సన్‌రైజర్స్‌ టాప్ లేపిన కృనాల్ పాండ్యా... మార్క్‌రమ్ డకౌట్, హారీ బ్రూక్ మళ్లీ ఫ్లాప్! ఆరెంజ్ ఆర్మీ ఆశలన్నీ...

IPL 2023: 55 పరుగులకే 4 వికెట్లు కోల్పోయి పీకల్లోతు కష్టాల్లో సన్‌రైజర్స్ హైదరాబాద్... కెప్టెన్ అయిడిన్ మార్క్‌రమ్ డకౌట్! మరోసారి నిరాశపరిచిన మయాంక్ అగర్వాల్, హారీ బ్రూక్..

ఐపీఎల్ 2023 సీజన్‌లో భాగంగా లక్నో సూపర్ జెయింట్స్‌తో జరుగుతున్న మ్యాచ్‌లో టాస్ గెలిచి బ్యాటింగ్ ఎంచుకున్న సన్‌రైజర్స్ హైదరాబాద్, 55 పరుగులకే 4 వికెట్లు కోల్పోయి పీకల్లోతు కష్టాల్లో పడింది. గత సీజన్‌లో అట్టర్ ఫ్లాప్ అయిన మయాంక్ అగర్వాల్, ఈ సీజన్‌లో కూడా తన పేలవ ఫామ్‌ని కొనసాగిస్తున్నాడు..

7 బంతుల్లో ఓ ఫోర్‌తో 8 పరుగులు చేసిన మయాంక్ అగర్వాల్, కృనాల్ పాండ్యా బౌలింగ్‌లో మార్కస్ స్టోయినిస్‌కి క్యాచ్ ఇచ్చి అవుట్ అయ్యాడు. 21 పరుగుల వద్ద తొలి వికెట్ కోల్పోయింది సన్‌రైజర్స్ హైదరాబాద్. ఆ తర్వాత అన్‌మోల్‌ప్రీత్ సింగ్, రాహుల్ త్రిపాఠి కలిపి రెండో వికెట్‌కి 29 పరుగుల భాగస్వామ్యం జోడించారు.

యష్ ఠాకూర్ వేసిన ఇన్నింగ్స్ ఆరో ఓవర్‌లో అన్‌మోల్‌ప్రీత్ సింగ్ ఎల్బీడబ్ల్యూ అవుట్ అయినట్టు అంపైర్ ప్రకటించాడు. అయితే డీఆర్‌ఎస్ తీసుకున్న సన్‌రైజర్స్ హైదరాబాద్‌కి అనకూలంగా ఫలితం దక్కింది. అయితే ఆ అవకాశాన్ని సరిగ్గా వాడుకోలేకపోయాడు అన్‌మోల్‌ప్రీత్ సింగ్...

26 బంతుల్లో 3 ఫోర్లు, ఓ సిక్సర్‌తో 31 పరుగులు చేసిన అన్‌మోల్‌ప్రీత్ సింగ్, కృనాల్ పాండ్యా బౌలింగ్‌లో ఎల్బీడబ్ల్యూగా అవుట్ అయ్యాడు. ఆ తర్వాతి బంతికి కెప్టెన్ అయిడిన్‌ మార్క్‌రమ్‌ని క్లీన్ బౌల్డ్ చేశాడు కృనాల్ పాండ్యా. మార్క్‌రమ్ వస్తాడు, సన్‌రైజర్స్ కష్టాలు తీరుస్తాడని ఆశపడిన అభిమానులకు తీవ్ర నిరాశే ఎదురైంది..

ఆ తర్వాత 4 బంతుల్లో 3 పరుగులు చేసిన హారీ బ్రూక్, రవి భిష్ణోయ్ బౌలింగ్‌లో భారీ షాట్‌కి ప్రయత్నించి స్టంపౌట్ అయ్యాడు. 55 పరుగులకే 4 వికెట్లు కోల్పోయింది సన్‌రైజర్స్ హైదరాబాద్..

మొదటి రెండు మ్యాచుల్లో కృనాల్ పాండ్యా వేసింది రెండు ఓవర్లే. తొలి మ్యాచ్‌లో బ్యాటింగ్ అవ్వగానే కృనాల్ పాండ్యాని ఇంపాక్ట్ ప్లేయర్ కోసం తప్పించిన కెఎల్ రాహుల్, ఆ తర్వాతి మ్యాచ్‌లో 2 ఓవర్లు బౌలింగ్ చేయించాడు. అయితే నేటి మ్యాచ్‌లో ఇన్నింగ్స్ మూడో ఓవర్‌లోనే బౌలింగ్‌కి వచ్చిన కృనాల్ పాండ్యా, ఏకంగా 3 వికెట్లు తీసిన ఆరెంజ్ ఆర్మీని దెబ్బ తీశాడు...

8 బంతుల వ్యవధిలో 3 వికెట్లు కోల్పోయిన సన్‌రైజర్స్ హైదరాబాద్, 11 ఓవర్లు ముగిసే సమయానికి 4 వికెట్ల నష్టానికి 65 పరుగులు చేసింది. క్రీజులో ఉన్న రాహుల్ త్రిపాఠి, వాషింగ్టన్ సుందర్ అవుటైతే అబ్దుల్ సమద్ తప్ప మరో బ్యాటర్ లేడు టీమ్‌లో.. దీంతో ఇద్దరు చేసే పరుగులు పైనే టీమ్ స్కోరు ఆధారపడి ఉంది. 

పిచ్ బ్యాటింగ్‌కి చక్కగా సహకరిస్తుందని విశ్లేషకులు చెప్పిన రిపోర్ట్‌ని నమ్మి, తొలుత బ్యాటింగ్ తీసుకున్న అయిడిన్ మార్క్‌రమ్‌కి ఊహించని షాక్ తగిలింది. పిచ్ స్పిన్నర్లకు చక్కగా సహకరిస్తుండడంతో ఆరెంజ్ ఆర్మీ త్వరత్వరగా వికెట్లు కోల్పోవడమే కాకుండా పరుగులు చేయడానికి బాగా కష్టపడుతోంది..