ఉత్తర ప్రదేశ్ ముఖ్యమంత్రి యోగి ఆదిత్యనాథ్ ఈసారి కూడా దీపావళి జంగిల్ టింకోనియా నంబర్ త్రీ వంతంగియ గ్రామస్థులతో జరుపుకున్నారు.
గోరఖ్‌పూర్ : ఉత్తర ప్రదేశ్ ముఖ్యమంత్రి ముఖ్యమంత్రి యోగి ఆదిత్యనాథ్ ఈ దీపావళి వేడుకను అడవి బిడ్డలతో కలిసి జరుపుకున్నారు. తన స్వస్థలం గోరఖ్ పూర్ పరిధిలోని జంగిల్ టింకోనియా నంబర్ త్రీ వంతంగియ గ్రామస్థులతో దీపావళి జరుపుకున్నారు. గ్రామంలో జరిగిన దీపోత్సవంలో ముఖ్యమంత్రి మరోసారి సామాజిక సమైక్యతను ప్రబోధిస్తూ, కులం, ప్రాంతం, భాష మొదలైన వాటి పేరుతో సమాజాన్ని విడగొట్టే వారిపై విమర్శలు చేశారు. కులం, ప్రాంతం, భాష పేరుతో విడగొట్టే వారిలో రావణాసురుడు, దుర్యోధనుడి డిఎన్ఎ ఉందని ఆయన అన్నారు.
అయోధ్యలో బుధవారం దీపోత్సవం సందర్భంగా కొత్త ప్రపంచ రికార్డు సృష్టించిన తర్వాత గురువారం ఉదయం వనటాంగియా గ్రామానికి చేరుకున్నారు ముఖ్యమంత్రి యోగి ఆదిత్యనాథ్. ఈ సందర్భంగా జిల్లాలోని వివిధ గ్రామ పంచాయతీలకు సంబంధించి 185 కోట్ల రూపాయల విలువైన 74 అభివృద్ధి ప్రాజెక్టులకు శంకుస్థాపన చేశారు. అనంతరం ప్రజలకు దీపావళి శుభాకాంక్షలు తెలియజేసారు. వారితో కలిసి దీపావళి జరుపుకున్నారు. ఈ క్రమంలోనే దేశ ప్రజలను విభజించే శక్తుల పట్ల అప్రమత్తంగా ఉండాలని సీఎం యోగి పిలుపునిచ్చారు.
విచ్చినశక్తుల ప్రభావానికి గురయితే అల్లకల్లోలం తిరిగి వస్తుందని యోగి హెచ్చరించారు. “మనం ఈ శక్తుల మాయలో పడితే అవి గూండాయిజం, అరాచకం, అల్లర్లను తిరిగి తెస్తాయి. అవి చిచ్చు పెడతాయి” అని ఆయన హెచ్చరించారు. ఇలాంటి శక్తుల విధ్వంసక ధోరణుల గురించి ఆయన మరికొన్ని కామెంట్స్ చేసారు. “విచ్చిన శక్తులు మన కుమార్తెలు, సోదరీమణుల భద్రతకు ముప్పు కలిగిస్తాయి, పేదల భూములను ఆక్రమిస్తాయి. వ్యాపారవేత్తలను కిడ్నాప్ చేస్తాయి, అమాయక ప్రయాణికులను కాల్చి చంపుతాయి, పండుగలకు ముందు అల్లర్లను రెచ్చగొడతాయి. 2017కి ముందు వారి తీరు ఇదే” అంటూ ఆరోపించారు.
శాంతిభద్రతలకు భంగం కలిగించే వారికి తీవ్ర పరిణామాలు ఎదురవుతాయని ఇప్పుడు అలాంటి శక్తులు గుర్తించాయని ముఖ్యమంత్రి వ్యాఖ్యానించారు. “ఇప్పుడు ఎవరైనా చట్టాన్ని చేతుల్లోకి తీసుకుంటే, వారికి 'రామ్ నామ్ సత్య' అవుతుందని వారికి తెలుసు. ఎవరైనా సోదరిని లేదా కుమార్తెను అవమానించడానికి ప్రయత్నిస్తే వారి మార్గం దుర్యోధనుడు, దుశ్శాసనుడికి దారితీస్తుందని వారు అర్థం చేసుకున్నారు. అల్లర్లను రెచ్చగొట్టి పండుగలకు అంతరాయం కలిగించే వారికి కూడా పరిణామాలు తెలుసు” అంటూ మరోసారి హెచ్చరించారు.
ప్రభుత్వం ఇప్పుడు అన్ని వర్గాల ప్రజలకు వివక్షత లేకుండా భద్రత, గౌరవం, అభివృద్ధి, సంక్షేమం అందిస్తుందని ముఖ్యమంత్రి నొక్కి చెప్పారు. నిజమైన శ్రేయస్సు సురక్షిత వాతావరణంలో మాత్రమే వర్ధిస్తుందని, ప్రకాశవంతమైన భవిష్యత్తు దృష్టి అలాంటి పరిస్థితులలో మాత్రమే సాధ్యమవుతుందని ఆయన అన్నారు.
అయోధ్యలో జరిగిన దివ్య దీపోత్సవం గురించి భావోద్వేగంతో స్పందిస్తూ... రాక్షస రాజును ఓడించిన 14 సంవత్సరాల తర్వాత శ్రీరాముడు అయోధ్యకు తిరిగి వచ్చినప్పుడు దీపావళిని సంతోషంగా జరుపుకున్నారని సీఎం యోగి గుర్తు చేసుకున్నారు. ప్రతి దీపోత్సవం రామరాజ్య స్థాపనకు చిహ్నమని ఆయన పేర్కొన్నారు. “రామరాజ్యం అంటే ప్రభుత్వ పథకాల ప్రయోజనాలను అందరూ వివక్షత లేకుండా పొందే ప్రాంతం” అని ఆయన వివరించారు. “కులం, భాష, ప్రాంతం లేదా సామాజిక హోదా ఆధారంగా ఎలాంటి విభజన లేదు. ప్రధానమంత్రి నరేంద్ర మోడీ నాయకత్వంలో గత దశాబ్ద కాలంగా బిజెపి ప్రభుత్వం నిరంతరం కృషి చేస్తోంది” అని అన్నారు.
పిఎం మోడీ నాయకత్వంలో, పౌరులు రేషన్ పంపిణీ, గృహనిర్మాణం, ఆయుష్మాన్ భారత్, ఎల్పిజి వంటి వివిధ పథకాల ప్రయోజనాలను ఎలాంటి వివక్షత లేకుండా పొందుతున్నారని ఆయన అన్నారు. “ఇదే రామరాజ్యం - అందరికీ అభివృద్ధి, భద్రత, ఉపాధికి హామీ ఇందుకు నిదర్శనం.” అని అన్నారు.
“500 సంవత్సరాల నిరీక్షణ తర్వాత ఇప్పుడు శ్రీరామ్ లల్లా తన గొప్ప, దివ్య ఆలయంలో ప్రతిష్టించబడ్డారు. ఈ సంవత్సరాన్ని అసాధారణంగా, ప్రపంచాన్ని ఆకర్షించే అద్భుతం, ప్రాముఖ్యతతో నింపారు.ఇది మనందరికీ అపారమైన పరివర్తన కాలం” అని ఆయన అన్నారు.
ప్రధానమంత్రి నరేంద్ర మోడీ నాయకత్వంలో, కేంద్ర, రాష్ట్ర ప్రభుత్వాలు అభివృద్ధి, వారసత్వ సంరక్షణ దృష్టిని వాస్తవంగా మారుస్తున్నాయి. శ్రీరాముడి గొప్ప ఆలయం పూర్తి కావడం అభివృద్ధిని పెంపొందిస్తూనే వారసత్వాన్ని కాపాడటానికి ఈ ఉమ్మడి నిబద్ధతకు పరాకాష్టగా నిలుస్తోంది. సనాతన ధర్మం, భారతదేశం మధ్య బంధాన్ని యోగి చాలా ఆసక్తికరంగా చెప్పారు. “సనాతన ధర్మం వర్ధిల్లితే భారతదేశం వర్ధిల్లుతుంది, భారతదేశం బలంగా ఉంటే సనాతన ధర్మం బలంగా ఉంటుంది. రెండింటిలో ఏ ఒక్కటి బలహీనంగా ఉన్నా రెండూ బలహీనమే”అని పేర్కొన్నారు.
బాహ్య శత్రువులు తమ ప్రయత్నాలలో విఫలమైనప్పుడు తప్పుడు సమాచారంతో ప్రచారం చేయడం, విభజన భాషను ఉపయోగించడం ద్వారా దేశాన్ని అంతర్గతంగా విభజించడానికి ప్రయత్నిస్తారని ఆయన హెచ్చరించారు.” హనుమంతుడు లంకను దహనం చేసిన గాథను ఉదాహరణగా ఉదహరిస్తూ, “ఈ సవాళ్లను ఎదుర్కోవడంలో బజరంగ్ బలి బలాన్ని స్వీకరించండి” అని ప్రోత్సహించారు. అరాచక, విచ్ఛిన్న శక్తులను ఎదుర్కోవడంలో హనుమంతుడి స్ఫూర్తిని అలవర్చుకోవాలని ముఖ్యమంత్రి యోగి ఆదిత్యనాథ్ ప్రజలను ప్రోత్సహించారు. “నిజమైన దేశభక్తుడు శత్రువులతో వారి భాషలోనే మాట్లాడతాడు కాబట్టి శ్రీరాముడి నిజమైన భక్తుడు మాత్రమే నిజమైన దేశభక్తుడు కావగలడు. మన దేశానికి వ్యతిరేకంగా నిలిచేవాడు మన శత్రువు; వారు ఎప్పుడూ మన మిత్రులు కాలేరు.” అన్నారు.
వంతంగియ సమాజాన్ని సమాజంలోకి విలీనం చేయడం యొక్క ప్రాముఖ్యతను ముఖ్యమంత్రి నొక్కిచెప్పారు. ఇలాంటి చేరిక అసాంఘిక, దేశ వ్యతిరేక శక్తులు వారిని దోపిడీ చేయకుండా నిరోధించడంలో సహాయపడుతుందని నొక్కిచెప్పారు. వంతంగియ ఉద్యమంలో తన వ్యక్తిగత ప్రమేయం గురించి ఆలోచిస్తూ, గత ఏడు సంవత్సరాలలో సమాజంలో వచ్చిన పరిణామాత్మక మార్పులను ఆయన హైలైట్ చేశారు.
“ఏడు సంవత్సరాల క్రితం, ఈ వంతంగియ గ్రామంలో ఒక్క కాంక్రీట్ ఇల్లు కూడా లేదు. నేడు ఒక్క గుడిసె కూడా లేదు” అని ఆయన పేర్కొన్నారు. 770 కాంక్రీట్ ఇళ్ళు నిర్మించబడ్డాయని, 800 కంటే ఎక్కువ రేషన్ కార్డులు జారీ చేయబడ్డాయని, దాదాపు 4,000 మంది ప్రజలు ఇప్పుడు ఆయుష్మాన్ భారత్ ఆరోగ్య పథకం ప్రయోజనం పొందుతున్నారని ఆయన వివరించారు. అదనంగా 113 మంది గ్రామస్థులు వృద్ధాప్య పింఛన్లు, 66 మంది నిరాశ్రితుల పింఛన్లు, 25 మంది దివ్యాంగుల పింఛన్లు పొందుతున్నారు. 12 మంది యువతులు ముఖ్యమంత్రి కన్య సుమంగళ యోజన ద్వారా ప్రయోజనం పొందారు. ప్రతి ఇంటికి ఒక టాయిలెట్ ఉంది. గ్రామంలో ఇప్పుడు ప్రాథమిక, ప్రాథమికోన్నత పాఠశాలలు ఉన్నాయి.
జాతీయ గ్రామీణ జీవనోపాధి మిషన్ (NRLM) కింద 38 మహిళా సంఘాలు స్థాపించబడ్డాయి. 882 మంది నివాసితులకు MGNREGA జాబ్ కార్డులు అందాయి. వంతంగియ గ్రామాలను రెవెన్యూ గ్రామాలుగా ప్రకటించడం సమాజానికి శ్రేయస్సును అందించే దిశగా ఒక అడుగు అని ముఖ్యమంత్రి అన్నారు.
ఈ సందర్భంగా క్యాబినెట్ మంత్రి డాక్టర్ సంజయ్ నిషాద్, ఎంపీ రవి కిషన్ శుక్లా, గోరఖ్‌పూర్ రూరల్ ఎమ్మెల్యే విపిన్ సింగ్, పిప్రైచ్ ఎమ్మెల్యే మహేంద్రపాల్ సింగ్, కుషినగర్ ఎంపీ విజయ్ దూబే, గోరఖ్‌పూర్ మేయర్ డాక్టర్ మంగళేష్ శ్రీవాస్తవ, బిజెపి ప్రాంతీయ అధ్యక్షుడు, ఎమ్మెల్సీ డాక్టర్ ధర్మేంద్ర సింగ్, సహజన్వా ఎమ్మెల్యే ప్రదీప్ శుక్లా, ఖజ్ని ఎమ్మెల్యే శ్రీరామ్ చౌహాన్, చిల్లుపార్ ఎమ్మెల్యే రాజేష్ త్రిపాఠి, చౌరిచౌరా ఎమ్మెల్యే సర్వన్ నిషాద్, బిజెపి జిల్లా అధ్యక్షుడు యుధిష్ఠిర్ సింగ్, మెట్రోపాలిటన్ అధ్యక్షుడు రాజేష్ గుప్తా, చార్గవాన్ బ్లాక్ ప్రముఖ్ వందన సింగ్, రణవిజయ్ సింగ్ మున్నా, కాలిబరి మహంత్ రవీంద్రదాస్, వంతంగియ ముఖియా రామ్‌గణేష్ మొదలైనవారు ప్రముఖంగా హాజరయ్యారు.
దీపోత్సవం, ప్రారంభోత్సవంలో, ముఖ్యమంత్రి యోగి ఆదిత్యనాథ్ కీలక ప్రభుత్వ పథకాల లబ్ధిదారులకు ప్రయోజనాలను పంపిణీ చేశారు. స్వామి వివేకానంద యువ సాశక్తీకరణ యోజన లబ్ధిదారులకు స్మార్ట్‌ఫోన్‌లను అందజేశారు. ముఖ్యమంత్రి ఆవాస్ యోజన లబ్ధిదారులకు సింబాలిక్ కీలు, సర్టిఫికెట్లను అందజేశారు. ఆయుష్మాన్ భారత్ పథకంలో నమోదు చేసుకున్నవారికి ఆయుష్మాన్ కార్డులను అందజేశారు. జాతీయ గ్రామీణ జీవనోపాధి మిషన్ లబ్ధిదారులకు రూ.450 లక్షల సింబాలిక్ చెక్కును అందజేశారు. ఈ కార్యక్రమాలతో పాటు ముఖ్యమంత్రి అన్ని లబ్ధిదారులకు దీపావళి బహుమతులను కూడా అందజేశారు.
జంగిల్ టింకోనియా నంబర్ మూడులో జరిగిన వంతంగియ దీపోత్సవ వేడుకల్లో ముఖ్యమంత్రి యోగి ఆదిత్యనాథ్ జిల్లాలోని 74 గ్రామ పంచాయతీలకు రూ.185 కోట్ల విలువైన అభివృద్ధి ప్రాజెక్టుల దీపావళి బహుమతిని అందించారు. జంగిల్ టింకోనియా నంబర్ మూడుతో సహా 42 గ్రామాల్లో ఉత్తరప్రదేశ్ జల్ నిగమ్ (గ్రామీణ) అందించిన తాగునీటి ప్రాజెక్టులను రూ.150.35 కోట్ల నిధులతో ప్రారంభించారు. అదనంగా 32 గ్రామ పంచాయతీలలో రూ.34.66 కోట్ల పనితీరు గ్రాంట్‌తో నిధులు సమకూర్చిన అభివృద్ధి కార్యక్రమాలను ప్రారంభించారు. ఈ ప్రాంతానికి మౌలిక సదుపాయాలు, సౌకర్యాలను మరింతగా అభివృద్ధి చేశారు.
జంగిల్ టింకోనియా నంబర్ మూడులో కార్యక్రమం తర్వాత ముఖ్యమంత్రి యోగి ఆదిత్యనాథ్ అటవీ, వ్యవసాయ, ఉద్యానవన, మహిళా సంక్షేమ, దివ్యాంగుల సాధికారత, ప్రథమిక విద్య, పశుసంవర్ధక, ఆరోగ్య, ODOP, జాతీయ గ్రామీణ జీవనోపాధి వంటి వివిధ ప్రభుత్వ శాఖల లబ్ధిదారులకు మద్దతు, ప్రోత్సాహకాలు అందించారు.
స్టాళ్లను సందర్శించిన తర్వాత, ముఖ్యమంత్రి యోగి ఆదిత్యనాథ్ గ్రామాన్ని పర్యటించారు. ఆయన మొదట వంతంగియ సమాజ అధిపతి రామ్ గణేష్ ఇంటి వద్దకు చేరుకున్నారు.ఈ ఇంటి బయట అందంగా తయారు చేసిన రంగోలి మధ్య దీపం వెలిగించి మొత్తం గ్రామానికి దీపోత్సవ వేడుకలను ప్రారంభించారు. గ్రామంలో తిరుగుతూ ప్రజలను ఆప్యాయంగా పలకరించారు. వారి పండగ శుభాకాంక్షలను స్వీకరించారు.
గ్రామానికి చెందిన పిల్లలతో సరదాగా గడిపారు. వారి ముఖాల్లో చిరునవ్వులు తెప్పించారు. తన నడక సమయంలో ముఖ్యమంత్రి గ్రామంలోని హిందూ విద్యాపీఠ్ విద్యార్థులను కలుసుకున్నారు... వారికి స్వీట్లు, బహుమతులు పంపిణీ చేసి పండుగపూట ఆనందాన్ని జోడించారు.