ఏడాది పాటు సిల్వర్ స్క్రీన్ పై హీరోయిన్ నభా నటేష్ కనిపించలేదు. అయితే ఈ విరామానికి ప్రమాదమే కారణం అంటూ ఒక ఎమోషనల్ పోస్ట్ పెట్టింది నభా నటేష్.
ఇస్మార్ట్ శంకర్ ఫేమ్ నభా నటేష్ 2022లో ఒక్క చిత్రంలో నటించలేదు. వరుస పరాజయాల నేపథ్యంలో ఆమెకు ఆఫర్స్ రాలేదేమో అని అందరూ భావించారు. ఐతే తాను ప్రమాదానికి గురి కావడం వలనే సినిమాలు చేయలేదంటుంది ఈ కన్నడ బ్యూటీ. పూర్తిగా కోలుకున్న నేను సినిమాలు చేయడానికి సిద్ధం అంటూ ఒక సందేశం పోస్ట్ చేసింది.
నభా ఇంస్టాగ్రామ్ లో... 'నేను గత ఏడాది సినిమాలు చేయలేదు. నాకు లాగే మీకు కూడా మిస్సింగ్ ఫీలింగ్ కలిగి ఉంటుందని నాకు తెలుసు. 2022లో నేను ఒక ప్రమాదానికి గురయ్యాను. నా ఎడమ భుజం మల్టీ ఫ్రాక్చర్స్ కి గురైంది. చికిత్స లో భాగంగా పలుమార్లు సర్జరీలు చేయించాల్సి వచ్చింది. ఈ పరిణామం మానసికంగా, శారీరకంగా బాధించింది. అయితే ఇప్పుడు నేను కోలుకున్నాను. నేను ఎంతగానో ఇష్టపడే సినిమాల్లో నటించాలి అనుకుంటున్నాను. మీ ప్రేమ, అభిమానాలతో నేను రికవరీ అయ్యాను. నా ఆరోగ్యం ప్రస్తుతం కుదురుకుందని చెప్పడానికి సంతోషిస్తున్నాను. నేను సిద్ధంగా ఉన్నాను 2023...' అని ఒక ఎమోషనల్ నోట్ షేర్ చేశారు.
నభా నటేష్(Nabha Natesh) పోస్ట్ వైరల్ కాగా... ఆమెకు అభిమానులు బెస్ట్ విషెస్ తెలియజేస్తున్నారు. తిరిగి వెండితెరపై రాణించాలని కోరుకుంటున్నారు. అలాగే ప్రమాదాల బారిన పడకుండా జాగ్రత్తగా ఉండాలంటూ సలహా ఇస్తున్నారు.
ఇక నభా కెరీర్ పరిశీలిస్తే... ఆమె ఫేడ్ అవుట్ దశకు చేరింది. ప్రస్తుతం ఆమె చేతిలో చిత్రాలు లేవు. 2021లో విడుదలైన మ్యాస్ట్రో మూవీ తర్వాత ఆమె కొత్త ప్రాజెక్ట్ ప్రకటించలేదు. నితిన్ హీరోగా తెరకెక్కిన మ్యాస్ట్రో హాట్ స్టార్ లో నేరుగా విడుదల చేశారు.
మ్యాస్ట్రో పాజిటివ్ టాక్ దక్కించుకున్నా ఆమె కెరీర్ కి ఉపయోగపడలేదు. ఇక నభా కెరీర్ లో ఇస్మార్ట్ శంకర్ సూపర్ హిట్ మూవీగా ఉంది. 2019లో విడుదలైన ఈ చిత్రం రూ. 75 కోట్ల వరల్డ్ వైడ్ గ్రాస్ రాబట్టింది. పూరి జగన్నాధ్ కాంబినేషన్ లో రామ్ హీరోగా విడుదలైన ఇస్మార్ట్ శంకర్ అందరికీ ఊపిరి పోసింది.
ఇస్మార్ట్ శంకర్ మూవీతో వచ్చిన ఆనందం ఆమెకు ఎంతో కాలం నిలవలేదు. వరుస ప్లాప్స్ తో డీలా పడింది. అనేక అంచనాల మధ్య విడుదలైన డిస్కో రాజా దారుణమైన ఫలితం అందుకుంది. ఇక సోలో బ్రతుకే సో బెటర్ యావరేజ్ టాక్ తెచ్చుకోగా సంక్రాంతి రిలీజ్ అల్లుడు అదుర్స్ ప్లాప్ ఖాతాలో చేరిపోయింది. దీంతో నభా కెరీర్ కి ఎండ్ కార్డు పడింది. కనీసం టైర్ టు హీరోలు కూడా ఆమెను పట్టించుకోవడం లేదు. ఐరన్ లెగ్ ఇమేజ్ వస్తే పోగొట్టుకోవడం కష్టం. హిట్ చుట్టూ తిరిగే పరిశ్రమలో ఇన్ని ప్లాప్స్ తో నెట్టుకు రావడం కష్టమే.