Saudi Visa: సౌదీ ట్రిప్ వేయాలనుకునే వారికి గుడ్ న్యూస్. టూరిస్టులకు ప్రయాణం ఈజీ చేసేందుకు ఆ ప్రభుత్వం ప్యాకేజీ వీసా విధానం తీసుకొచ్చింది. దీనివల్ల వీసా, టికెట్లు, హోటల్ బుకింగ్, ట్రావెల్ సేవలన్నింటిని ఒకేసారి బుక్ చేసే సౌకర్యం అందుబాటులోకి రానుంది.
సౌదీ అరేబియా ప్రభుత్వం టూరిస్టుల కోసం కొత్త 'ప్యాకేజీ వీసా' విధానం తీసుకొచ్చింది. టూరిస్ట్ వీసా దరఖాస్తు, ప్రయాణ బుకింగ్లను ఒకే సిస్టమ్ ద్వారా పూర్తి చేసే డిజిటల్ ప్రాజెక్ట్ ఇది. వీసా, ఫ్లైట్ టికెట్, హోటల్ బుకింగ్ వేర్వేరుగా బుక్ చేయాల్సిన పనిలేకుండా చేయడమే ఈ కొత్త విధానం ముఖ్య ఉద్దేశం.
28
తొలి దశలో ఎంపిక చేసిన దేశాల్లో మాత్రమే
ఈ ప్యాకేజీ వీసా విధానాన్ని ప్రస్తుతం ఎంపిక చేసిన కొన్ని అంతర్జాతీయ మార్కెట్లలోనే ప్రారంభించారు. గుర్తింపు పొందిన ట్రావెల్, టూరిజం సర్వీస్ ప్రొవైడర్ల ద్వారా తొలి దశ సేవలు అందిస్తున్నారు. త్వరలోనే మరిన్ని దేశాలకు ఈ పథకాన్ని విస్తరించాలని సౌదీ ప్రభుత్వం లక్ష్యంగా పెట్టుకుంది.
38
టూరిజం డెవలప్ మెంట్ చేయడమే ముఖ్య ఉద్దేశం
సౌదీ అరేబియా తన టూరిజం డెవలప్ చేసేందుకు చేపట్టిన ప్రణాళికల్లో ఈ కొత్త వీసా విధానం కూడా ఒకటి. గతంలో ఈ-వీసా, వీసా ఆన్ అరైవల్, స్టాప్ఓవర్ ట్రాన్సిట్ వీసా వంటి సౌకర్యాలను ప్రవేశపెట్టింది. వీటి ఫలితంగా 2025 నాటికి 2.9 కోట్ల మంది విదేశీ సందర్శకులు సౌదీకి వస్తారని అంచనా వేశారు.
ఈ పథకంపై సౌదీ పర్యాటక శాఖ మంత్రి అహ్మద్ అల్-ఖతీబ్ స్పందించారు. సౌదీకి వచ్చే సందర్శకుల ప్రయాణాన్ని మరింత సులభతరం చేయడమే తమ లక్ష్యమని ఆయన స్పష్టం చేశారు. వీసా జారీని ప్రయాణ బుకింగ్తో అనుసంధానించడం ద్వారా సందర్శకుల ప్రయాణ ప్రక్రియ సులభం అవుతుందని, పర్యాటక రంగంలోని వివిధ సేవలను మరింత సమన్వయం చేయవచ్చని మంత్రి తెలిపారు.
58
ప్రయాణికులకు లభించే ప్రధాన సౌకర్యాలు
ఈ ప్యాకేజీ వీసాతో ప్రయాణికులు ఫ్లైట్ టికెట్, హోటల్ వసతి, వీసా దరఖాస్తును ఒకే ప్యాకేజీలో భాగంగా ఏర్పాటు చేసుకోవచ్చు. అంతేకాకుండా, సౌదీలోని పర్యాటక కేంద్రాలను సందర్శించడం, వివిధ కార్యక్రమాల్లో పాల్గొనడం, అక్కడి అనుభవాలను ఆస్వాదించడం వంటి సౌకర్యాలను కూడా ఈ ప్యాకేజీలో చేర్చుకోవచ్చు.
68
బుకింగ్ నుంచి ప్రయాణం వరకు ఒకే వ్యవస్థ
ప్రయాణాన్ని ప్లానింగ్ నుంచి సౌదీలో అడుగుపెట్టే వరకు, ప్రయాణికులకు బెస్ట్ మెమోరీస్ ను అందించడమే ఈ కొత్త వ్యవస్థ లక్ష్యం. వేర్వేరు సేవల కోసం అనేక ప్లాట్ఫామ్లను ఉపయోగించాల్సిన అవసరం ఉండదు. దాని వల్ల ప్రయాణాన్ని మరింత సులభతరం చేస్తుంది.
78
గుర్తింపు పొందిన సంస్థల ద్వారానే సేవలు
ఈ ప్యాకేజీ వీసా అన్ని ట్రావెల్ ఏజెన్సీల ద్వారా అందుబాటులో ఉండదు. నిర్దిష్ట ప్రమాణాలను పాటించే గుర్తింపు పొందిన ట్రావెల్, టూరిజం సర్వీస్ ప్రొవైడర్లకు మాత్రమే ఈ సదుపాయం కల్పించారు. సందర్శకులకు ఉత్తమ సేవను అందించడానికి, 24 గంటల కస్టమర్ సపోర్ట్ ఇచ్చే సంస్థలనే ఈ పథకంలో చేర్చారు.
88
ప్రపంచ పర్యాటక కేంద్రంగా మారేందుకు సౌదీ అడుగులు
పర్యాటక రంగంలో పెద్దపీట వేయాలని లక్ష్యంగా పెట్టుకున్న సౌదీ అరేబియా, ఈ ప్యాకేజీ వీసాతో మరో ముందడుగు వేసింది. ప్రయాణ ప్రక్రియలను సులభతరం చేయడం ద్వారా ఎక్కువ మంది విదేశీ సందర్శకులను ఆకర్షించాలని ఆ దేశం ప్రయత్నిస్తోంది. ఈ కొత్త విధానం సౌదీ పర్యాటక రంగ వృద్ధికి మరింత ఊతమిస్తుందని నిపుణులు అంచనా వేస్తున్నారు.
