వైరల్: ఆస్పత్రిలో చేరిన యజమానిపై పెంపుడు కుక్క విశ్వాసం

 ఓ పెంపుడు కుక్క మాత్రం అంతకు మించిన విశ్వాసం తన యజమాని పట్ల చూపించింది. అనారోగ్యానికి గురైన యజమాని తిరిగి ఆరోగ్యంతో ఆస్పత్రి నుంచి బయటకు వచ్చేంత వరకు హాస్పిటల్ బయట కాపలా కాసింది.

కుక్కకి విశ్వాసం ఎక్కువ అని అందరూ చెబుతుంటారు. ఒక్క పూట తిండి పెట్టినా.. తనకు ఆహారం పెట్టిన వ్యక్తి ఇంటికి కాపలా కాస్తుందని చెబుతుంటారు. అయితే.. ఓ పెంపుడు కుక్క మాత్రం అంతకు మించిన విశ్వాసం తన యజమాని పట్ల చూపించింది. అనారోగ్యానికి గురైన యజమాని తిరిగి ఆరోగ్యంతో ఆస్పత్రి నుంచి బయటకు వచ్చేంత వరకు హాస్పిటల్ బయట కాపలా కాసింది. ఈ సంఘటన టర్కీలో చోటుచేసుకోగా... ఈ ఘటనకు సంబంధించిన పూర్తి వివరాలు ఇలా ఉన్నాయి.

టర్కీలోని ట్రాబ్ జోన్ ప్రాంతానికి చెందిన సెమల్ సెంటుర్క్ అనే వ్యక్తి గత కొన్ని సంవత్సరాలుగా ఓ కుక్కను పెంచుకుంటున్నారు. దానిని ఆయన ఎంతో ప్రేమగా చూసుకునేవారు. అది కూడా ఆయన పట్ల ఎంతో విశ్వాసంగా ఉండేది.

కాగా.. ఈ నెల 14న సెమల్‌ అనారోగ్యానికి గురయ్యారు. దీంతో ఆయనను అంబులెన్స్‌లో ఆసుపత్రికి తరలించారు. గమనించిన కుక్క బోనుక్‌ ఆ అంబులెన్స్‌ వెంట పరుగులు దీసి ఆసుపత్రికి చేరింది. రోజంతా అక్కడే ఉన్నది. చివరకు సెమల్‌ కుమార్తె ఐనూర్ ఎగెలి రాత్రి వేళ దానిని ఇంటికి తీసుకెళ్లారు. అయితే ఆ కుక్క మరునాడు ఉదయమే ఆ ఆసుపత్రి వచ్చింది. యజమాని కోసం డోర్‌ వద్ద రోజంతా నిరీక్షించి రాత్రికి తిరిగి ఇంటికి వెళ్లింది. 

ఇలా వారం రోజుల పాటు ఆ కుక్క ఆసుపత్రి వద్ద యజమాని కోసం పడిగాపులు కాసింది. ఈ నెల 20న యజమాని సెమల్‌ కోలుకున్నారు. దీంతో వీల్‌ చైర్‌లో ఆసుపత్రి డోర్‌ వద్దకు వచ్చి తన కుక్కను చూసి పరవశించిపోయారు.

దీనికి సంబంధించిన ఫోటోలు ఇప్పుడు నెట్టింట వైరల్ గా మారాయి. ఇంత విశ్వాసమా అంటూ అందరూ ఆ కుక్కను అభినందిస్తున్నారు. ప్రస్తుత కాలంలో మనుషులు కూడా ఇంతటి అభిమానం చూపించడం లేదని పేర్కొనడం గమనార్హం.