నూతన సంవత్సరం సందర్భంగా సమంత ఫ్యాన్స్ తో ముచ్చటించారు. ఓ నెటిజన్ కామెంట్ కి సమంత ఆసక్తికరంగా స్పందించారు. ప్రస్తుతం సమంత కామెంట్ వైరల్ గా మారింది.
నటిగా సమంతది 12 ఏళ్ల ప్రయాణం. 2010లో ఏమాయ చేశావే మూవీతో సమంత హీరోయిన్ గా వెండితెరకు పరిచయం అయ్యారు. తిరుగులేని హీరోయిన్ గా పేరు తెచ్చుకున్నారు. పెద్ద పెద్ద స్టార్స్ కూడా ఏదో ఒక సమయంలో నెమ్మదిస్తారు. సమంత అసలు వెనక్కి తిరిగి చూసుకుంది లేదు. ఆమె అడుగుపెట్టిన ప్రతి చోటా విజయం దక్కింది.
కమర్షియల్ చిత్రాలతో బ్లాక్ బస్టర్స్ అందుకున్న సమంత దాదాపు అందరు స్టార్ హీరోలతో నటించారు. ఇక ఓటీటీలో అడుగుపెట్టి తన మార్క్ చూపించారు. సమంత నటించిన ఫ్యామిలీ మాన్ 2 అమెజాన్ ప్రైమ్ లో స్ట్రీమ్ అవుతుంది. భారీ సక్సెస్ సాధించింది. ఓ బేబీ, యశోద వంటి లేడీ ఓరియెంటెడ్ చిత్రాల్లో నటించి సూపర్ హిట్స్ కొట్టిన ఘనత సమంతదే.
అయితే సమంత వ్యక్తిగత జీవితంలో వివాదాలు, ఒడిదుడుకులు, సమస్యలు చోటు చేసుకున్నాయి. ముఖ్యంగా గత రెండేళ్లలో సమంత పర్సనల్ ప్రాబ్లమ్స్ తో మానసిక వేదన అనుభవించారు. నాగ చైతన్యతో విడాకులు ఆమెను తీవ్ర ఒత్తిడికి గురి చేశాయి. ప్రేమించి పెళ్లి చేసుకున్నవాడు దూరమయ్యాడన్న బాధ ఒకవైపు, నిరాధార ఆరోపణలు మరోవైపు ఆమెను ఉక్కిరిబిక్కిరి చేశాయి.
విడాకుల వేదన నుండి సమంత బయటపడేందుకు చాలా సమయం పట్టింది. ఆమె మిత్రులతో టూర్స్ కి వెళ్లారు. పలు ఆధ్యాత్మిక ప్రదేశాలు సందర్శించారు. సినిమాలకు కూడా బ్రేక్ ఇచ్చారు. సమంత పూర్తిగా కోలుకునేందుకు నెలల సమయం పట్టింది. అంతా బాగుంది అనుకుంటున్న సమయంలో ఆరోగ్య సమస్యలు తలెత్తాయి.
సమంత(Samantha) అరుదైన మయోసైటిస్ వ్యాధితో పోరాడుతున్నారు. యశోద చిత్ర విడుదల సమయంలో సమంత తనకు మయోసైటిస్ సోకినట్లు ఫ్యాన్స్ కి తెలియజేశారు. ఆమె ప్రకటన అభిమానులతో పాటు చిత్ర వర్గాలు ఉలిక్కిపడేలా చేసింది. ఆమె త్వరగా కోలుకోవాలని ప్రార్థనలు చేశారు. ఈ క్రమంలో వార్తా కథనాలు మరింత భయపెట్టాయి. మయోసైటిస్ ప్రాణాలు తీసే వ్యాధి కాదు. అలా అని చిన్న సమస్య కూడా కాదు. నేను పోరాడాల్సి ఉందని సమంత స్వయంగా క్లారిటీ ఇచ్చారు.
కాగా నూతన సంవత్సరం సందర్భంగా సమంత అభిమానులతో ముచ్చటించారు. ట్విట్టర్ వేదికగా క్వశ్చన్ అండ్ ఆన్సర్స్ కార్యక్రమం నిర్వహించారు. ఈ సందర్భంగా అభిమానులు అడిగే పలు ప్రశ్నలకు సమంత సమాధానం చెప్పాడు. ఓ నెటిజన్ ''మీరు తిరిగి కోలుకొని సంపూర్ణ ఆరోగ్యంతో ఉండాలని ప్రార్థన చేస్తున్నాను. మరలా మీరు బాక్సాఫీస్ సక్సెస్లు సాధించాలి. అలాగే మీపై వచ్చిన విమర్శలను తిప్పి కొట్టాలి...'' అని కామెంట్ పోస్ట్ చేశాడు.
దీనికి సమంత స్పందించారు. ''మీ ప్రార్థనలు, ఆశీస్సులు నాకు ఎంతో అవసరం. ఇంతకీ అవి ఏం విమర్శలు''అని విమర్శలు తిప్పికొట్టాలని నెటిజెన్ చేసిన కామెంట్ కి వివరణ కోరారు. అయితే సమంత ఈ కామెంట్ ఫన్నీ గానే చేసినట్లు తెలుస్తుంది.
కాగా విడాకుల సమయంలో సమంత అనేక ఆరోపణలు ఎదుర్కొన్నారు. ఆమెకు పిల్లలు కనడం ఇష్టం లేదు. అందుకే నాగ చైతన్యతో గొడవలు జరిగాయని, అలాగే సమంత తన పర్సనల్ స్టైలిస్ట్ ప్రీతమ్ జువాల్కర్ తో ఎఫైర్ పెట్టుకున్నారంటూ... కథనాలు వెలువడ్డాయి. ఈ నిరాధార కథనాలపై సమంత చట్టపరమైన చర్యలు తీసుకున్నారు.