పవన్‌ కళ్యాణ్‌ హీరోగా రూపొందుతున్న `హరిహర వీరమల్లు` చిత్రంలో బాలీవుడ్‌ నటుడు బాబీ డియోల్‌ కీలక పాత్ర పోషిస్తున్నారు. తాజాగా ఆయన సెట్‌లోకి అడుగుపెట్టారు.
పవన్‌ కళ్యాణ్‌ నటిస్తున్న లేటెస్ట్ మూవీ `హరిహర వీరమల్లు`. పీరియాడికల్‌ మూవీగా తెరకెక్కే ఈ చిత్రానికి క్రిష్‌ దర్శకత్వం వహిస్తున్నారు. ఇందులో పవన్‌ కళ్యాణ్‌ బందిపోటు వీరమల్లు పాత్రలో కనిపించబోతున్నారు. అనేక వాయిదాల అనంతరం ఈ చిత్రం ఇప్పుడు శరవేగంగా చిత్రీకరణ జరుపుకుంటోంది. వీలైనంత త్వరగా సినిమాని పూర్తి చేయాలని భావిస్తున్నారు మేకర్స్. వచ్చే ఏడాది సమ్మర్‌లోగానీ, ద్వితీయార్థంలోగానీ రిలీజ్‌ చేయాలనుకుంటున్నారు.
ఈ నేపథ్యంలో తాజాగా మరో ఆసక్తికర అప్‌డేట్‌ ఇచ్చింది యూనిట్‌. ఈ చిత్రంలో బాలీవుడ్‌ నటుడు బాబీ డియోల్‌ కీలక పాత్రలో నటించబోతున్నట్టు వార్తలొచ్చిన విషయం తెలిసిందే. తాజాగా ఆయన శనివారం నుంచి షూటింగ్‌లో పాల్గొంటున్నాడు. శనివారం ఆయన సెట్‌లోకి అడుగుపెట్టారు. ఈ విషయాన్ని తెలియజేస్తూ చిత్ర బృందం ఓ వీడియోని విడుదల చేసింది. ఇందులో బాబీ డియోల్‌ బనియన్‌లోనే సెట్‌కి రావడం విశేషం. ప్రస్తుతం ఇది వైరల్‌ అవుతుంది.
ప్రస్తుతం `హరిహర వీరమల్లు` చిత్ర షూటింగ్‌ హైదరాబాద్‌లోని అన్నపూర్ణ సెవెన్‌ ఎకర్స్ లో జరుగుతుంది. పవన్‌ కళ్యాణ్‌ షూటింగ్‌లో పాల్గొంటున్నారు. అందులో భాగంగా బాబీ డియోల్‌, పవన్‌ కళ్యాణ్‌లపై కీలక సన్నివేశాలను తెరకెక్కించబోతున్నారట. ఇదిలా ఉంటే ఇందులో బాబీ డియోల్‌ ఔరంగజేబ్‌ పాత్రలో కనిపించనున్నట్టు తెలుస్తుంది, నెగటివ్‌ షేడ్స్ లో ఆయన పాత్ర ఉంటుందని తెలుస్తుంది. వీరమల్లుకి, ఔరంగజేబ్‌కి మధ్య జరిగే పోరాట సన్నివేశాలు హైలైట్‌గా నిలుస్తాయని టాక్‌.
నిధి అగర్వాల్‌ మెయిన్‌ హీరోయిన్‌గా, నోరా ఫతేహి మరో కథానాయికగా నటిస్తున్న ఈ చిత్రాన్ని మెగాసూర్య ప్రొడక్షన్‌ పతాకంపై ఏఎం రత్నం భారీ బడ్జెట్ తో తెరకెక్కిస్తున్నారు. దీన్ని పాన్‌ ఇండియా స్థాయిలో రూపొందిస్తున్నారు. పవన్‌ నటిస్తున్న తొలి పాన్‌ ఇండియా సినిమా `హరిహర వీరమల్లు` కావడం విశేషం. దీంతో ఈ సినిమా కోసం పవన్‌ ఫ్యాన్స్ ఈగర్‌గా వెయిట్‌ చేస్తున్నారు.