“గౌతమిపుత్ర” ప్రతి ఫ్రేములో “బాహుబలి” ఛాయలు

“గౌతమిపుత్ర శాతకర్ణి” ‘బాహుబలి’ని మించి పోతుందా? నిన్న విడుదలై రికార్డులు సృష్టిస్తున్న శాతకర్ణి ట్రైలర్ ఏం చెప్తోంది? ఇంత తక్కువ కాలంలో అంత క్వాలిటీ ఎలా సాధ్యమైంది? గౌతమి పుత్రపై బాహుబలి ప్రభావం ఎంతుంది?

నందమూరి బాలకృష్ణ వందో చిత్రం గౌతమిపుత్ర శాతకర్ణి ట్రయలర్ లాంచ్ అయిపోయింది. ఈ ట్రయలర్ విడుదలైన తర్వాత మూవీపై అమాంతం అంచనాలు పెరిగిపోతున్నాయి. క్రిష్ తనదైన శైలిలో తెరకెక్కించినట్లు స్పష్టమవుతోంది. అయితే ఇంత తక్కువ కాలంలో అంతలా ఆకర్షించేలా ఆ సినిమా రూపొందించడం వెనుక అసలు కారణం ఏంటి..

గౌతమిపుత్ర శాతకర్ణి ట్రయలర్ కు అనూహ్య స్పందన వస్తోంది. చూసిన వారంతా అద్భుతం అని ప్రశంసలు కురిస్తున్నారు. ప్రశంసలు కురిపించిన వారిలో బాహుబలి చిత్రంతో తెలుగు సినిమా స్థాయిని ప్రపంచ స్థాయికి తీసుకెళ్లిన జక్కన్న రాజమౌళి కూడా ఉన్నాడు. దర్శకుడు రాజమౌళి సైతం క్రిష్ మేకింగ్ పట్ల ఫిదా అయిపోయానని తన ట్విట్టర్ ఎకౌంట్ లో షేర్ చేశాడు. ఎనిమిది నెలల్లోనే అద్భుతం చేశావంటూ క్రిష్ ను రాజమౌళి ప్రశంసించాడు.

ఏకంగా రాజమౌళి కూడా క్రిష్ కు ప్రశంసలు కురిపిస్తున్నాడంటే గౌతమిపుత్రలో ఎంత స్టామినా ఉందో అర్థం చేసుకోవచ్చు. రాజమౌళితో పాటు సంచలన దర్శకుడు రామ్ గోపాల్ వర్మ కూడా క్రిష్ కు అభినందనలు తెలిపాడు. దీన్ని బట్టే అర్థం చేసుకోవచ్చు. క్రిష్ తెరకెక్కించిన గౌతమిపుత్ర శాతకర్ణిలో మేటర్ ఎంతుందో. అయితే ఇక్కడే ఉంది ట్విస్ట్ అంతా.

ట్రయలర్ చూసిన ప్రతి ఒక్కరిని ఇప్పుడు తొలుస్తునన్న ప్రశ్న ఒక్కటే. అదే గౌతమి పుత్ర శాతకర్ణి సినిమా బాహుబలి రికార్డులను తిరగరాస్తుందా అని. క్రిష్ ను ఎంత పొగడ్తల్లో ముంచెత్తినా... జక్కన్న తనదైన స్థాయి నిలుపుకోవడానికి ఆపసోపాలు పడుతున్నాడు. గౌతమిపుత్ర శాతకర్ణి తన చిత్రం బాహుబలితో పోలిస్తే మిని అని  స్టేట్ మెంట్ కూడా ఇచ్చాడు. అయితే గౌతమిపుత్ర ట్రయలర్ చూస్తే.. జక్కన్న ఈ స్టేట్ మెంట్ ఇవ్వటం సరైందే అనిపిస్తోంది.

శాతకర్ణి ప్రతి ఫ్రేములోనూ బాహుబలి నుంచి ఇన్ స్పయిర్ అయినట్లు స్పష్టంగా తెలుస్తోంది.  ఇది ఏవిధంగా క్రిష్ క్రియోటివిటిని తక్కువ చేయడం కాదు.

ఒక సాంస్కృతిక సంఘటన సమాజాన్ని కుదిపేసిన తర్వాత దాని ప్రభావం చాలా కాలం దాకా రకరకాల రూపాల్లో ప్రతిఫలిస్తూనే ఉంటుంది. ఈ తరహా సినిమాలు బాహు బలి  ప్రభావం నుంచి  బయటపడటానికి సమయం పడుతుంది.

నిజానికి ఈ ట్రయలర్ చూసిన వాళ్లందరికీ షాకింగ్ అనిపిస్తున్నది ఒకే అంశం. అదే.. కేవలం ఎనిమిది నెలల్లో ఇంత అద్భుతంగా చిత్రాన్ని తెరకెక్కించారా అని. చిత్రీకరణ మాత్రమే కాదు ట్రయలర్లో వినిపించిన డైలాగ్స్ వింటుంటేనే రోమాలు నిలబడుతున్న ఫీలింగ్. మరి థియేటర్ లో ఎలా ఉంటుందో ఆ ఫీలింగ్ అనిపిస్తోంది. ఇంతటి అద్భుతాన్నని ఆవిష్కరించిన క్రిష్ కు అభినందనలు తెలపాల్సిందే.

గౌతమిపుత్ర శాతకర్ణి చిత్రం బాహుబలి రికార్డులను తిరగ రాస్తుందా అనేది ప్రస్థుతానికి వెయిట్ చేయాల్సిన అంశం. కానీ ఈ చిత్రం ఇంత త్వరగా పూర్తి కావడానికి, ప్రతి ఫ్రేములో బాహుబలి స్ఫూర్తి మాత్రం కనిపిస్తోంది. ట్రయలర్ లో చూస్తే చిన్న పిల్లాడిని బాలయ్య ఎత్తుకోవడం, యుద్ధ సన్నివేశాల్లో బాహుబలి ప్రేరణ కనిపించడం, ఐటమ్ అనాలో మరేదైనా కేరక్టర్ అనాలో తెలియని ఓ అందమైన అమ్మాయి ఫ్రేమ్ చూసినా బాహుబలిలోని అతుక్కుపో సాంగ్ గుర్తుకొస్తోంది. అదీ ట్రయలర్ కథ. అయితే సినిమా కథ పూర్తి భిన్నమైంది కావడం, శాతకర్ణి చరిత్ర మనందరికీ దగ్గరగా అనిపించడం మాత్రం ఖాయం.