బ్యూటీ క్వీన్ కాజల్ అగర్వాల్ పెళ్లి తర్వాత కూడా కెరీర్ లో బిజీగా ఉంది. మ్యారేజ్ తర్వాత కాజల్ భగవంత్ కేసరి లాంటి హిట్ సొంతం చేసుకుంది. త్వరలో కాజల్ సోలోగా తన సత్తా చూపించేందుకు రెడీ అవుతోంది. కాజల్ ప్రధాన పాత్రలో నటించిన లేడీ ఓరియెంటెడ్ చిత్రం సత్యభామ ఈ నెల 31న రిలీజ్ కి రెడీ అవుతోంది.
దీనితో కాజల్ అగర్వాల్ వరుస ప్రమోషన్స్ తో బిజీగా ఉంది. మీడియాకి ఇంటర్వ్యూలు ఇస్తూ పెళ్లి తర్వాత తన కెరీర్ ఎలా మారింది.. ఎలాంటి అవకాశాలు వస్తున్నాయి.. మ్యారేజ్ లైఫ్ ఎలా ఉంది లాంటి సంగతులని వివరించింది. సత్యభామ చిత్రంలో నటించడం చాలా ఛాలెంజింగ్ గా అనిపించినట్లు కాజల్ పేర్కొంది. కానీ తాము పడ్డ కష్టం తెరపై ఆడియన్స్ ని ఆకట్టుకుంటుందని కాజల్ పేర్కొంది.
తన వ్యక్తిగత జీవితం గురించి మాట్లాడుతూ అంతా సాఫీగా ఉందని తెలిపింది. ఒక కుమార్తెగా తనకి మార్కులు వేయాల్సి వస్తే కేవలం 70 మాత్రమే అని తెలిపింది. పూర్తి స్థాయిలో నేను మా అమ్మానాన్నకి మంచి కూతుర్ని కాలేదు. ఒక తల్లిగా మార్కులు వేయాల్సి వస్తే కూడా 70 మాత్రమే వేసుకుంటాను. నా కొడుక్కి నేను టైమ్ కేటాయించలేకపోతున్నాను.
కానీ నా భర్త, కుటుంబ సభ్యుల ప్రోత్సాహంతో కెరీర్ లో కొనసాగుతున్నా. నా కొడుకు బాగోగుల్ని వాళ్లే చూసుకుంటున్నారు. ఒక భార్యగా మార్కులు వేసుకోవాల్సి వస్తే వందకి 100 వేసుకుంటా అంటూ సిగ్గుపడుతూ కాజల్ చెప్పింది. తన భర్త అంటే అంత ఇష్టం అంటూ పేర్కొంది.
మీ పెళ్లి తర్వాత మీ భర్తకి చూపించిన మొదటి సినిమా ఏంటి అని యాంకర్ ప్రశ్నచింది. దీనికి కాజల్ సమాధానం ఇస్తూ ఏమాత్రం ఆలోచించకుండా మగధీర చూపించాను అని పేర్కొంది. ఇద్దరం కలిసి ఆ సినిమా చూశాం. కానీ గౌతమ్ కి ఏమి అర్థం కాలేదు. విజువల్స్ మాత్రం మెస్మరైజింగ్ గా ఉన్నాయని చెప్పినట్లు కాజల్ పేర్కొంది.
కాజల్ కెరీర్ లో బెస్ట్ మూవీస్ లో మగధీర ముందు వరుసలో ఉంటుంది. రాజమౌళి దర్శకత్వంలో తెరకెక్కిన ఈ చిత్రంలో కాజల్ మిత్రవింద పాత్రలో అదరహో అనిపించింది. రొమాంటిక్ గా ఎమోషనల్ గా కాజల్ అద్భుతమైన పెర్ఫామెన్స్ ఇచ్చింది. ప్రస్తుతం తన జనరేషన్ లో రాంచరణ్ తన ఫేవరిట్ యాక్టర్ అని కాజల్ పేర్కొంది. వీళ్ళిద్దరూ మగధీర, నాయక్, గోవిందుడు అందరివాడేలే, ఎవడు లాంటి చిత్రాల్లో నటించారు.