రాజశేఖర్ సినిమా సెట్ కోసం రూ.2 కోట్లు!

సీనియర్ హీరో రాజశేఖర్ నటుడిగా వరుస పరాజయాలు అందుకోవడంతో కొన్నాళ్లు గ్యాప్ తీసుకొని 'గరుడ వేగ' చిత్రంతో ప్రేక్షకుల ముందుకు వచ్చాడు. ప్రవీణ్ సత్తారు డైరెక్ట్ చేసిన ఈ సినిమా మంచి విజయాన్ని అందుకుంది. ఈ సినిమా    తరువాత దర్శకనిర్మాతలకు రాజశేఖర్ పై నమ్మకం పెరిగింది. ఆయనతో సినిమాలు చేయడానికి చాలా మంది నిర్మాతలు ముంచుకొచ్చారు.

అయితే రాజశేఖర్ మాత్రం ఏరి కోరి 'అ!' సినిమా డైరెక్టర్ ప్రశాంత్ వర్మతో సినిమా చేయడానికి సిద్ధమయ్యారు. ఈ సినిమాకు 'కల్కి' అనే టైటిల్ ను కూడా ఫిక్స్ చేశారు. 1980ల కాలంలో జరిగే పీరియాడిక్ డ్రామాతో ఈ సినిమాను రూపొందిస్తున్నారు.

ఈ నెల 19 నుండి హైదరాబాద్ లో సినిమా రెగ్యులర్ షూటింగ్ మొదలుకానుంది. ఈ సినిమా షూటింగ్ కోసం దాదాపు రూ.2 కోట్ల బడ్జెట్ తో భారీ సెట్ ను ఏర్పాటు చేస్తున్నారు. హైదరాబాద్ పటాన్ చెరువు దగ్గరలో ఈ సెట్ ను నిర్మించనున్నారు. సినిమాకు సంబంధించిన కీలక సన్నివేశాలను ఈ సెట్ లో తీయనున్నారు. ఈ సినిమాలో రాజశేఖర్ పోలీస్ పాత్రలో కనిపించనున్నారని సమాచారం. రాజశేఖర్ కుమార్తెలతో కలిసి నిర్మాత సి.కళ్యాణ్ ఈ సినిమాను నిర్మిస్తున్నారు.