రణ్‌వీర్ సింగ్‌పై కాజల్ అగర్వాల్ కామెంట్స్.. ధురంధర్ 2 చూసిన ఆమె ఏమని పోస్ట్ చేసిందంటే?

రణ్‌వీర్ సింగ్ నటనకు కాజల్ అగర్వాల్ ఫిదా అయ్యారు. ' ధురంధర్ 2 లో రణ్‌వీర్ చేసిన మ్యాజిక్ నుంచి ఇంకా బయటకు రాలేకపోతున్నానని, అతని నటన, కష్టం అద్భుతమని ప్రశంసించారు. 

ధురంధర్ : ది రివెంజ్ సంచలనం..

బాలీవుడ్ ఎనర్జిటిక్ స్టార్ రణ్‌వీర్ సింగ్ నటించిన 'ధురంధర్ : ది రివెంజ్' సినిమా ప్రస్తుతం హాట్ టాపిక్‌గా మారింది. ఈ చిత్రానికి ఆదిత్య ధర్ దర్శకత్వం వహించారు.ఈ స్పై యాక్షన్ థ్రిల్లర్ బాక్సాఫీస్ వద్ద సునామీ సృష్టిస్తోంది. సినీ ప్రముఖుల మనసులను కూడా గెలుచుకుంటోంది. సాధారణ ప్రేక్షకుల నుంచి సెలబ్రిటీల వరకు అందరూ ఈ సినిమా మేకింగ్, రణ్‌వీర్ నటనకు ఫిదా అవుతున్నారు. ఇప్పుడు ఈ జాబితాలో కాజల్ అగర్వాల్ కూడా చేరారు.

ధురంధర్ : ది రివెంజ్ పై కాజల్ రివ్యూ..

ఇటీవల 'ధురంధర్ 2' సినిమా చూసిన కాజల్ అగర్వాల్, తన ఇన్‌స్టాగ్రామ్ ఖాతాలో సినిమాపై చాలా ఎమోషనల్ రివ్యూను పంచుకున్నారు.సినిమాలోని ప్రతీ అంశాన్ని ఆమె ప్రశంసించారు. 'ధురంధర్ : ది రివెంజ్... ఒక్కసారి ప్రశాంతంగా ఆలోచించండి, ఈ సినిమా మీ మనసు లోతుల్లోకి వెళ్లనివ్వండి' అని రాస్తూ సినిమా తీవ్రతను వివరించారు.

రణ్‌వీర్ సింగ్ నటనకు ఫిదా

ముఖ్యంగా రణ్‌వీర్ సింగ్ నటనకు కాజల్ ఫిదా అయ్యారు. 'రణ్‌వీర్, ఈ సినిమాలో మీరు చేసిన మ్యాజిక్ నుంచి నేను ఇంకా బయటకు రాలేకపోతున్నా. మీ పాత్రలోని తీవ్రత, భావోద్వేగాలు, మీ కష్టం అద్భుతం. సినిమాపై మీకున్న ప్యాషన్ ప్రతీ ఫ్రేమ్‌లో కనిపిస్తుంది. జస్‌కిరత్, హమ్జా పాత్రలు మాతో పాటు చాలా కాలం ఉంటాయి. మీరు మా తరం నిజమైన లెజెండ్' అని రణ్‌వీర్‌ను ఆమె ప్రశంసించారు.

డైరెక్టర్ గురించి ఏమంటుందంటే?

కాజల్ కేవలం రణ్‌వీర్‌నే కాదు, మొత్తం చిత్ర బృందాన్ని ప్రశంసించారు. ఆర్. మాధవన్ పాత్రలోని 'ప్రశాంతమైన శక్తి', 'అధికారయుత నటన'ను ఆమె మెచ్చుకున్నారు. దర్శకుడు ఆదిత్య ధర్ గురించి మాట్లాడుతూ, 'ఇది సినీ ప్రియులకు దొరికిన అతిపెద్ద సినిమాటిక్ ఎక్స్‌టసీ ప్రో మాక్స్. మొదటి భాగం మరపురానిది అయితే, రెండో భాగం మనల్ని భావోద్వేగాల ప్రపంచంలోకి తీసుకెళ్తుంది. మీరు సినిమా నాణ్యతను మరో స్థాయికి తీసుకెళ్లారు' అని అన్నారు.

యామీ గౌతమ్ గురించి మాట్లాడుతూ..

ఈ సినిమాలో నటించిన యామీ గౌతమ్ 'ప్రభావవంతమైన నటన', సారా అర్జున్ 'చార్మింగ్ పెర్ఫార్మెన్స్'ను కూడా కాజల్ మెచ్చుకున్నారు. శశ్వత్ సచ్‌దేవ్ సంగీతం గురించి చెబుతూ, 'సంగీతం సినిమాకు కేవలం సపోర్ట్ ఇవ్వడమే కాదు, ఆ సినిమాలోనే జీవిస్తుంది' అని రాశారు.

700 కోట్ల కలెక్షన్స్..

గత ఏడాది డిసెంబర్‌లో విడుదలైన 'ధురంధర్ ' మొదటి భాగం లాగే, 'ధురంధర్ : ది రివెంజ్' కూడా బాక్సాఫీస్ వద్ద దూసుకుపోతోంది. మార్చి 19న విడుదలైన ఈ సినిమా కేవలం నాలుగు రోజుల్లోనే ప్రపంచవ్యాప్తంగా సుమారు రూ.700 కోట్లు వసూలు చేసి కొత్త రికార్డు సృష్టించింది. సెలబ్రిటీల ప్రశంసలు సినిమా విజయానికి మరింత ఊపునిస్తాయని సినీ నిపుణులు అంటున్నారు.