క్రికెటర్ల అర్ధనగ్న ఫోటోలు చూపించి.. బీసీసీఐ బాస్ కోడలు కూడా.. ఛీ ఛీ వ్యూస్ కోసం ఇంత దిగజారాలా..!

IPL 2023: ఐపీఎల్  - 16 ను  టెలివిజన్ లో ప్రసారం చేస్తున్న  ప్రముఖ ఛానెల్ ‘స్టార్’ లో  ప్రసారమైన ఓ షో వివాదాస్పదమైంది. 

ఇండియన్ ప్రీమియర్ లీగ్ - 2023 ఎడిషన్ ను  టెలివిజన్‌లలో లైవ్ టెలికాస్ట్ చేస్తున్న   ప్రముఖ  బ్రాడ్‌కాస్టర్ ‘స్టార్’.. ప్రేక్షకులను ఆకట్టుకోవడానికి చేస్తున్న కార్యక్రమాలు  జనాల ఆగ్రహానికి గురవుతున్నాయి. ఆట గురించి కాకుండా ఆటేతర విషయాల గురించి  షో లు చేస్తున్నారంటూ ఆ టీవీ ఛానెల్ పై విమర్శలు వెల్లువెత్తుతున్నాయి.  ఇటువంటి తలతిక్క షో లతో మహిళలను ఇబ్బంది పెట్టడం సరికాదని  నెటిజన్లు ఆగ్రహం వ్యక్తం చేస్తున్నారు. 

ఇంతకీ ఏం జరిగిందంటే.. ఐపీఎల్ -16 లో భాగంగా   సన్ రైజర్స్ హైదరాబాద్ - రాయల్ ఛాలెంజర్స్ బెంగళూరు మధ్య గురువారం జరిగిన మ్యాచ్ కు ముందు ‘స్టార్1’ లో ‘హాట్ ఆర్ నాట్’ అనే కార్యక్రమాన్ని నిర్వహించింది. 

ప్రముఖ బాలీవుడ్ నటుడు  విద్యుత్ జమాల్ తో కలిసి  యాంకర్  సురేన్ సుందరం  నిర్వహించిన ఈ షోలో  ముగ్గురు ఫిమేల్ యాంకర్స్ కూడా  పాల్గొన్నారు.  వీరిలో ఒకరు బీసీసీఐ అధ్యక్షుడు   రోజర్ బిన్నీ   కోడలు మయంతి లాంగర్ కూడా ఉండటం గమనార్హం. ఈ సందర్భంగా   స్క్రీన్ పై  విరాట్ కోహ్లీ, శుభ్‌మన్ గిల్,    ఆండ్రీ రసెల్ (వెస్టిండీస్) అర్ధనగ్న ఫోటోలను   చూపించారు.  వాళ్లు  స్విమ్మింగ్ పూల్ లో ఉన్న ఫోటోలను ప్రదర్శిస్తూ  ‘హాట్ ఆర్ నాట్’ చెప్పాలంటూ  ఫిమేల్ యాంకర్స్ ను ప్రశ్నలు అడిగారు. కాగా  ఈ ఫోటోలను చూసేందుకు   లాంగర్ తో సహా మిగిలిన ఫిమేల్ యాంకర్స్ కూడా   అసౌకర్యంగా ఫీలయ్యారు.  మయాంతి అయితే  ఆ ఫోటోలు చూడలేక ముఖం తిప్పుకుంది.   

ఈ షో కు సంబంధించిన వీడియో నెట్టింట వైరల్ గా మారడంతో  నెటిజన్లు కూడా కాస్త ఘాటుగానే స్పందిస్తున్నారు. ‘క్రికెట్ మీద షోలు చేయడానికి ఇంకా మరే అంశాలు దొరకలేదా..?’, ‘మహిళా యాంకర్లను  పెట్టి ఇవేం పిచ్చి పనుల్రా..  అసలు కొంచెమైనా సెన్స్ ఉందా..? ’  ‘నాకు స్టార్ మీద ఎప్పుడూ అంచనాలు లేవు. ఇది మరీ దరిద్రం.   ఈ షోలో వాళ్లు (స్టార్) మహిళా యాంకర్లతో  హాట్ ఆర్ నాట్ ఆడిస్తున్నారు.  అసలు దీనికి ఆటతో ఏమైనా సంబంధం ఉందా..? వ్యూస్ కోసం ఎంతకైనా దిగజారుతారా..?’అని  కామెంట్స్ చేస్తున్నారు.