నాని `హాయ్ నాన్న`, నితిన్ `ఎక్ట్స్రా`పై `యానిమల్` దెబ్బ.. తల పట్టుకుంటున్న నిర్మాతలు..
సారాంశం
నాని నటించిన `హాయ్ నాన్న`, నితిన్ నటించిన `ఎక్ట్స్రా` సినిమాలపై యానిమల్ మూవీ చాలా ప్రభావం చూపిస్తుంది. వాటిని పట్టించుకునే వాళ్లే లేరు.
సందీప్ రెడ్డి వంగా దర్శకత్వంలో రూపొందుతున్న `యానిమల్` సినిమా ఇప్పుడు ఇండియా వైడ్గా భారీ హైప్ నెలకొంది. ఒక్క ట్రైలర్తో సినిమాపై అంచనాలను అమాంతం పెంచేశాడు దర్శకుడు సందీప్ రెడ్డి వంగా. బాలీవుడ్ స్టార్ హీరో రణ్బీర్ కపూర్ హీరోగా నటించడం ఈ సినిమాపై హైపర్కి మరో కారణం. అలాగే నేషనల్ క్రష్ రష్మిక మందన్నా, అనిల్ కపూర్, బాబీ డియోల్ వంటి భారీ స్టార్ కాస్టింగ్తో ఈ మూవీ రూపొందుతుంది.
డిసెంబర్ 1న ఈ చిత్రం విడుదల కాబోతుంది. దీంతో గత వారం రోజలుగా ఈ మూవీ గురించే అంతా మాట్లాడుకుంటున్నారు. దీని హైప్ ముందు తెలుగు సినిమాలు డీలా పడిపోతున్నాయి. ముఖ్యంగా నాని నటించిన `హాయ్ నాన్న`, నితిన్ హీరోగా నటిస్తున్న `ఎక్ట్సా` చిత్రాలపై `యానిమల్` ఎఫెక్ట్ గట్టిగా ఉంది. ఈ సినిమాలకు హైపర్ రావడం లేదు. నాని చాలా ప్రమోషన్స్ నిర్వహిస్తున్నారు. ప్రతి రోజు ఏదో ఓ రకంగా ఈవెంట్లో మెరుస్తున్నారు. వరుసగా ఇంటర్వ్యూలు ఇచ్చారు. కానీ ఈ మూవీ గురించి ఎవరూ చర్చించడం లేదు. నిన్న వైజాగ్లో ప్రీ రిలీజ్ ఈవెంట్ పెట్టినా దాని గురించి మాట్లాడుకునే వారే లేరు.
ఇక `యానిమల్` ప్రభావం `ఎక్ట్సా`పై మరింతగా ఉంది. ట్రైలర్ రిలీజ్ అయినా ఈ సినిమాకి హైప్ రాలేదు. అసలు ఈ మూవీ వస్తుందనే విషయమే జనాలకు వెళ్లలేదు. పైగా పెద్దగా ప్రమోషన్స్ లేవు. టీజర్, ట్రైలర్స్ పెద్దగా ఆకట్టుకునేలా లేవు. శ్రీలీల వంటి హీరోయిన్ ఉన్నా ఈ సినిమాని పట్టించుకోకపోవడం గమనార్హం. నితిన్కి వరుసగా ఫ్లాప్లు ఉండటం కూడా హైప్ రాకపోవడానికి కారణమని తెలుస్తుంది. అంతేకాదు ఈ సినిమా బిజినెస్ కూడా కాలేదని అంటున్నారు. దీంతో ఏం చేయాలో తోచక తలలు పట్టుకుంటున్నారు నిర్మాతలు.
మొత్తంగా డబ్బింగ్ మూవీ `యానిమల్` స్ట్రెయిట్ తెలుగు సినిమాలపై ఇంతటి ప్రభావం చూపించడం ఆశ్చర్యపరుస్తుంది. దీనికి కారణం సందీప్ డైరెక్షన్ అని చెప్పొచ్చు. దీని ప్రభావం ఈ వీకెండ్ వరకు ఉంటుంది. ఆ తర్వాత మాత్రమే ఈ రెండు సినిమాలకు స్కోప్ ఉంటుంది. ఆ సమయంలో లేస్తే ఒక లెక్క, లేవకపోతే మరో లెక్క. ఏదేమైనా `యానిమల్` ప్రభావం ఈ రెండు సినిమాలపై గట్టిగానే ఉంటుందని ట్రేడ్ వర్గాల అంచనా.