Elon Muskకు కేంద్ర మంత్రి నితిన్ గడ్కరీ బంపర్ ఆఫర్..భారత్‌లో Tesla కార్ల తయారీ యూనిట్ ఏర్పాటుకు ఆహ్వానం.

ట్విట్టర్ కొనుగోలు ద్వారా యావత్ ప్రపంచాన్ని షాక్ కు గురిచేసిన ఎలాన్ మస్క్ కు భారత్ నుంచి బంపర్ ఆఫర్ వస్తోంది. మస్క్ ఆధీనంలోని టెస్లా సంస్థను భారత్ లో తయారీ యూనిట్ ఏర్పాటు చేయాల్సిందిగా, కేంద్ర రవాణా శాఖ మంత్రి నితిన్ గడ్కరీ ఆహ్వానించారు. భారత్ లో టెస్లా కార్లను విక్రయించాలనుకుంటే స్థానికంగా కార్లను ఉత్పత్తి చేయడం ద్వారా పన్ను మినహాయింపులు దక్కుతాయని పేర్కొన్నారు.

ట్విటర్ ఒప్పందం తర్వాత ప్రపంచ వ్యాప్తంగా సంచలనానికి కేంద్ర బిందువుగా మారిన ఎలాన్ మస్క్ కు భారత్ నుంచి ఓ బంపర్ ఆఫర్ వచ్చింది. కేంద్ర మంత్రి నితిన్ గడ్కరీ మంగళవారం ఓ ప్రైవేటు సదస్సులో మాట్లాడుతూ టెస్లా సంస్థ భారత్‌లో కార్లను మాన్యుఫ్యాక్చరింగ్ చేసేందుకు స్వాగతించారు.  ఎలోన్ మస్క్ టెస్లాను భారత్‌లో తయారు చేయాలనుకుంటే ఎలాంటి ఇబ్బంది లేదని రైసినా డైలాగ్ అనే కార్యక్రమంలో ఆయన అన్నారు. తమ వద్ద అన్ని సామర్థ్యాలు ఉన్నాయని, అలాగే సాంకేతికత కూడా అందుబాటులో ఉందని, ఈ కారణాల వల్ల వారు ఖర్చును తగ్గించుకోవచ్చని పేర్కొన్నారు.

మేడ్-ఇన్-చైనా టెస్లా కారు భారత్ లో అనుమతించం..
ఈ సందర్భంగా మస్క్‌ను భారత్‌లో పర్యటించాల్సిందిగా గడ్కరీ ఆహ్వానించారు. ఆయన మాట్లాడుతూ, 'భారత్‌కు వచ్చి ఇక్కడ తయారీ ప్రారంభించాలని నేను వారిని అభ్యర్థిస్తున్నాను. భారతదేశం ప్రపంచంలోనే అతి పెద్ద మార్కెట్‌. ఇక్కడ పోర్టులు అందుబాటులో ఉన్నాయి. వారు భారతదేశం నుండి ఎగుమతి చేయవచ్చు. అయితే ఈ సందర్భంగా 'మేడ్ ఇన్ చైనా' పేరుతో టెస్లా కార్లతో భారతదేశంలోకి ప్రవేశించే అవకాశాన్ని తోసిపుచ్చారు. మస్క్ కు భారతదేశంలో స్వాగతం లభిస్తుంది, కానీ అతను చైనాలో తయారు చేసిన టెస్లా కార్లను భారతదేశంలో విక్రయించాలనుకుంటున్నాడు, అది దేశ ప్రయోజనాలకు మంచిది కాదు. మీరు భారతదేశానికి వచ్చి ఇక్కడే మీ కార్లను తయారుచేయాలనేది మా విన్నపమని గడ్కరీ పేర్కొన్నారు. 

టెస్లా  డిమాండ్ కు గడ్కరీ తిరస్కారం...
నిజానికి, ప్రపంచంలోని అత్యంత సంపన్నుడైన ఎలోన్ మస్క్‌కి చెందిన ఎలక్ట్రిక్ కార్ కంపెనీ టెస్లా చాలా కాలంగా భారత మార్కెట్లోకి ప్రవేశించాలని ఎదురుచూస్తోంది. దీని కోసం కంపెనీ భారత ప్రభుత్వం నుండి పన్ను మినహాయింపును కోరుతోంది. టెస్లా  పన్ను మినహాయింపు డిమాండ్‌ను భారత ప్రభుత్వం చాలాసార్లు తిరస్కరించింది.  దానిని నెరవేర్చలేమని స్పష్టం చేసింది. మస్క్ భారతదేశం దిగుమతి చేసుకోవడం ద్వారా టెస్లా కార్లను ప్రవేశపెట్టాలనుకుంటోంది. అయితే ప్రస్తుతం అమలులో ఉన్న పన్ను చట్టం ప్రకారం దిగుమతి చేసుకునే విదేశీ కార్లకు భారీ పన్నులు ఉన్నాయి. అందు కోసమే టెస్లా కంపెనీ  పన్ను మినహాయింపు కోరుతోంది. అటు కేంద్ర ప్రభుత్వం మాత్రం  కంపెనీని దిగుమతి చేసుకునే బదులు, వాహనాలను స్థానిక స్థాయిలోనే తయారు చేయాలని నిరంతరం చెబుతోంది.

విదేశీ వాహనాలపై ఎంత పన్ను విధిస్తారు
మస్క్ కంపెనీ టెస్లా ప్రస్తుతం అమెరికాతో పాటు జర్మనీ, చైనాలో తన వాహనాలను తయారు చేస్తోంది. కంపెనీ చైనా ఫ్యాక్టరీ నుండి ఆసియా, ఐరోపా మార్కెట్లకు దిగుమతి చేసుకుంటుంది. మేడ్ ఇన్ చైనా వాహనాలను భారత్‌లో డంప్ చేయకుండా టెస్లా ఇక్కడే ఫ్యాక్టరీని ఏర్పాటు చేయాలని కేంద్ర మంత్రి నితిన్ గడ్కరీ గతంలో పలు సందర్భాల్లో చెప్పారు. ఎలక్ట్రిక్ వాహనాల దిగుమతిపై భారత ప్రభుత్వం ప్రస్తుతం 100% సుంకాన్ని విధిస్తోంది. ఇది నేరుగా అటువంటి వాహనాల ధరను రెట్టింపు చేస్తుంది. ఇది వారి పోటీ సామర్థ్యాన్ని తగ్గిస్తుంది. మరోవైపు ఎలక్ట్రిక్ వాహనాల విడిభాగాల దిగుమతిపై ప్రభుత్వం 15 నుంచి 30 శాతం సుంకం విధిస్తోంది. ప్రభుత్వం అమలు చేస్తున్న ఈ వ్యూహం లక్ష్యం భారతదేశంలో కర్మాగారాలను స్థాపించడానికి బయటి కంపెనీలను ప్రేరేపించడం ద్వారా ఉద్యోగ కల్పన జరుగుతుందని భావిస్తోంది.