పవన కల్యాణ్ నటించిన జానీ సినిమాలో నటించారు. ఛత్రపతి సినిమాలో కాట్రాజ్ పాత్రతో గుర్తింపు వచ్చింది. ఆ తర్వాత మర్యాద రామన్న, దూకుడు, మిర్చి సినిమాలో నటించి ప్రేక్షకులను మెప్పించారు.