Kantara: ఆస్కార్ బరిలో `కాంతార`.. రెండు విభాగాల్లో అవార్డు కోసం పోటీ..
సారాంశం
కన్నడ సంచలనం `కాంతార` మూవీ మరో సంచలనం సృష్టించబోతుంది. ఈ సినిమా ఆలస్యంగా ఆస్కార్ బరిలో నిలిచింది. తాజాగా నిర్మాణ సంస్థ ప్రకటించింది.
రాజమౌళి రూపొందించిన `ఆర్ఆర్ఆర్` చిత్రం ఆస్కార్ బరిలో నిలిచిన విషయం తెలిసిందే. తాజాగా మరో ఇండియన్ మూవీ ఆస్కార్ పోటీలోకి దూసుకొచ్చింది. ఇటీవల కన్నడ కన్నడ సంచలనం `కాంతార` మూవీ ఆస్కార్ పోటీలోకి వచ్చింది. రెండు విభాగాల్లో ఈ సినిమా అకాడమీ అవార్డుల కోసం పోటీ పడుతుంది. తాజాగా ఈ విషయాన్ని చిత్ర నిర్మాణ సంస్థ హోంబలే ఫిల్మ్స్ ట్విట్టర్ ద్వారా ప్రకటించింది.
`కాంతార` చిత్రం రెండు విభాగాల్లో ఆస్కార్కి అర్హత లభించినందుకు చాలా ఆనందంగా ఉంది. మాకు మద్దతుగా నిలిచిన వారందరికి ధన్యవాదాలు. మీ అందరి మద్దతుతో ఈ ప్రయాణాన్ని పంచుకోవడానికి ఎదురుచూస్తున్నాం. ఇది మరింత ముందుకు వెళ్తుందని ఆశిస్తున్నాం. అందుకోసం ఆతృతగా ఉన్నాం` అని పేర్కొంది నిర్మాణ సంస్థ. ఇది ఉత్తమ నటుడు, మూవీ విభాగంలో ఆస్కార్కి పంపించబడిందని తెలుస్తుంది.
ఇప్పటికే `ఆర్ఆర్ఆర్` మూవీ ఆస్కార్ బరిలో ఉంది. ఇది ఒరిజినల్ సాంగ్(నాటు నాటు), ఉత్తమ నటులు, ఉత్తమ దర్శకుడు విభాగాల్లో ఆస్కార్ కోసం పోటీ పడుతుంది. అయితే ఈ నెలలో ఆస్కార్ నామినేషన్లు ఫైనల్ అవుతాయి. ఈ నామినేషన్లలో మన సినిమాలు నామినేట్ అయితే ఇక డైరెక్ట్ గా ఆస్కార్ అవార్డు కోసం పోటీలో ఉన్నట్టు. ఇండియన్ సినిమాకి ఆస్కార్ అనే కల ఇన్నాళ్లకైనా తీరుతుందా అనేది ఉత్కంఠగా మారింది.
`కాంతార` చిత్రాన్ని దర్శకుడు, నటుడు రిషబ్ శెట్టి నటిస్తూ రూపొందించారు. హోంబలే ఫిల్మ్స్ నిర్మించారు. ఇందులో సప్తమి గౌడ హీరోయిన్గా నటించగా, కిశోర్, అచ్యుత్ కుమార్ ముఖ్య పాత్రలు పోషించారు. గతేడాది సెప్టెంబర్ 30న కన్నడలో విడుదలైన ఈ సినిమా పెద్ద విజయం సాధించింది. ఆ తర్వాత పది రోజులకు ఇతర భాషల్లో డబ్ అయ్యింది. తెలుగులోనూ విడుదలై సంచలన విజయాన్ని సాధించింది. ఈ మూవీ ప్రపంచ వ్యాప్తంగా రూ.450కోట్ల గ్రాస్ని కలెక్ట్ చేయడం విశేషం. అతి తక్కువ బడ్జెట్తో రూపొంది, అత్యధిక కలెక్షన్లు సాధించిన చిత్రాల్లో ఫస్ట్ ప్లేస్లో నిలిచింది `కాంతార`.