'ఆదిపురుష్' విషయంలో దానికోసం ఎంతో ఆశపడ్డ కృష్ణంరాజు.. అది జరిగుంటేనా..

రెబల్ స్టార్ కృష్ణం రాజు, యంగ్ రెబల్ స్టార్ ప్రభాస్ మధ్య అనుబంధాన్ని మాటల్లో వర్ణించడం కష్టం. తన పెదనాన్న అంటే ప్రభాస్ ఎంత ప్రేమిస్తాడో.. అదే విధంగా ప్రభాస్ విషయంలో కృష్ణం రాజు కేర్ తీసుకుంటారు. కృష్ణం రాజు గత ఏడాది సెప్టెంబర్ లో దీర్ఘకాలిక అనారోగ్య సమస్యలు, వృద్ధాప్యం కారణంగా మరణించిన సంగతి తెలిసిందే. ప్రభాస్ బాహుబలి చిత్రంతో పాన్ ఇండియా స్టార్ గా ఎదిగినప్పుడు కృష్ణంరాజు ఎంతో పొంగిపోయారు. ప్రభాస్ లో తనని చూసుకుంటూ మురిసిపోయారు. 

బాహుబలి తర్వాత ప్రభాస్ ని వెతుక్కుంటూ ఎన్నో పాన్ ఇండియా ప్రాజెక్ట్స్ వచ్చాయి. అందులో ఒకటి ఆదిపురుష్. ఈ చిత్రం విషయంలో కృష్ణం రాజు ముందు నుంచి ఎంతో కాన్ఫిడెంట్ గా ఉన్నారు. ఈ ప్రాజెక్టు ప్రారంభమైనప్పుడే ప్రపంచ స్థాయి సినిమా అయ్యే అవకాశాలు ఉన్న చిత్రం అని కృష్ణంరాజు ఓ ఇంటర్వ్యూలో తెలిపారు. 

అప్పట్లో ఆదిపురుష్ పై కృష్ణం రాజు చేసిన వ్యాఖ్యలు ప్రస్తుతం వైరల్ అవుతున్నాయి. నేడు వరల్డ్ వైడ్ గా ఆదిపురుష్ చిత్రం గ్రాండ్ రిలీజ్ అవుతున్న సంగతి తెలిసిందే. ఆల్రెడీ ఆదిపురుష్ చిత్రానికి మంచి టాక్ వస్తోంది. అయితే కృష్ణంరాజు ఆశపడ్డట్లుగా ఇది ప్రపంచ స్థాయి సినిమా కాలేకపోయింది. 

కృష్ణంరాజు గతంలో ఇంటర్వ్యూలో మాట్లాడుతూ.. ఆదిపురుష్ అంటే శ్రీమహావిష్ణువు. ఆయన అవతారాలలో ఒక అవతారాన్ని తీసుకుని ఈ కథ రూపొందించారు. కథ నేను విన్నాను. ప్రభాస్ కి నాకు చాలా బాగా నచ్చింది. ఇది కేవలం పాన్ ఇండియా సినిమా మాత్రమే కాదు.. ప్రపంచ స్థాయి చిత్రం అయ్యే కథా బలం ఉన్న చిత్రం. ఈ దిశగా చిత్ర యూనిట్ ప్రయత్నాలు చేస్తున్నారు. 

హాలీవుడ్ లో కూడా ఈ చిత్రాన్ని రిలీజ్ చేయాలని చిత్ర యూనిట్ భావిస్తోంది. మొత్తం 20 దేశాల్లో రిలీజ్ చేయాలనే ప్లాన్ లో ఉన్నారు. అది జరిగితే ఎంతో అద్భుతంగా ఉంటుంది. అది జరిగి ప్రభాస్ ప్రపంచ స్థాయికి ఎదగాలని కోరుకుంటున్నా అంటూ కృష్ణం రాజు అన్నారు. 

కానీ కృష్ణంరాజు ఆశించినట్లుగా ఆదిపురుష్ చిత్రం ప్రపంచ స్థాయి మూవీ కాలేకపోయింది. గతంలో టీజర్ పై విమర్శలు వచ్చినప్పుడు మరింతగా మేకర్స్ బడ్జెట్ ఖర్చు చేశారు. ఇదే కారణమో ఇతర కారణాలు ఉన్నాయో తెలియదు కానీ ఆదిపురుష్ ని హాలీవుడ్ కి తీసుకెళ్లాలనే ప్రతిపాదన ఆదిలోనే విరమించుకున్నట్లు తెలుస్తోంది.