బెంగుళూరు కోరమంగళ భవనంలో అగ్ని ప్రమాదం: భవనం నుండి దూకిన వ్యక్తి

బెంగుళూరులోని కోరమంగళ ప్రాంతంలో  ఇవాళ  భారీ అగ్ని ప్రమాదం చోటు చేసుకుంది.అగ్ని ప్రమాదం నుండి తప్పించుకొనేందుకు గాను ఓ వ్యక్తి  భవనం పై నుండి కిందకు దూకాడు.

బెంగుళూరు:నగరంలోని  కోరమంగళ  ప్రాంతంలోని తావరెకెరె మెయిన్ రోడ్డులో ఓ భవనంలో నాలుగో అంతస్థు కేఫ్ లో బుధవారంనాడు భారీ అగ్నిప్రమాదం చోటు చేసుకుంది.ఈ భవనంలో మంటలను నాలుగు ఫైరింజన్లు మంటలను ఆర్పివేశాయి.

ఇవాళ ఉదయం 11:30 గంటలకు  ఈ భవనంలో  అగ్ని ప్రమాదం జరిగింది. నాలుగో అంతస్థు నుండి ఇతర అంతస్థులకు  మంటలు వ్యాపించాయి. ఈ భవనంలో చిక్కుకున్నవారిని  ఫైరింజన్ సిబ్బంది సురక్షితంగా బయటకు తీసుకు వచ్చారు. మంటల నుండి తప్పించుకొనేందుకు  ఓ వ్యక్తి భవనం పై నుండి కిందకు దూకాడు.భవనం కింది అంతస్తులో  పార్క్ చేసిన  రెండు బైక్ లు, భవనం సమీపంలోని  షోరూమ్ లో ఓ కారు దెబ్బతిందని  అధికారులు తెలిపారు.

దేశంలోని పలు రాష్ట్రాల్లో ఏదో ఒక చోట ప్రతి రోజూ అగ్ని ప్రమాదాలు చోటు చేసుకొంటున్నాయి. ఆంధ్రప్రదేశ్ రాష్ట్రంలోని  నందిగామలో గల ఫర్నీచర్  దుకాణంలో  ఇవాళ అగ్ని ప్రమాదం జరిగింది.ఈ అగ్ని ప్రమాదంలో ఫర్నీచర్ కాలిబూడిదైంది.

ఈ నెల 14న  తెలంగాణలోని సంగారెడ్డి జిల్లా పరిధిలోని  ఐడీఏ బొల్లారంలో  ఓ ప్రైవేట్ ఫార్మాసూటికల్ ఫ్యాక్టరీలో  రియాక్టర్ పేలి మంటలు వ్యాపించాయి.  ఈ ఘటనలో  15 మంది  కార్మికులు తీవ్రంగా గాయపడ్డారు.మూడు ఫైరింజన్లు  మంటలను ఆర్పివేశాయి.పంజాబ్ లోని  ప్రభుత్వ వైద్య విశ్వవిద్యాలయంలో ఈ నెల  11న  అగ్ని ప్రమాదం జరిగింది. ప్రమాదం జరిగిన సమయంలో  ఆసుపత్రిలో ఉన్న  424 మంది రోగులను  సురక్షితంగా  తరలించారు.