స్టాక్ మార్కెట్ ట్రేడింగ్ సమయంలో భారీ మార్పులు చేసే చాన్స్, సాయంత్రం 5 గంటల వరకూ పొడిగించే అవకాశం..

స్టాక్ మార్కెట్ ట్రేడింగ్ సమయాన్ని పెంచే దిశగా కసరత్తు ప్రారంభమైంది. త్వరలోనే స్టాక్ మార్కెట్ ట్రేడింగ్ సాయంత్రం 5 గంటల వరకూ సాగే అవకాశం ఉందనే వార్తలు జోరందుకున్నాయి. 

స్టాక్ మార్కెట్‌లో ట్రేడింగ్ టైమ్‌ మార్పుపై చర్చ మరోసారి జోరందుకుంది. మార్కెట్‌లో ట్రేడ్ టైమింగ్‌ను ఇప్పుడు మధ్యాహ్నం 3.30 నుండి సాయంత్రం 5 గంటల వరకు పెంచవచ్చనే వార్తలు జోరుగా వినిపిస్తున్నాయి. సమయాన్ని పెంచడానికి సంబంధించిన ఫ్రేమ్‌వర్క్‌ను మార్కెట్ నియంత్రణ సంస్థ సెబీ 2018 సంవత్సరంలో తయారు చేసింది. దీనిపై త్వరలో నిర్ణయం వెలువడే అవకాశం ఉంది.

ప్రస్తుతం, భారతీయ స్టాక్ మార్కెట్ ఉదయం 9:15 గంటలకు ప్రారంభమై,  మధ్యాహ్నం 3:30 గంటలకు ముగిస్తుంది.  రాయిటర్స్ నివేదిక ప్రకారం, స్టాక్ మార్కెట్లో ట్రేడింగ్ గంటలను పొడిగించడానికి సన్నాహాలు జరుగుతున్నాయి. దీని ప్రకారం, ట్రేడింగ్ సమయాన్ని సాయంత్రం 5 గంటల వరకు పొడిగించవచ్చు. అయితే, మార్కెట్ పార్టిసిపెంట్లతో దీనికి సంబంధించి చర్చలు ఇంకా ప్రారంభ దశలోనే ఉన్నాయి.

ట్రేడింగ్ గంటలను పెంచేందుకు మార్కెట్ల నియంత్రణ సంస్థ సెబీ 2018లో ఒక ఫ్రేమ్‌వర్క్‌ను జారీ చేసింది. అంతకుముందు జనవరి నెలలో కూడా సెబీ స్టాండర్డ్ ఆపరేటింగ్ ప్రొసీజర్ (SOP)ని తీసుకొచ్చింది. అందులో పేర్కొన్న దాని ప్రకారం, ఏదైనా కారణం వల్ల ఎక్స్ఛేంజ్ పనితీరుకు అంతరాయం కలిగితే, మార్కెట్ భాగస్వాములు, ట్రేడింగ్ సభ్యులు 15 నిమిషాల్లో దాని గురించి తెలియజేయాలి. మార్కెట్ ముగియడానికి ఒక గంట ముందు ట్రేడింగ్ సాధారణం కాకపోతే, అన్ని ఎక్స్ఛేంజీలు ఆ రోజు ట్రేడింగ్ సమయాన్ని ఒకటిన్నర గంటలు పొడిగించాల్సి ఉంటుందని సెబీ సర్క్యులర్‌లో పేర్కొంది.

NSE ట్రేడింగ్ గంటలను పొడిగించాలని కోరుతోంది
దేశంలోని అతిపెద్ద స్టాక్ ఎక్స్ఛేంజ్ నేషనల్ స్టాక్ ఎక్స్ఛేంజ్ (NSE) ఈక్విటీ విభాగంలో ట్రేడింగ్ గంటలను పెంచడానికి అనుకూలంగా ఉంది.  అయితే, స్టాక్ మార్కెట్‌లో ట్రేడింగ్ టైమింగ్‌ను పెంచే చర్చ మొదటిసారి జరగడం లేదు. అయితే ఇప్పుడు దీనికి సంబంధించి వస్తున్న రిపోర్ట్స్ ప్రకారం మార్కెట్ టైమింగ్ విషయంలో త్వరలో ఓ పెద్ద నిర్ణయం తీసుకోవచ్చని తెలుస్తోంది.

స్టాక్ మార్కెట్‌లో ట్రేడ్ టైమింగ్‌ను పెంచడానికి ఎన్‌ఎస్‌ఇ అనుకూలంగా ఉన్నప్పటికీ, చాలా మంది దీనిని అంగీకరించడం లేదు. జెరోధా సీఈవో నితిన్ కామత్ ట్వీట్ ద్వారా తన అభిప్రాయాన్ని వెల్లడించారు. ఈ నిర్ణయం తీసుకుంటే వ్యాపారులపై ప్రతికూల ప్రభావం పడే అవకాశం ఉందన్నారు. వాణిజ్య సమయాలను పెంచడం వల్ల దీర్ఘకాలంలో తక్కువ భాగస్వామ్యం ,  లిక్విడిటీ సమస్యలకు దారి తీస్తుందన్నారు.