డా|| కె.గీత కవిత : చూపుడు వేలి చివర
By Arun Kumar P | First Published Aug 27, 2023, 1:49 PM ISTఒక్కటే ధైర్యం చూపుడు వేలి వెనక నాలుగు మడిచిన వేళ్ళున్నాయి అంటూ మణిపూర్ ఘటనకి బాధతో డా|| కె.గీత కవిత ' చూపుడు వేలి చివర ' ఇక్కడ చదవండి :
అన్ని అసహనాలకీ
చూపుడు వేలు
ఒక్కవైపే
కదులుతుంది
చివరికి
చూపుడు వేలి చివర
మా నగ్నదేహాల్ని
వేలాడదీశారు కదరా!
Latest Videos
undefined
తెగల పగలూ
కుల ప్రతీకారాలూ
మతోన్మాదాలూ
దుర్మార్గ రాజకీయాలూ
యుద్ధాలూ
తిరుగుబాట్లూ
అన్నిటా
తొలి దురాక్రమణ
మా దేహాలపైనే కదరా!
నిద్దట్లోనూ
కడుపులోంచి
రగిలే దుఃఖం
నగ్నంగా ఊరేగుతోంది
మీ పైశాచికత్వానికి
నెత్తురోడిన
దేహం
కలల చివర
చితికి వేళ్లాడుతోంది
అగ్ని ప్రకోపమై
లావా ప్రవాహమై
కుతకుత ఉడికే
మంట
పగళ్ళని
రాత్రుళ్ళని
దహించివేస్తోంది
అయినా
ఒక్కటే ధైర్యం-
చూపుడు వేలి
వెనక నాలుగు
మడిచిన వేళ్ళున్నాయి
పగిలిన దేహం వెనక
ఆకాశంలో సగం ఉంది
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి