రామ్ చరణ్ నటించిన 'గేమ్ ఛేంజర్' సినిమా ట్రైలర్ విడుదల కాకపోవడంతో అభిమాని ఒకరు ఆత్మహత్య చేసుకుంటానని బెదిరించారు. ఈ ఘటన సోషల్ మీడియాలో వైరల్ అవుతోంది. ట్రైలర్ విడుదల తేదీపై మేకర్స్ ఇంకా అధికారిక ప్రకటన చేయలేదు.
పుష్ప మేనియా మెల్లి మెల్లిగా తగ్గుమొహం పడుతోంది. ఇప్పుడు అందరి దృష్టీ గ్లోబ‌ల్ స్టార్ రామ్ చరణ్, ప్రముఖ దర్శకుడు శంకర్ కాంబోలో వ‌స్తున్న భారీ చిత్రం 'గేమ్ ఛేంజర్' వైపు తిరుగుతోంది. సంక్రాంతి కానుక‌గా ఈ మూవీ జనవరి 10న ప్రేక్ష‌కుల ముందుకు రానుంది.
ఈ నేపథ్యంలో ఇప్పటికే మేకర్స్ ప్రమోషన్స్ మొద‌లుపెట్టారు. ఇటీవ‌లే అమెరికాలోని డ‌ల్లాస్‌లో గ్రాండ్‌గా ప్రీ రిలీజ్ ఈవెంట్ నిర్వ‌హించారు. అయినా అనుకున్న స్దాయిలో బజ్ క్రియేట్ కావటం లేదు. అందుకు కారణం..ట్రైలర్ ఇప్పటిదాకా రిలీజ్ కాకపోవటమే అంటున్నారు అభిమానులు.
ఇప్పటికి గేమ్ ఛేంజర్ మూవీ నుంచి మూడు పాట‌ల‌తో పాటు టీజ‌ర్‌ను కూడా విడుదల చేశారు. అయితే, రిలీజ్ డేట్ ద‌గ్గ‌ర ప‌డుతున్నప్పటికీ ఇప్ప‌టివ‌ర‌కు సినిమా ట్రైల‌ర్‌ను రిలీజ్ చేయ‌క‌పోవ‌డంపై ఓ అభిమాని నిరాశ వ్యక్తం చేశాడు. ఏకంగా సూసైడ్ లెట‌ర్ రాసి మ‌రీ మేక‌ర్స్‌కి షాకిచ్చాడు.
మూవీ ట్రైలర్ విడుద‌ల‌పై వెంట‌నే అప్‌డేట్ ఇవ్వ‌కుంటే ఆత్మహత్య చేసుకుంటానని ఆ లేఖ ద్వారా బెదిరించాడు. దీంతో ప్ర‌స్తుతం చెర్రీ ఫ్యాన్ సూసైడ్ లెట‌ర్ సామాజిక మాధ్య‌మాల్లో వైరల్ అవుతోంది.
ఆ లెట‌ర్‌లో ఏముందంటే..
గౌర‌వ‌నీయులైన గేమ్ ఛేంజర్ గారికి నేను.. అన‌గా ఈశ్వ‌ర్, చరణ్ అన్న ఫ్యాన్. చింతిస్తూ రాయున‌ది ఏమ‌న‌గా.. సినిమా విడుద‌ల‌కు ఇంకా 13 రోజులు మాత్ర‌మే మిగిలి ఉంది. మీరు ఏ విధ‌మైన ట్రైలర్ అప్‌డేట్ ఇవ్వ‌డం లేదు. క‌నీసం అభిమానుల భావోద్వేగాల‌ను ప‌ట్టించుకోవ‌డం లేదు. ఈ నెల ఆఖ‌రు క‌ల్లా ట్రైల‌ర్‌పై అప్‌డేట్ ఇవ్వ‌క‌పోతే, కొత్త సంవత్సరం కానుక‌గా ట్రైలర్ విడుదల చేయ‌క‌పోతే నేను ఆత్మ‌హ‌త్య‌కు పాల్ప‌డుతాన‌ని స‌విన‌యంగా తెలియ‌జేసుకుంటున్నాను. ఇట్లు మీ విధేయుడు, చరణ్ అన్న భ‌క్తుడు ఈశ్వ‌ర్ అని లేఖ‌లో రాసుకొచ్చాడు. ఇప్పుడీ సూసైడ్ లెట‌ర్ సోషల్ మీడియాలో వైరల్ అవుతోంది.
'గేమ్ ఛేంజర్' ట్రైలర్ ఎప్పుడా అంటూ అంతా ఆసక్తిగా ఎదురు చూస్తున్నారు. యూఎస్‌ఏలో జరిగిన ప్రీ రిలీజ్ ఈవెంట్‌లో ట్రైలర్ విడుదల చేసే అవకాశాలు ఉన్నాయనే వార్తలు వచ్చాయి. కానీ ట్రైలర్ విడుదల చేయక పోవడంతో ఫ్యాన్స్ అసంతృప్తి వ్యక్తం చేశారు. గేమ్ ఛేంజర్ ట్రైలర్ ని కొత్త సంవత్సరం సందర్బంగా జనవరి 1 న సినిమా విడుదల చేయాలని మూవీ టీమ్ నిర్ణయించిందని చెప్పుకుంటున్నారు. అయితే జనవరి 4వ తేదీకు ఇది మారవచ్చు అని కొందరు అంటున్నారు. ఏదమైనా ట్రైలర్ రిలీజ్ కు సంబంధించిన ఏర్పాట్లు జరుగుతున్నాయి. శంకర్ అండ్ టీం ఇప్పటికే ట్రైలర్ ఫైనల్‌ కట్‌, మ్యూజిక్ మిక్సింగ్‌లో బిజీగా ఉన్నారని తెలుస్తోంది.
రామ్ చరణ్ సోలో హీరోగా సినిమా వచ్చి దాదాపు ఐదేళ్లు అవుతుంది. ఈ మధ్యలో ఆయన ఎన్టీఆర్‌తో కలిసి 'ఆర్ఆర్‌ఆర్‌', చిరంజీవితో కలిసి ఆచార్య సినిమాలతో వచ్చారు. గేమ్ ఛేంజర్‌తో సోలో హీరోగా చాలా కాలం తర్వాత చరణ్ రాబోతున్న నేపథ్యంలో ఈ సినిమాపై అంచనాలు భారీగా ఉన్నాయి.
పైగా తమిళ దిగ్గజ దర్శకుడు శంకర్ దర్శకత్వంలో ఈ సినిమా రూపొందిన నేపథ్యంలో పాన్‌ ఇండియా స్థాయిలో అంచనాలు పెరిగాయి. టీజర్ విడుదల తర్వాత ఒక్కసారిగా సినిమా గ్రాఫ్‌ని పెంచారు. ప్రముఖ దర్శకుడు కార్తీక్ సుబ్బరాజ్‌ ఈ సినిమాకి కథ అందించిన నేపథ్యంలో సినిమా బాగుంటుందనే అంచనాలు ఉన్నాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి