ఒకేసారి రెండు సినిమాల రిలీజ్‌ డేట్స్ ప్రకటించిన వెంకీమామ.. ఈ ఏడాది డబుల్ బొనాంజా

విక్టరీ వెంకటేష్‌ తాను నటిస్తున్న రెండు సినిమాల విడుదల తేదీలను ప్రకటించేశాడు. ఓ వైపు ఫన్‌ అండ్‌ ఫ్రస్టేషన్‌ `ఎఫ్‌3`, మరోవైపు `అసురన్‌` రీమేక్‌ `నారప్ప` విడుదల తేదీలను ప్రకటించాడు. 

వెంకటేష్‌ ప్రస్తుతం రెండు సినిమాల్లో నటిస్తున్నారు. ఒకటి `నారప్ప`, మరొకటి `ఎఫ్‌3`. `నారప్ప` దాదాపు షూటింగ్‌ చివరి దశకు చేరుకోగా, మరోవైపు `ఎఫ్‌3` ఇటీవల ప్రారంభించారు. ఈ నేపథ్యంలో తాజాగా రెండు సినిమాల విడుదల తేదీలను ప్రకటించారు. `నారప్ప` చిత్రాన్ని మే 14న విడుదల చేయనున్నట్టు వెల్లడించారు. మరోవైపు `ఎఫ్‌2`కి సీక్వెల్‌గా రూపొందుతున్న `ఎఫ్‌3` సినిమాని ఆగస్‌ 27న విడుదల చేయబోతున్నట్టు ప్రకటించారు. 

తమిళంలో ధనుష్‌ హీరోగా రూపొంది సంచలన విజయం సాధించిన `అసురన్‌`కి రీమేక్‌ `నారప్ప` శ్రీకాంత్‌ అడ్డాల దర్శకత్వం వహిస్తున్నారు. ఇందులో ప్రియమణి హీరోయిన్‌గా నటిస్తుంది. సురేష్‌ ప్రొడక్షన్స్‌, వి క్రియేషన్స్ పతాకాలపై సురేష్‌బాబు, కలైపులి ఎస్‌ థాను సంయుక్తంగా నిర్మిస్తున్నారు. యాక్షన్‌ ఎంటర్‌టైనర్‌గా ఈ సినిమా రూపొందుతుంది. ఇప్పటికే విడుదలైన ఈ చిత్ర లుక్‌లో ఆకట్టుకుంటున్నాయి. ఇందులో వెంకటేష్‌ యంగ్‌, అండ్‌ ఓల్డ్  రెండు గెటప్‌లో కనిపించనున్నారు. 

దీంతోపాటు వరుణ్‌ తేజ్‌తో కలిసి రెండేళ్ల క్రితం `ఎఫ్‌2`తో బ్లాక్‌బస్టర్‌ అందుకున్నారు వెంకీ. అనిల్‌ రావిపూడి దీనికి దర్శకుడు. దీనికి సీక్వెల్‌` ఎఫ్‌3` రూపొందుతుంది. ఇందులో తమన్నా, మెహరీన్‌ హీరోయిన్లుగా నటిస్తున్నారు. ఈ సినిమా షూటింగ్‌ ఇటీవల ప్రారంభమైంది. డబ్బు చుట్టూ నెలకొన్న ఫన్‌ అండ్‌ ఫ్రస్టేషన్‌ ప్రధానంగా సినిమా సాగుతుందని తెలుస్తుంది. ఈ సినిమాని శ్రీ వెంకటేశ్వర క్రియేషన్స్ పతాకంపై దిల్‌రాజు నిర్మిస్తున్నారు.