ఇప్పుడు రండి.. కార్తికేయ 2ని ఎవరాపుతారో చూసుకుందాం.. మరోసారి వివాదం రేపిన నటి  

దేశవ్యాప్తంగా కార్తికేయ 2 చిత్రం సృష్టిస్తున్న సంచలనం అంతా ఇంతా కాదు. నిఖిల్, అనుపమ పరమేశ్వరన్ ప్రధాన పాత్రల్లో చందూ ముండేటి తెరకెక్కించిన ఈ చిత్రం 100 కోట్ల దిశగా పరుగులు తీస్తోంది. అసలు థియేటర్లే దొరకని పరిస్థితి నుంచి ఇండియా మొత్తం సంచలనం సృష్టించే స్థాయిలో ఈ చిత్రం విజయాన్ని నమోదు చేసుకుంది. 

ప్రస్తుతం కార్తికేయ 2కి పోటీగా బలమైన చిత్రాలు ఏవీ లేకపోవడం కూడా నిఖిల్ మూవీకి బాగా కలసి వస్తోంది. ఇటీవల విడుదలైన చిత్రాలు బాక్సాఫీస్ వద్ద బోల్తా కొడుతున్నాయి. హిందీలో కార్తికేయ 2 క్రేజ్ విపరీతంగా ఉంది. మౌత్ టాక్ తోనే థియేటర్స్ కి జనాలు ఎగబడుతున్నారు. కర్నూలులో చిత్ర యూనిట్ గురువారం రోజు విజయోత్సవ వేడుకలు నిర్వహించారు. 

ఈ సక్సెస్ సెలెబ్రేషన్స్ లో సీనియర్ నటి తులసి చేసిన కామెంట్స్ వివాదంగా మారేలా కనిపిస్తున్నాయి. తులసి మాట్లాడుతూ.. ఈ మూవీ రిలీజ్ తర్వాత నాకు ఆస్ట్రేలియా నుంచి కాల్ వచ్చింది. ఈ చిత్ర దర్శకుడు టీచరా లేక లెక్చరర్ అని అడిగారు. ఈ చిత్రంలో ప్రతి అంశానికి అద్భుతమైన నిర్వచనం ఇచ్చారు అని ప్రశంసించారు. 

శ్రీకృష్ణుడు గురించి చందు ముండేటి మనకు అనేక విషయాలు గుర్తుకు చేశారు అని తులసి అన్నారు. కృష్ణుడు కూడా ఒక మనిషే.. చిన్నప్పుడు అల్లరివాడు.. ఆ తర్వాత కృష్ణుడు అన్ని విషయాలు నేర్చుకున్నాడు. తాను నేర్చుకున్న విషయాలని జనాలకు వదిలేశాడు అని తులసి తెలిపారు. 

మాది చిన్న సినిమానే. ఎలుక కూడానా చిన్నదే. ఎలుక చిన్న రంద్రం చేస్తే.. ఆ రంద్రంలోనుంచి చాలానే వచ్చేస్తాయి. ఆ రంద్రంలో నుంచి డైమండ్స్ కూడా తీసుకోవచ్చు అని తులసి అన్నారు. కార్తికేయ 2 చిత్రం పెద్ద ఆర్మీనే క్రియేట్ చేసింది. ఇప్పుడు ఈ చిత్రాన్ని ఎవరు ఆపగలరు.. చూసుకుందాం రమ్మనండి అంటూ కామెంట్స్ చేశారు. ఈ కామెంట్స్ వైరల్ గా మారాయి. 

కార్తికేయ 2 రిలీజ్ కి ముందు ఈ చిత్రాన్ని అడ్డుకునేందుకు చాలా ప్రయత్నాలు జరిగాయని ప్రచారం జరిగింది. ఈ వ్యవహారంలో దిల్ రాజు కూడా విమర్శలు ఎదుర్కొన్నారు. వివాదం సద్దుమణిగింది అనుకుంటున్న తరుణంలో నటి తులసి కామెంట్స్ మరోసారి దుమారం రేపుతున్నాయి. కార్తికేయ, కార్తికేయ2 చిత్రాల్లో తులసి నిఖిల్ తల్లి పాత్రలో నటించారు.