RCB vs PBKS: చితక్కొట్టిన జానీ భాయ్, లివింగ్‌స్టోన్... ఆర్‌సీబీ ముందు భారీ టార్గెట్...

మెరుపు హాఫ్ సెంచరీ ఇన్నింగ్స్‌లతో పంజాబ్ కింగ్స్‌కి భారీ స్కోరు అందించిన జానీ బెయిర్ స్టో, లియామ్ లివింగ్‌స్టో... విఫలమైన ఇతర బ్యాట్స్‌మెన్...

ఐపీఎల్ 2022 ప్లేఆఫ్స్ అవకాశాలు సజీవంగా ఉండాలంటే తప్పక గెలవాల్సిన మ్యాచ్‌లో పంజాబ్ కింగ్స్ బ్యాటర్లు చెలరేగిపోయారు. నిన్నటి మ్యాచ్‌లో సీఎస్‌కే, ముంబై ఇండియన్స్ 6 ఓవర్లకు పైగా తీసుకున్న స్కోరును 2 ఓవర్లనే రాబట్టేశారు పంజాబ్ కింగ్స్ బ్యాట్స్‌మెన్... నిర్ణీత 20 ఓవర్లలో 9 వికెట్లు కోల్పోయి 209 పరుగుల భారీ స్కోరు చేసింది పంజాబ్ కింగ్స్... 

జోష్ హజల్‌వుడ్ వేసిన మొదటి ఓవర్‌లో రెండు సిక్సర్లు, రెండు ఫోర్లతో కలిపి 22 పరుగులు రాబట్టాడు జానీ బెయిర్ స్టో. ఆ తర్వాతి ఓవర్‌లో 13 పరుగులు రాగా మూడో ఓవర్‌లో 7 పరుగులే ఇచ్చాడు హజల్‌వుడ్. 15 బంతుల్లో 2 ఫోర్లు, ఓ సిక్సర్‌తో 21 పరుగులు చేసిన శిఖర్ ధావన్‌ను గ్లెన్ మ్యాక్స్‌వెల్ క్లీన్ బౌల్డ్ చేశాడు...

మహ్మద్ సిరాజ్ వేసిన 6వ ఓవర్‌లో ఏకంగా మూడు సిక్సర్లు, ఓ ఫోర్‌తో  23 పరుగులు రాబట్టాడు బెయిర్‌స్టో. మొదటి బంతికే బెయిర్ స్టో ఎల్బీడబ్ల్యూ అవుట్ కోసం అప్పీలు చేసి, డీఆర్‌ఎస్ తీసుకుంది ఆర్‌సీబీ. టీవీ రిప్లైలో జానీ బెయిర్ స్టో బ్యాటుకి బంతి తగిలినట్టు స్పష్టంగా కనిపించకపోయినా థర్డ్ అంపైర్ నాటౌట్‌గా ప్రకటించడం వివాదాస్పదమైంది...

3 బంతుల్లో 1 పరుగు చేసిన భనుక రాజపక్ష, హసరంగ బౌలింగ్‌లో అవుట్ కాగా 21 బంతుల్లోనే హాఫ్ సెంచరీ పూర్తి చేసుకున్న జానీ బెయిర్ స్టో, ఐపీఎల్‌లో ఫాస్టెస్ట్ హాఫ్ సెంచరీ నమోదు చేశాడు. పవర్ ప్లే ముగిసే సమయానికి 6 ఓవర్లలో 83 పరుగులు చేసిన పంజాబ్ కింగ్స్, ఆ తర్వాత కాస్త నెమ్మదించింది...

29 బంతుల్లో 4 ఫోర్లు, 7 సిక్సర్లతో 66 పరుగులు చేసిన జానీ బెయిర్ స్టో, షాబాజ్ అహ్మద్ బౌలింగ్‌లో సిరాజ్‌కి క్యాచ్ ఇచ్చి అవుట్ అయ్యాడు. 16 బంతుల్లో 3 ఫోర్లతో 19 పరుగులు చేసిన మయాంక్ అగర్వాల్, హర్షల్ పటేల్ బౌలింగ్‌లో అవుట్ అయ్యాడు...

5 బంతుల్లో 2 ఫోర్లతో 9 పరుగులు చేసిన జితేశ్ శర్మ, హసరంగ బౌలింగ్‌లో క్లీన్ బౌల్డ్ అయ్యాడు. ఈ వికెట్‌తో సీజన్‌లో 23 వికెట్లు పూర్తి చేసుకున్న వానిందు హసరంగ, పర్పుల్ క్యాప్ రేసులో టాప్‌లోకి దూసుకొచ్చాడు. యజ్వేంద్ర చాహాల్ 23 వికెట్లతో ఉన్నా, యావరేజ్ బెటర్‌గా ఉండడంతో హసరంగ టాప్‌లోకి వెళ్లాడు.

హర్షల్ పటేల్ బౌలింగ్‌లో సిక్సర్ బాదిన హర్‌ప్రీత్ బ్రార్, ఆ తర్వాతి బంతికే దినేశ్ కార్తీక్‌కి క్యాచ్ ఇచ్చి పెవిలియన్ చేరాడు. హజల్‌వుడ్ వేసిన 19వ ఓవర్‌లో రెండు సిక్సర్లు, రెండు ఫోర్లతో 24 పరుగులు రాబట్టిన లియామ్ లివింగ్‌స్టోన్, సీజన్‌లో నాలుగో హాఫ్ సెంచరీ నమోదు చేశాడు...

ఓ వైపు జానీ బెయిర్ స్టో, మరో వైపు లియామ్ లివింగ్‌స్టోన్ ఉతికి ఆరేయడంతో 4 ఓవర్లలో వికెట్లేమీ తీయలేకపోయిన జోష్ హజల్‌వుడ్ ఏకంగా 64 పరుగులు సమర్పించి చెత్త రికార్డు క్రియేట్ చేశాడు.. 42 బంతుల్లో 5 ఫోర్లు, 4 సిక్సర్లతో 70 పరుగులు చేసిన లియామ్ లివింగ్‌స్టోన్, హర్షల్ పటేల్ బౌలింగ్‌లో దినేశ్ కార్తీక్‌కి క్యాచ్ ఇచ్చి అవుట్ అయ్యాడు. 

3 బంతుల్లో ఓ సిక్సర్ బాదిన రిషి ధావన్, హర్షల్ పటేల్ బౌలింగ్‌లో అవుట్ కాగా ఆఖరి బంతికి రాహుల్ చాహార్ రనౌట్ అయ్యాడు. ఆఖరి ఓవర్‌లో కేవలం 4 పరుగులు మాత్రమే ఇచ్చి 2 వికెట్లు తీశాడు హర్షల్ పటేల్. హర్షల్ పటేల్ 4 వికెట్లు తీయగా, హసరంగకి 2 వికెట్లు దక్కాయి.