రోగ్' మూవీ రివ్యూ

చిత్రం : రోగ్ నటీనటులు : ఇషాన్, మన్నారా చోప్రా, ఏంజెలా, అనూప్ సింగ్ ఠాకూర్, సుబ్బరాజు సంగీతం : సునీల్ కశ్యప్ దర్శకత్వం : పూరి జగన్నాథ్ నిర్మాత : సి.ఆర్.మనోహర్, సి.ఆర్.గోపి ఏసియానెట్ రేటింగ్: 3/5

కథ :
చంటి (ఇషాన్) ప్రేమ కోసం ప్రాణం ఇచ్చేంత గొప్ప ప్రేమికుడు. కమిషనర్ చెల్లెలైన అంజలి(ఏంజెలా)ని ప్రాణంగా ప్రేమిస్తాడు. కానీ కమిషనర్ తనతో పనిచేసే ఐపియస్ ఆఫీసర్(సుబ్బరాజు)తో అంజలికి నిశ్చితార్థం ఏర్పాట్లు చేస్తాడు. విషయం తెలుసుకున్న చంటి కమిషనర్ ఇంటికెళ్లి గొడవ చేస్తాడు. ఆ గొడవలో ఓ కానిస్టేబుల్ ను బలంగా కొట్టడంతో అతని రెండు కాళ్లు చచ్చుబడిపోతాయి. దీంతో చంటికి రెండేళ్ల శిక్షపడుతుంది. జైల్లో ఉండగానే తను ప్రేమించిన అంజలి తనని మోసం చేసి సుబ్బరాజును పెళ్లి చేసుకుందని తెలుసుకున్న చంటి, అమ్మాయిల మీద ద్వేషం పెంచుకుంటాడు.

జైలు నుంచి విడుదలైన తరువాత నేరుగా ఇంటికొచ్చిన చంటికి ఇంట్లో తండ్రి క్లాస్ పీకుతాడు. దాంతో తన వల్ల నష్టపోయిన కానిస్టేబుల్ కుటుంబాన్ని ఆదుకుని, వాళ్లు సెటిలయ్యాక తను బ్యాంకాక్ వెళ్లి సెటిలవ్వాలని నిర్ణయించుకుంటాడు. వీలైనంత తక్కువ సమయంలో ఎక్కువ డబ్బు సంపాదించేలా సేట్ వద్ద రెండు పనుల్లో చేరతాడు. రికవరీ ఏజెంట్ గా, ఆటో డ్రైవర్ గా పనిచేస్తుంటాడు. అయితే చంటి నుంచి సాయం పొందడానికి కానిస్టేబుల్ కుటుంబం అంగీకరించదు. వాళ్లకు ఇష్టం లేకపోయినా వాళ్ల ఇంటి ముందే ఉండి వాళ్ల అప్పులన్ని తీర్చేస్తాడు. ఈ విషయం తెలుసుకున్న కానిస్టేబుల్ చెల్లెలు అంజలి(మన్నారా చోప్రా) అతన్ని ప్రేమిస్తుంది. కానీ తనను మోసం చేసిన అమ్మాయి పేరు కూడా అంజలినే కావటంతో చంటి ముందు కాదన్నా.. తరువాత అంజలికి దగ్గరవుతాడు.

అదే సమయంలో జైలు నుంచి పారిపోయిన సైకో(అనూప్ సింగ్), చంటి ఆటోలో పారిపోయేందుకు ప్రయత్నిస్తాడు. అమ్మాయి వల్లే తను జైలుకు వెళ్లానని చెప్పడంతో చంటి అతనికి సహాయం చేస్తాడు. కానీ ఆ సైకో అంజలి(మన్నారా)ని చంపడానికి ఆమె మీద ఎటాక్ చేస్తాడు. ఈ ఎటాక్ నుంచి తనని కాపాడిన చంటికి, అంజలి మీద పగతోనే సైకో జైలు నుంచి తప్పించుకున్నాడని తెలుస్తుంది. అసలు ఆ సైకో అంజలిని ఎందుకు చంపాలనుకుంటున్నాడు..? వాడి నుంచి చంటి, అంజలిని ఎలా కాపాడాడు అన్నదే మిగతా కథ.

నటీనటులు :
రోగ్ సినిమాతో హీరోగా ఆరంగేట్రం చేసిన ఇషాన్, మంచి నటన కనబరిచాడు. లుక్స్ పరంగా పూరి మార్క్ హీరోయిజంలో పర్ఫెక్ట్ గా సెట్ అయిన ఇషాన్, మాస్ హీరోకు కావాల్సిన అన్ని క్వాలిటీస్ ను తొలి సినిమాలోనే చూపించే ప్రయత్నం చేశాడు. హీరోయిన్స్ గా ఏంజెలా గ్లామర్ షోకే పరిమితం కాగా.. మన్నారా చోప్రా ఫరవాలేదనిపించింది.  సింగం3, విన్నర్ సినిమాల్లో స్టైలిష్ గా కనిపించిన అనూప్ రోగ్ లో సైకోగా మెప్పించాడు. విలనిజంతో పాటు పాత్రకు సహజంగా ఉండే కామెడీ లక్షణాలతోనూ ఆకట్టుకున్నాడు. అలీ, పోసాని కృష్ణమురళి, సుబ్బరాజు, తులసి తమ తమ పరిథి మేరకు మెప్పించారు.

సాంకేతిక నిపుణులు :
పూరి జగన్నాథ్ మరోసారి రోగ్ విషయంలోనూ తన రొటీన్ ఫార్ములానే ఫాలో అయ్యాడు. హీరో క్యారెక్టర్ లో యారగెన్స్, గ్లామర్ షోకే పరిమితమైన హీరోయిన్స్, బీచ్ సాంగ్స్, కామెడీ పండించే విలన్, అలీ కామెడీ ట్రాక్ ఇదే ఫార్ములాతో రోగ్ సినిమాను తెరకెక్కించాడు. అక్కడక్కడా పూరి కలం కాస్త మెరిసినా.. ఓవరాల్ పూరి స్టైల్, టేకింగ్ రొటీన్ గా అనిపించింది. సునీల్ కశ్యప్ అందించిన పాటలు, బ్యాక్ గ్రౌండ్ స్కోర్ ఆకట్టుకున్నాయి. హీరో, విలన్ క్యారెక్టర్ లకు డిజైన్ చేసిన థీమ్స్ వాళ్ల క్యారెక్టర్స్ ను మరింతగా ఎలివేట్ చేశాయి. ముఖేష్ సినిమాటోగ్రఫి, జునైద్ సిద్ధిఖీ ఎడిటింగ్ సినిమా స్థాయికి తగ్గట్టుగా ఉంది. తన్వి ఫిలింస్ నిర్మాణ విలువలు బాగున్నాయి.

ప్లస్ పాయింట్స్ :
విలన్ క్యారెక్టరైజేషన్, అనూప్ సింగ్ నటన
నేపథ్య సంగీతం

మైనస్ పాయింట్స్ :
రొటీన్ ఫార్ములా, పూరీ టేకింగ్