అటకెక్కిన సూర్య డ్రీమ్ ప్రాజెక్ట్.. అప్పట్లో ఎన్టీఆర్ చరిత్ర సృష్టించారు, ఇప్పుడు రాజమౌళికి మాత్రమే సాధ్యం

విలక్షణ నటుడు సూర్యకి తన కెరీర్ లో అతి పెద్ద ఎదురుదెబ్బ తగిలింది. ఎన్నో ఆశలు పెట్టుకున్న కంగువా చిత్రం బాక్సాఫీస్ వద్ద దారుణమైన డిజాస్టర్ గా నిలిచింది. నిర్మాత జ్ఞానవేల్ రాజా ఈ చిత్రంతో నష్టాల ఊబిలో చిక్కుకుపోయారు. 350 కోట్ల భారీ బడ్జెట్ తో తెరకెక్కిన ఈ చిత్రం కనీస వసూళ్లు కూడా రాబట్టలేకపోతోంది. 

Suriya

తమిళ ఇండస్ట్రీలో గేమ్ ఛేంజింగ్ మూవీ అవుతుంది అని ఫ్యాన్స్ అంచనాలు పెట్టుకున్నారు. డైరెక్టర్ శివ, నిర్మాత జ్ఞానవేల్ రాజా అయితే ఒక రేంజ్ లో ఈ చిత్రం గురించి చెప్పారు. సూర్య ఒళ్ళు హూనం చేసుకుని కష్టపడ్డాడు. ఎవ్వరి కష్టానికి ఫలితం దక్కలేదు. ఈ ప్రభావం సూర్య తదుపరి చిత్రాలపై కూడా పడినట్లు తెలుస్తోంది. 

నిర్మాతని ఆదుకునేందుకు సూర్య తదుపరి చిత్రం కూడా జ్ఞానవేల్ రాజా నిర్మాణంలోనే ఉండబోతున్నట్లు వార్తలు వస్తున్నాయి. జ్ఞానవేల్ రాజా నష్టాలని భరించేందుకు సూర్య రెమ్యునరేషన్ లేకుండా మరో చిత్రం చేయబోతున్నట్లు వార్తలు వస్తున్నాయి. ఇదిలా ఉండగా సూర్య డ్రీమ్ ప్రాజెక్టు కూడా కంగువా ఎఫెక్ట్ తో ఆగిపోయినట్లు టాక్. 

దాదాపు 500 కోట్ల భారీ బడ్జెట్ లో మహాభారతం ఆధారంగా కర్ణుడి పాత్రతో 'కర్ణ' అనే చిత్రం చాలా కాలం క్రితం సూర్య హీరోగా ఖరారైంది. భాగ్ మిల్కా భాగ్ చిత్ర దర్శకుడు ఓం ప్రకాష్ మెహ్రా దర్శకత్వంలో ఈ చిత్రానికి ప్లానింగ్ కూడా జరిగింది. మహాభారతంలో కర్ణుడి పాత్రకి ఎంత ప్రాధాన్యత ఉంటుందో ప్రత్యేకంగా చెప్పనవసరం లేదు. ఆ పాత్రలో ఉండే ఎమోషన్ కి ఆడియన్స్ ఫిదా అవుతారు. కల్కి ఆ తరహా ఎమోషన్ తో వచ్చి ఆడియన్స్ ని ఫిదా చేసింది. 

Rajamouli

అయితే సూర్య, ఓం ప్రకాష్ కర్ణ చిత్రం కంగువా డిజాస్టర్ కారణంగా ఆగిపోయినట్లు తెలుస్తోంది. కంగువాకి భారీ నష్టాలు ఎదురయ్యాయి. దీనితో కర్ణ చిత్రానికి 500 కోట్లు పెట్టడం సాధ్యం కాదు అని నిర్మాతలు వెనుకడుగు వేశారు. దీనితో ఈ చిత్రం రద్దయినట్లు బాలీవుడ్ లో టాక్. గతంలో కర్ణుడి పాత్ర అంటే ముందుగా గుర్తుకు వచ్చేది ఎన్టీఆర్. దానవీర శూర కర్ణ చిత్రంలో ఎన్టీఆర్ నటన చిరస్థాయిగా నిలిచిపోతుంది. ఆయన స్వీయ దర్శకత్వంలో దానవీర శూర కర్ణ చిత్రం తెరకెక్కింది. ఇప్పుడు మహాభారతం నేపథ్యంలో అలాంటి చిత్రం తెరకెక్కించాలి అంటే రాజమౌళికి మాత్రమే సాధ్యం అంటూ నెటిజన్లు కామెంట్స్ చేస్తున్నారు.