ప్రభాస్‌ `ఆదిపురుష్‌` షూటింగ్‌లో భారీ అగ్ని ప్రమాదం..

ప్రభాస్‌ హీరోగా నటిస్తున్న `ఆదిపురుష్‌` సినిమా షూటింగ్‌లో అగ్నిప్రమాదం చోటు చేసుకుంది. షూటింగ్‌ ప్రారంభమైన తొలిరోజే సెట్‌లో భారీ అగ్నిప్రమాదం చోటు చేసుకోవడం విచారకరం. ఇందులో గ్రీన్‌ స్ర్కీన్‌ క్రోమా సెటప్‌ మొత్తం కాలిబూడిదైందని తెలుస్తుంది. ముంబయిలోని గోర్‌గాన్‌ స్టూడియోలో ఈ అగ్ని ప్రమాదం చోటు చేసుకుంది. దీంతో ఒక్కసారిగా `ఆదిపురుష్‌` టీమ్‌ ఉలిక్కి పడింది. అయితే ఇందులో దర్శకుడు ఓరౌత్‌తోపాటు ఇతర టెక్నీషియన్లంతా క్షేమంగానే బయటపడినట్టు తెలుస్తుంది. కేవలం ఆస్తినష్టం జరిగినట్టు సమాచారం.

ప్రభాస్‌ హీరోగా ఓం రౌత్‌ దర్శకత్వంలో `ఆదిపురుష్‌` చిత్రం రూపొందుతుంది. ఇందులో రాముడిగా ప్రభాస్‌, రావణుడిగా సైఫ్‌ అలీఖాన్‌ నటిస్తున్నారు. రాముడి తల్లి అయిన కౌసల్యగా హేమా మాలిని నటిస్తారని టాక్‌. మంగళవారం ఉదయం ఈ సినిమా ప్రారంభమైందని ప్రభాస్‌, దర్శకుడు ఔం రౌత్‌ సోషల్‌ మీడియా ద్వారా తెలిపిన విషయం తెలిసిందే. అయితే ప్రారంభమైన రోజే ఇలాంటి ప్రమాదం చోటు చేసుకోవడంతో చిత్ర బృందం కాస్త ఆందోళనకి గురవుతున్నట్టు తెలుస్తుంది.