Sunny Leone:సన్నీ లియోన్‌కు హోం మినిస్టర్ వార్నింగ్‌! ఆ ఫొటో వైరల్

హోంమంత్రి నరోత్తమ్‌ మిశ్రా కూడా స్పందించారు. కొందరు కావాలనే హిందువుల మనోభావాలను దెబ్బతీసే విధంగా ప్రవర్తిస్తున్నారంటూ వ్యాఖ్యానించారు.  

బాలీవుడ్‌ నటి సన్నీ లియోన్‌ నటించిన ఓ వీడియో వివాదాస్పదమైన సంగతి తెలిసిందే. హిందువుల మనోభావాలు దెబ్బతీసేలా ఆ వీడియో ఉందని అన్ని వైపుల నుంచీ విమర్శలు వెల్లువెత్తుతున్నాయి. ఆ వీడియో మూడు రోజుల్లో తొలగించకుంటే కఠిన చర్యలు తీసుకోవాల్సి ఉంటుందని మధ్యప్రదేశ్‌ హోంమంత్రి నరోత్తమ్‌ మిశ్రా సన్నీ లియోన్‌తో పాటు ఆ పాట పాడిన సింగర్స్ ను హెచ్చరించారు. ఈ నేపధ్యంలో సోషల్ మీడియాలో ఆమె క్రిస్మస్ ట్రీ తో ఉన్న ఫొటోను వైరల్ చేస్తున్నారు. 

వివరాల్లోకి వెళితే...‘మధుబన్‌ మే రాధిక నాచే’ పేరిట హిందీలో ఓ వీడియో సాంగ్‌ విడుదలైంది. షరీబ్‌, తోషి ఈ పాటను ఆలపించారు. సన్నీ లియోన్‌ నర్తించారు. 1960లో వచ్చిన ‘కోహినూర్‌’ చిత్రంలోని ‘మధుబన్‌ మే రాధిక నాచే రే’ అనే పాటలోని పల్లవిని ఈ పాటలా ఉంటుంది. పాత పాటను మహ్మద్‌ రఫీ పాడగా.. దిలీప్‌ కుమార్‌ నటించారు.  డిసెంబర్‌ 22న కొత్త పాటను విడుదల చేశారు. ఉత్తర్‌ప్రదేశ్‌కు చెందిన కొందరు అర్చకులు ఈ పాటపై అభ్యంతరం వ్యక్తంచేశారు. 

తాజాగా మధ్యప్రదేశ్‌ హోంమంత్రి నరోత్తమ్‌ మిశ్రా కూడా స్పందించారు. కొందరు కావాలనే హిందువుల మనోభావాలను దెబ్బతీసే విధంగా ప్రవర్తిస్తున్నారంటూ వ్యాఖ్యానించారు. ‘మధుబన్‌ మే రాధిక’ కూడా ఆ కోవకు చెందినదేనని, ఈ వ్యవహారంలో సన్నీ లియోన్‌, షరీబ్‌, తోషి వెంటనే క్షమాపణ చెప్పాలని డిమాండ్‌ చేశారు. మూడ్రోజుల్లోగా వీడియో తొలగించకుంటే తగిన చర్యలు తీసుకుంటామని హెచ్చరించారు. ఈ నేపధ్యంలో క్రిస్మస్ ని పురస్కరించుకుని ఇనిస్ట్రాలో షేర్ చేసిన క్రిస్మస్ ట్రీ ఫొటోను జనం వైరల్ చేయటం ఆసక్తికర విషయంగా మారింది. 

ఇక మధ్యప్రదేశ్‌ హోంమంత్రి హెచ్చరికల నేపథ్యంలో ఆ పాటను విడుదల చేసిన మ్యూజిక్‌ కంపెనీ ‘సరిగమప’ లిరిక్స్‌ మార్చాలని నిర్ణయించింది. ప్రజల మనోభావాలను దృష్టిలో ఉంచుకుని ఈ నిర్ణయం తీసుకున్నట్లు వెల్లడించింది. మార్పు చేసిన లిరిక్స్‌తో పాటు, పాట పేరును కూడా మారుస్తామని పేర్కొంది. రాబోయే మూడు రోజుల్లో అన్ని వేదికల్లోనూ మార్పు చేసిన లిరిక్స్‌ను అందుబాటులో ఉంచుతామని తెలిపింది. 

 గతంలో మంగళ సూత్రాన్ని ఉద్దేశిస్తూ ఓ జ్యువెలరీ సంస్థ రూపొందించిన ప్రకటనపైనా నరోత్తమ్‌ మిశ్రా అభ్యంతరం వ్యక్తంచేయడంతో ఆ ప్రకటనను ఆ సంస్థ ఉపసంహరించుకుంది. డాబర్‌ రూపొందించిన మరో యాడ్‌ సైతం ఇలాంటి హెచ్చరికలే ఎదుర్కొంది. ఆ ప్రకటనను ఉపసంహరించుకోవాల్సి వచ్చింది.