టాలీవుడ్ కూడా మూస కథలకు స్వస్తి చెబుతుంది. కొత్త తరం దర్శకులు నయా ఐడియాలతో ప్రేక్షకులకు విభిన్నమైన చిత్రాలను అందించే ప్రయత్నం చేస్తున్నారు. అలాంటి చిత్రమే స్కైలాబ్. గతంలో జరిగిన వాస్తవిక సంఘటనకు ఫిక్షన్ జోడించిన తెరకెక్కించిన స్కైలాబ్ మూవీ ప్రీమియర్స్ షో టాక్ బయటికి రాగా ఎలా ఉందో చూద్దాం
కథ:
జర్నలిస్ట్ గౌరీ (నిత్యా మీనన్) తాను పనిచేసే ఓ మ్యాగజైన్ నుండి తొలగించబడి సొంత ఊరు బండలింగంపల్లికి వచ్చేస్తుంది. రైటర్ గా తనని తాను నిరూపించుకోవడానికి మంచి స్టోరీ కోసం ఎదురుచూస్తూ ఉంటుంది. అదే ఊరికి చెందిన డాక్టర్ ఆనంద్(సత్య దేవ్) సస్పెండై సొంత ఊరిలో క్లినిక్ పెట్టుకోవాలనే ఆశతో తిరిగి వస్తాడు. మరోవైపు రామారావు(రాహుల్ రామకృష్ణ) తన ఫ్యామిలీ అప్పుల తీర్చడం కోసం నానా తిప్పలు పడుతూ ఉంటాడు. ఒక బ్రేక్ కోసం ఎదురుచూస్తున్న ఈ ముగ్గురికి... సాంకేతిక లోపాలు తలెత్తి నాసా అంతరిక్షంలో నిర్మించిన స్కైలాబ్ క్రింద పడుతుందని, అది కూడా కరీంనగర్ జిల్లాలోని తమ గ్రామంపై పడి పెను ప్రమాదం సృష్టించనుందని తెలుస్తుంది. దీనితో ఆ గ్రామ ప్రజలు భయంతో వణికిపోతారు. ఇంతకీ స్కైలాబ్ నిజంగానే బండలింగంపల్లి గ్రామాన్ని తాకిందా... కొద్దిరోజుల్లో పెను ప్రమాదమని తెలుసుకున్న గ్రామ ప్రజల ఫీలింగ్స్ ఏమిటీ? ఈ సంఘట గౌరీ, డాక్టర్ ఆనంద్, రామారావు జీవితాలను ఎలా మలుపు తిప్పింది? అనేది మిగతా కథ..
40ఏళ్ల క్రితం పల్లె జనాల్లో ఉండే అమాయకత్వం, అపోహలు వంటి విషయాలను ఆధారంగా చేసుకొని కామెడీతో కూడిన థ్రిల్లింగ్ డ్రామాగా నడపాలని దర్శకుడు భావించారు. ఈ సినిమాతో దర్శకుడిగా పరిచయమైన విశ్వక్ కండెరావ్ ప్రయత్నాని మెచ్చుకోవాలి. ఆయన ఎంచుకున్న సబ్జెక్టు సరికొత్తగా ఉంది. స్కైలాబ్ ఫాల్ గురించి ఆనాటి జనం మనోభాలు చాలా బాగా ఆవిష్కరించాడన్న అభిప్రాయం వినిపిస్తుంది.
1970ల నాటి పల్లెటూరి సెటప్, తెలంగాణా బాష చాలా సహజంగా ఉంది. ఆర్ట్ వర్క్ కి వందకు వంద మార్కులు వేయొచ్చంటున్నారు. ఆకాశంలో విమానాన్ని వింతగా చూసే రోజుల్లో తెలియని ప్రమాదం గురించి పెల్లెప్రజలు స్పందన, ఎమోషన్స్ ఆకట్టుకునేలా చూపించారు.
జర్నలిస్ట్ గా నిత్యా మీనన్ అద్భుతం. రెట్రో లుక్ తో పాటు ఆ పాత్రకు ఆమె చక్కగా సరిపోయారు. డాక్టర్ గా సత్యదేవ్, సుబేదార్ వారసుడిగా రాహుల్ రామకృష్ణ నటన మెప్పించింది. సినిమా దాదాపు ఈ మూడు పాత్రల చుట్టే నడుస్తుంది. మంచి నటులుగా పేరున్న నిత్యా, సత్యదేవ్, రాహుల్ సన్నివేశాలకు బలం చేకూర్చారు.
ఓ కొత్త సబ్జెక్టు ని ఎంచుకున్న విశ్వక్ ట్రీట్మెంట్ మాత్రం సరిగా ఇవ్వలేదన్న మాట వినిపిస్తుంది. మంచి కథకు ఆకట్టుకునే స్క్రీన్ ప్లే తోడైనప్పుడు మాత్రమే కథ రక్తి కడుతుంది. స్కైలాబ్ మూవీలో అదే ప్రధాన లోపం అంటున్నారు.
మెల్లగా సాగే కథనం కారణంగా ఫస్ట్ హాఫ్ బోరింగ్ అంటున్నారు. అదే సమయంలో అనుకున్న స్థాయిలో కామెడీ పండకపోవడం సినిమాను దెబ్బతీసింది. ఫస్ట్ హాఫ్ తో పోల్చుకుంటే సెకండ్ హాఫ్ పర్వాలేదు. పతాక సన్నివేశాల్లో పల్లెప్రజల ఎమోషన్స్ తెరకెక్కించిన తీరు బాగుంది.
సాంకేతికంగా స్కైలాబ్ పర్వాలేదు. మ్యూజిక్, ఎడిటింగ్ లకు యావరేజ్ మార్కులు వేస్తున్నారు. దర్శకుడు విశ్వక్ సినిమాలో అక్కడక్కడా మెరుపులు మెరిపించారు. ఓవర్ ఆల్ గా ఓ సారి చూడదగ్గ చిత్రమే. కామెడీ, స్క్రీన్ ప్లే కుదిరితే మంచి మూవీ అయ్యేది. ప్రస్తుతానికైతే స్కైలాబ్ ఓటిటి మూవీ అంటున్నారు. కొత్త ప్రయత్నాన్ని ఆదరించడం చాలా అవసరం, ఒకసారి చూడడంలో తప్పేమీ లేదు.