హోటల్‌ రూమ్ లో శవమై కనిపించిన నటుడు, ప్రైమరీ రిపోర్ట్ ఏంటంటే?

ప్రముఖ నటుడు దిలీప్ శంకర్ హోటల్ గదిలో మృతి చెందారు. ఈ ఆకస్మిక మరణం చిత్ర పరిశ్రమకు షాక్ ఇచ్చింది. ప్రాథమిక రిపోర్ట్ లో పోలీసులు చెప్పిన విషయం ఇదే. 

మలయాళ చిత్ర పరిశ్రమలో విషాదం చోటు చేసుకుంది.  ప్రముఖ సినీ, సీరియల్ నటుడు దిలీప్ శంకర్ మృతి చెందారు. మలయాళ సినీ, సీరియల్స్ తో బాగా పాపులర్ అయిన దిలీప్ శంకర్ మరణం చిత్ర పరిశ్రమకు షాక్ ఇచ్చింది. కేవలం 2 రోజుల క్రితం హోటల్ రూమ్ బుక్ చేసుకున్న దిలీప్ శంకర్ ఇప్పుడు మృతి చెందారు. దిలీప్ శంకర్ మరణంపై కొన్ని అనుమానాలు వ్యక్తమవుతున్నాయి.

తిరువనంతపురంలోని ఓ ప్రైవేట్ హోటల్‌లో రూమ్ బుక్ చేసుకున్న దిలీప్ శంకర్ 2 రోజుల క్రితం చెక్ ఇన్ చేశారు. ఆ తర్వాత దిలీప్ శంకర్ కనిపించకుండా పోయారు. ఎవరికీ కనిపించలేదు. హోటల్ గది నుంచి దుర్వాసన రావడంతో హోటల్ సిబ్బంది తలుపులు బద్దలు కొట్టి లోపలికి వెళ్లి చూడగా ఈ ఘటన  వెలుగులోకి వచ్చింది. 

హోటల్ గదిలో నేలపై దిలీప్ శంకర్ మృతదేహం కనిపించింది. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకుని పోస్ట్‌మార్టం నిమిత్తం పంపారు. పోలీసుల ప్రాథమిక నివేదిక ప్రకారం దిలీప్ శంకర్ మరణంలో ఎలాంటి కుట్ర కోణం లేదని తెలిపారు.

దిలీప్ శంకర్ కొన్ని ఆరోగ్య సమస్యలతో బాధపడుతున్నారని ఆయన సన్నిహితులు తెలిపారు. అయితే, ఆ ఆరోగ్య సమస్యలు ప్రాణాంతకం కాదని స్పష్టం చేశారు. దిలీప్ శంకర్ ఆరోగ్య సమస్య కారణంతోనా, లేక హార్ట్ ఎటాక్‌ వచ్చిందా?  మరే ఇతర కారణాల వల్ల మృతి చెందారా అనేది పోస్ట్‌మార్టం నివేదికలో తేలనుందని పోలీసులు వెల్లడించారు.

రెండు సినిమాలు, పలు సీరియల్స్ లో ప్రేక్షకుల మన్ననలు పొందిన దిలీప్ శంకర్ ఎలాంటి వివాదాల్లో చిక్కుకోలేదు. తన కెరీర్‌లో మంచి గౌరవాన్ని సంపాదించుకున్న దిలీప్ శంకర్ మరణం మలయాళ చిత్ర పరిశ్రమను దిగ్భ్రాంతికి గురి చేసింది. పోలీసులు అన్ని కోణాల్లోనూ దర్యాప్తు చేస్తున్నారు.