దంచికొట్టిన షెఫాలీ వర్మ... 7 ఓవర్లలోనే మ్యాచ్‌ని ముగించిన ఢిల్లీ క్యాపిటల్స్...

Gujarat Giants vs Delhi Capitals Women: 19 బంతుల్లో హాఫ్ సెంచరీ... 28 బంతుల్లో 76 పరుగులు చేసిన షెఫాలీ వర్మ, 7.1 ఓవర్లలోనే మ్యాచ్‌ని ముగించిన ఢిల్లీ క్యాపిటల్స్... 

ముంబై ఇండియన్స్‌తో మ్యాచ్‌లో ఓడిన తర్వాత అద్భుత విజయంతో మళ్లీ బౌన్స్ బ్యాక్ అయ్యింది ఢిల్లీ క్యాపిటల్స్. బౌలర్లు అదరగొట్టడంతో గుజరాత్ జెయింట్స్‌ని 105 పరుగులకి కట్టడి చేసిన ఢిల్లీ క్యాపిటల్స్, ఈ టార్గెట్‌ని 7.1 ఓవర్లలోనే ఊది పక్కన పడేసింది...

యంగ్ సెన్సేషన్ షెఫాలీ వర్మ 19 బంతుల్లో హాఫ్ సెంచరీ బాదేసి బౌండరీల వర్షం కురిపించింది. మొదటి ఓవర్‌లో 4 పరుగులే రాగా తునుజా కన్వర్ వేసిన రెండో ఓవర్‌లో 14 పరుగులు రాబట్టిన షెఫాలీ వర్మ, కిమ్ గార్త్ వేసిన మూడో ఓవర్‌లో హ్యాట్రిక్ ఫోర్లు బాదింది...

అష్‌లీగ్ గార్నర్ వేసిన నాలుగో ఓవర్‌లో వరుసగా 4,4,6 బాదిన షెఫాలీ వర్మ ఆ తర్వాతి బంతికి సింగిల్ తీయగా చివరి రెండు బంతుల్లో 2 ఫోర్లు బాదింది ఢిల్లీ క్యాపిటల్స్ కెప్టెన్ మెగ్ లానింగ్. దీంతో ఆ ఓవర్‌లో 23 పరుగులు వచ్చేశాయి. మన్షీ జోసి వేసిన ఓవర్‌లో 2 ఫోర్లు బాది 19 బంతుల్లో హాఫ్ సెంచరీ అందుకుంది షెఫాలీ వర్మ...

ఆ తర్వాతి ఓవర్‌లో షెఫాలీ వరుసగా 2 సిక్సర్లు బాదడంతో పవర్ ప్లే ముగిసే సమయానికి వికెట్ కోల్పోకుండా 87 పరుగులు చేసింది ఢిల్లీ క్యాపిటల్స్. ఉమెన్స్ ప్రీమియర్ లీగ్‌ 2023 టోర్నీ పవర్ ప్లేలో ఇదే అత్యధిక స్కోరు...

పవర్ ప్లే ముగిసిన తర్వాత కూడా షెఫాలీ వర్మ జోరు తగ్గించలేదు. 7వ ఓవర్‌లో 4, 6,4 బాదిన షెఫాలీ వర్మ బాదుడుకి 7 ఓవర్లలో 103 పరుగుల స్కోరు చేసింది ఢిల్లీ క్యాపిటల్స్.  మెగ్ లానింగ్ 8వ ఓవర్‌ మొదటి బంతికి ఫోర్ బాది మ్యాచ్‌ని ముగించింది..

షెఫాలీ వర్మ 28 బంతుల్లో 10 ఫోర్లు, 5 సిక్సర్లతో 76 పరుగులు చేయగా మెగ్ లానింగ్ 15 బంతుల్లో 3 ఫోర్లతో 21 పరుగులు చేసింది. అంతకుముందు  టాస్ గెలిచి బ్యాటింగ్ ఎంచుకున్న నిర్ణీత 20 ఓవర్లలో 9 వికెట్లు కోల్పోయి 105 పరుగుల స్వల్ప స్కోరు చేయగలిగింది.. 

ఇన్నింగ్స్ రెండో బంతికే సబ్బినేని మేఘన వికెట్ కోల్పోయింది గుజరాత్ జెయింట్స్... 2 బంతులాడిన తెలుగమ్మాయి సబ్బినేని మేఘనని ఢిల్లీ క్యాపిటల్స్ బౌలర్ మారిజానే కాప్ క్లీన్ బౌల్డ్ చేసింది. ఆ తర్వాతి ఓవర్‌లో వరుసగా రెండు బంతుల్లో 2 వికెట్లు పడగొట్టింది మారిజానే కాప్... లౌరా వాల్వర్డ్‌‌, అష్‌లీగ్ గార్డ్‌నర్ వరుస బంతుల్లో అవుట్ కావడంతో 9 పరుగులకే 3 వికెట్లు కోల్పోయింది గుజరాత్ జెయింట్స్. 

14 బంతుల్లో 4 ఫోర్లతో 20 పరుగులు చేసిన హర్లీన్ డియోల్ కూడా మారిజానే కాప్ బౌలింగ్‌లోనే ఎల్బీడబ్ల్యూగా పెవిలియన్ చేరింది. ఆ తర్వాత 10 బంతుల్లో 2 పరుగులు చేసిన సుష్మా వర్మను క్లీన్ బౌల్డ్ చేసిన మారిజానే కాప్... 5 వికెట్లు పూర్తి చేసుకుంది.. 33 పరుగులకే 6 వికెట్లు కోల్పోయి పీకల్లోతు కష్టాల్లో పడింది గుజరాత్ జెయింట్స్.  

25 బంతుల్లో 2 ఫోర్లతో 22 పరుగులు చేసిన జార్జియా వరెహం, రాధా యాదవ్ బౌలింగ్‌లో క్లీన్ బౌల్డ్ అయ్యింది... తనుజా కాన్వర్ 19 బంతుల్లో ఓ ఫోర్‌తో 13 పరుగులు చేసి శిఖా పాండే బౌలింగ్‌లో అవుట్ కాగా, కెప్టెన్ స్నేహ్ రాణా కూడా పెద్దగా ఆకట్టుకోలేకపోయింది. 3 బంతుల్లో 2 పరుగులు చేసిన స్నేహ్ రాణా, శిఖా పాండే బౌలింగ్‌లో భారీ షాట్‌కి ప్రయత్నించి, ఆమెకే క్యాచ్ ఇచ్చి అవుటైంది...  కిమ్ గార్త్ 37 బంతుల్లో 3 ఫోర్లతో 32 పరుగులు చేయగా మన్షీ జోషి 5 పరుగులు చేసింది. ఢిల్లీ క్యాపిటల్స్ బౌలర్లలో మారిజానే కాప్ 15 పరుగులిచ్చి 5 వికెట్లు తీయగా శిఖా పాండేకి 3 వికెట్లు దక్కాయి. రాధా యాదవ్ ఓ వికెట్ తీసింది.