రాంగోపాల్ వర్మకి మూడు నెలల జైలు శిక్ష.. ఆ వ్యవహారంలో దొరికిపోయిన వివాదాస్పద డైరెక్టర్ 

రాంగోపాల్ వర్మ అంటే ముందుగా గుర్తుకు వచ్చేది వివాదాలు మాత్రమే. వివాదాస్పద కామెంట్స్ తో వర్మ నిత్యం వార్తల్లో ఉంటారు. ఆయన తెరకెక్కించే చిత్రాలు కూడా సినీ రాజకీయ వర్గాల్లో చర్చకి దారితీస్తుంటాయి. తాజాగా రాంగోపాల్ వర్మ ఒక కేసులో చిక్కుకున్నారు. ఈ కేసులో ముంబై కోర్టు వర్మకి మూడు నెలల జైలు శిక్ష విధిస్తూ ఆదేశాలు ఇచ్చింది. 

వివరాల్లోకి వెళితే.. 2018లో మహేష్ చంద్ర అనే వ్యక్తి వర్మపై చెక్ బౌన్స్ కేసు ఫైల్ చేశారు. ఈ కేసు విచారణ తాజాగా జరగగా ముంబై కోర్టు వర్మపై నాన్ బెయిలబుల్ వారెంట్ జారీ చేసింది. మూడు నెలల జైలు శిక్షతో పాటు బాధితుడికి 3. 7 లక్షలు చెల్లించాలని వర్మని కోర్టు ఆదేశించింది. కేవలం మూడు నెలల్లోగా ఆ మొత్తం చెల్లించాలని.. లేని పక్షంలో మరో మూడు నెలలు అదనంగా జైలు శిక్ష ఉంటుందని పేర్కొంది. 

వర్మకి ఇది బిగ్ షాక్ అనే చెప్పాలి. 2022లోనే వర్మ ఈ కేసులో బెయిల్ తెచ్చుకున్నాడు. ఇప్పుడు వర్మ ఈ కేసుని ఎలా ఎదుర్కొంటాడు అనేది ఆసక్తిగా మారింది. వర్మ విచారణకి హాజరు కాకపోవడంపై కూడా కోర్టు సీరియస్ అయింది.